Mmông hla čhiăm gru kđuh ti dlông sang Dinh Độc Lập yang hrue dơ̆ng hrue 30/4/1975 mŭt leh hlăm hƀuê ênuk djuê ana jing sa mta klei kdrăm k’ah  – hrue kwar dhŭng kluôm dhuôm mâo klei êngiê, lăn čar hluh lir, lăn ala êa djuh wĭt jing leh sa. Anăn amâo mâo djŏ knŏng jing klei dưi prŏng hjăn kơ mnuih ƀuôn sang Việt Nam ôh hlăm klei bi blah sua wĭt klei êngiê, ƀiădah lŏ jing klei bi knăl guh mngač kơ hdră êlan krŭ kdơ̆ng mơ̆ng klei tui duah klei êngiê hlăm klei jhŏng ktang, mơ̆ng klei thâo bi mguôp prŏng mơ̆ng jih jang djuê ana.

Klei dưi hrue 30/04/1975 jing boh mơ̆ng klei kut kat kjăp mră mơ̆ng djuê ana   Việt Nam kơ sa lăn čar mâo klei hluh lir, amâo mâo dưi bi ktlah ôh. Khua gĭt gai Hồ Chí Minh – jing khua gĭt gai prŏng kơ djuê ana bi klă leh klei sĭt anăn: “Lăn čar Việt Nam jing sa, djuê ana Việt Nam jing sa. Čư̆ dưi klă, êa dưi khuôt, ƀiădah klei sĭt nik anăn amâo mâo klei bi mlih ôh”. Klei blah dưi hrue 30/04 jing klei bi knăl kơ klei hdĭp hlăm ênuk mrâo “Amâo mâo ôh klei yuôm hĭn kơ klei hnŭk êngiê”

Klei dưi prŏng yan mnga 1975 lŏ mâo klei kruak knăl prŏng hŏng tar rŏng lăn, mđĭ ai prŏng kơ klei sua wĭt klei êngiê kơ djuê ana hlăm lu alŭ wăl ti Asi, Afrĭk, lehanăn Milatino, mtrŭt dŭm djuê ana kgŭ bi kdơ̆ng hŏng phung plah ala, sua mă klei êngiê. Anăn jing klei dưi mơ̆ng klei klă dôk hlăm klei kpă dưi bi kdơ̆ng hŏng klei ap gư̆ ktư̆ juă, bi êdah hŏng tar rŏng lăn ƀuh: Sa djuê ana khădah điêt tơdah bi blah kyua klei kpă, klei djŏ, mâo klei thâo bi mguôp lehanăn ai tiê jhŏng ktang, mâo klei bi sa ai hŏng lu mah jiăng ala tač êngao, mơ̆ng phung mâo klei mĭn đĭ kyar lehanăn mơ̆ng mnuih ƀuôn sang thâo khăp kơ klei êđăp ênang, snăn sĭt nik klei dưi hŏng djăp mta klei jhat prŏng êbeh kơ lu blư̆ dưn.

Klei blŭ "Lăn čar Việt Nam jing sa, djuê ana Việt Nam jing sa" mơ̆ng khua gĭt gai Hồ Chí Minh amâo mâo djŏ knŏng jing sa klei sĭt, sa hdră êlan djŏ, ƀiădah lŏ jing sa tiê boh mơ̆ng jih djuê ana.

Hlăm klei dôk bi blah, snăn klei blŭ anăn mjing leh ai ktang prŏng, mjing boh kdrŭt kơ dŭm êklăk čô mnuih nao hlăm klei bi blah hŏng ai tiê “săn asei mlei kơ lăn čả hdĭp”. Klei Awa blŭ anăn jing yuôm bhăn, jing leh klei bi knăl kơ klei thâo gĭr găn jih klei dleh dlan čiăng mâo mă klei êngiê, mlhuh lir lăn čar ba klei jăk mơak kơ mnuih ƀuôn sang.

 50 thŭn leh êgao, yap mơ̆ng hrue lăn čar leh wĭt jing sa, ƀiădah asăp kwang mơ̆ng klei muiñ siam anăn ăt dôk nanao hlăm ai tiê djuê ana Việt Nam. Dŭm eneuk gưl mnuih Việt Nam hrue anei, lehanăn mgi dih hdơr pioh nanao kơ klei săn asei mlei djiê êngiă kyua klei hnŭk êngiê kơ lăn čar, klei jăk yâo kơ mnuih ƀuôn sang, lehanăn klei đĭ kyar kơ djuê ana.

Brei drei mâo klei thâo hdơr knga hŏng mah jiăng ala tač êngao, dŭm êpul mâo klei mĭn đĭ kyar, dŭm ala čar yang ƀuôn ngă phŭn êngiê ayŏng adei, dŭm êpul thâo bi đru, mnuih ƀuôn sang khăp kơ klei êđăp ênang dlông rŏng lăn – mđrăm mbĭt đru ba sa ai hŏng Việt Nam thlăm dăl dŭm thŭn mlan bi blah sua wĭt klei êngiê kơ djuê ana, msĕ mơh hlăm klei rŭ mdơ̆ng lehanăn răng mgang lăn čar êdei kơ klei bi blah.

Êdei 50 thŭn lăn čar mâo klei hluh lir, drei mâo leh djăp ai tiê, djăp klei jưh knang, klei myưng m'ang lehanăn djăp klei thâo bi đru kñăm dưi găn jih klei ruă ênguôt lehanăn dlăng phă anăp – čiăng kơ klei bi blah leh êgao, amâo lŏ jing ƀăng êlam bi ktlah anak mnuih mơ̆ng sa amĭ ba ama ƀă.

Ti ktuê êlan đĭ kyar anăn, hdră mtrŭn djuê ana mâo nanao Đảng lehann Knŭk kna bi mklă jing hdră êlan yuôm bhăn, hdră phŭn kñăm bi kjăp klei bi mguôp jih jang djuê ana. Drei thâo klă dŭm mta phŭn hlăm hƀuê ênuk ngă truh klei bi blah, mơ̆ng klei čhŭ luă, bi kah mơ̆ng nah êngao truh kơ dŭm mnêč čiăng bi rai klei bi hgŭm mguôp, mnêč jhat hlăm ghdră kđi čar. Ƀiădah drei thâo, grăp čô mnuih Việt Nam, khădah dôk hlăm amâo dah êngao ala čar, jih jang mâo sa phŭn agha ana hruê̆ kbiă hruê, mâo sơaĭ klei khăp kơ ala čar, kơ ƀuôn sang.

Bi mguôp djuê ana amâo djŏ wơr ôh hƀuê ênuk amâo dah bi luič ram klei mdê mdê mơ̆ng djuê ana, ƀiădah anei jing klei bi tŭ ư kơ dŭm klei mâo mdê mdê hlăm ai tiê thâo bi pap lehanăn thâo mpŭ, čiăng mđing truh kơ mta kñăm prŏng hĭn, mkŏ mkra sa ala čar Việt Nam êđăp ênang, hluh lir, jhŏng ktang, kreh dhar, đĭ kyar, čiăng kơ ênuk gưl êdei amâo mâo klei bi blah, klei bi roh, luič liê msĕ aduôn aê drei đưm tuôm găn leh.

Drei amâo dưi bi mlih klei mâo mơ̆ng hƀuê ênuk ƀiădah drei dưi tă hdră êlan nao kơ êdei anăp. Klei hđăp êgao leh čiăng drei thâo hdơr, thâo lač jăk mơ̆ng anăn mă kleihriăm. Hlăm êdei anăp drei hrăm mbĭt mkŏ mkra lehanăn mđĭ kyar.

Hlăm jih jang klei anăn, phung hđeh ênuk gưl anei brei thâo săng klă, klei êđăp ênang, hluh lir amâo djŏ jing mta kñăm knhal tuič, ƀiădah anei jing mphŭn čô̆ kơ sa ktuê êlan mrâo: Ktuê êlan mkŏ mkra sa ala čar Việt Nam êđăp ênang, mdrŏng sah, kreh dhar, đĭ kyar. Tơdah ênuk aê ama pô đưm bi mklă leh “Ala čar Việt Nam jing sa, djuê ana Việt Nam jing sa” diñu săn leh asei mlei djiê êngiă, snăn ênuk gưk anei brei thâo mjing klei bi mklă anăn jing boh kdrŭt đĭ kyar, kpưn đĭ ktang hĭn hlăm ênuk gưl mrâo.

Brei jih jang drei thâo mkŏ mjing sa hdră duh mkra čŏng pô, sa hdră bruă lĭng kahan – răng mgang klei êđăp ênang kjăp, kluôm dhuôm lehanăn mrâo mrang; sa anôk bruă kđi čar khuăt, ngă bruă tŭ dưn, sa ala ƀuôn đĭ kyar, hgŭm mguôp, dhar kreh lehanăn thâo bi đru.

Ênuk gưl mrâo drei dôk kpưn đĭ – hŏng kdrăp klei thâo anak mnuih, bi mlih mrô, đĭ kyar mtah lehanăn đĭ kyar hơĭt kjăp – dôk čiăng brei klei mĭn mrâo, gru hmô đĭ kyar mrâo, anak mnuih mrâo. Ti anăp, drei dôk lu klei lông dlăng kơ klei bhiăn, boh tŭ hdră mă bruă, hnơ̆ng thâo mnuih mă bruă, hdră răng mgang wăl hdĭp mda, klei ruă tưp, klei bi mlih yan adiê, wăt hdră răng mgang klei êđăp ênang. Ƀiădah hƀuê ênuk bi klă leh, djuê ana Việt Nam ka tuôm êdu ai anăp klei dleh dlan, lông dlăng ôh. Mta phŭn jing drei mâo djăp klei thâo, klei jhŏng, ai ktang čiăng bi mlih, dưi hgao jih klei anăn, mâo klei bi mguôp kjăp čiăng mjing klei dleh dlan jing boh kdrŭt đĭ kyar mơ̆ amâo dah hơaĭ.

Dlăng kơ anăp, drei mâo klei dưi ktưn hưn lehanăn mâo djăp klei đăo knang hlăm ai ktang mơ̆ng djuê ana Việt Nam – sa djuê ana dŭm blŭ mblah dưi hŏng phung roh plah ala lehanăn krŭ wĭt ktang phĭt mơ̆ng klei bi blah, mñă klă pô anăp hƀuê ênuk lehanăn anăp tar rŏng lăn. Hŏng knhuah gru êbâo thŭn mkŏ mkra lehanăn răng mgang ala čar, klei gĭr ktưn kpưn đĭ amâo mdei, hŏng ênuk gưl hđeh, mâo klei thâo, mĭn mrâo, khăp kơ ala čar lehanăn lu klei mĭn mrâo, jhŏng ngă – Việt Nam klă sĭt srăng tŭ jing.

Ênuk gưl XXI jing ênuk gưl mơ̆ng djuê ana thâo kpưn đĭ. Lehanăn djuê ana Việt Nam – hŏng lu klei hriăm yuôm bhăn mơ̆ng ênuk đưm, hŏng klei bi hgŭm mguôp kjăp hruê anei – klă sĭt srăng lŏ čuê čih dŭm klei mrâo jăk siam hlăm ktuê êlan đĭ kyar mơ̆ng pô. Kyua sa ala čar Việt Nam êđăp ênang, hnŭk êngiê, yâo mơak, dhar kreh, đĭ kyar, sah mdrŏng, mâo kơhưm lehanăn klei blŭ yuôm bhăn hlăm êpul êya tar rŏng lăn./.