Hlăm ênuk bi blah, dŭm gưl mnuih ƀuôn sang ti Lăn Dap Kngư sa ai hluê Đảng, hur har đru hlăm klei bi blah truh kơ hruê mâo klei dưi. Jing sa čô anak mnuih djuê ana Sêdang, k’ kiêng ti ƀuôn Kon Gung, să Đăk Sao, kdriêk Tu Mơ Rông, čar Kon Tum, jih klei hdĭp A Tủi bi mguôp hŏng lĭng kahan. Đĭ hriê kơ prŏng hlăm dŭm thŭn mblah Mi leh anăn wĭt mdei bruă êjai ngă bruă klam khua gĭt gai bruă lĭng kahan kdiêk Đăk Tô, A Tủi hdơr nanao dŭm hruê mlan bi blah.

Thŭn anei djŏ wưng bi hdơr 48 thŭn sua wĭt klei êngiê krĭng kwar Dhŭng, lĭng kahan hđăp A Tủi mkăp lu mmông nao čuă anôk bi blah đưm, anôk ñu mƀĭt hŏng phung ƀĭng hgŭm jhŏng ktang bi blah leh anăn mâo klei dưi msĕ si B15, anôk bi blah Đăk Tô – Tân Cảnh:

“Hruê 30/4 kâo mơ̆ng anôk bi blah b15 nao đru ti čar Quảng Ngãi, êjai mông anăn kâo hmư dưi sua wĭt leh klei êngiê ti krĭng Kwar Dhŭng Leh kơnăn hmei lŏ wĭt ti anôk bi blah B15 ti čar Kon Tum, ară anei jing Anôk bruă lĭng kahan alŭ wăl. Leh hmư̆ dưi sua wĭt klei êngiê krĭng kwar Dhŭng hmei hơ̆k mơak sơnăk, lĭng kahan hmei pah kngan hơ̆k mơak, kyua ala čar tlaih leh mơ̆ng klei rŭng răng. Ayŏng adei lĭng kahan hmei mprăp hmư asăp gưl dông gĭt gai jing bruă klam kdlưn hĭn mơ̆ng sa čô lĭng kahan”.

Y Tánh Mlô mnuih djuê ana M’nông_ƀuôn Bhô̆k, să Ea Rbin, kdriêk Lak, čar Dak Lak ăt găn leh dŭm thŭn mlan bi blah ti Lăn Dap Kngư. Ñu lač, klei hdĭp mmông anăn mâo lu klei dleh dlan suăi êmăn, ƀiădah ăt sa ai hlue Đảng, hluê cách mạng.

“Đảng, cách mạng mơ̆ng drei mkŏ mjing mtrŭt mjhar mnuih ƀuôn sang dôk hlăm dliê čiăng hluê cách mạng mơ̆ng thŭn 1958 – 1975, klei hdĭp ênuk anăn dleh dlan sơnăk. Mnuih ƀuôn sang ngă hma pla mdiê, pla hbei ƀlang truh ti thŭn 1972 – 1973 Mi rah êa drao ruă diosin. Lĭng kahan leh anăn mnuih ƀuôn sang dôk knap mñai ƀiădah ăt sa ai hluê Đảng, hluê cách mạng.

Să Nung, kdriêk Krông Knô, čar Dak Lak jing krĭng phŭn bruă krŭ kdơ̆ng ênuk Ama Trang Lơng krŭ kdơ̆ng mblah Prăng, leh anăn dưi lŏ čuê hlăm 2 gưl krŭ kdơ̆ng sua wĭt klei êngiê djuê ana. Anôk anei mâo anôk phŭn bruă krŭ kdơ̆ng B4 – mlir čar IV, dưi dăp jing wăl kriê pioh hƀuê ênuk bruă cách mạng gưl ala čar. Nâm Nung dôk mâo čar Dak Nông mkŏ mjing wăl anôk hiu čhưn ênguê “Klei mmuñ mơ̆ng êa leh anăn pui” dôk hlăm wăl kriê pioh mnơ̆ng gŭ lăn UNESCO Dak Nông. Anôk krŭ kdơ̆ng Nâm Nung jing sa anôk hrah mtô mjuăt knhuah gru bruă cách mạng hong phung tuê hiu čhưn ênguê čiăng wĭt kơ phŭn agha. Pô thâo mbruă Y Xuyên, ti ƀuôn Ja rah, să Nâm Nung, lŏ wĭt hdơr dŭm thŭn mlan mbĭt hŏng ƀuôn sang mblah Mi:

“Phŭn dô klei bi blah ktang phĭt, boh ƀom boh mtuh dŭm mta, hmei dôk hlăm dliê tơdah mâo êdeh phiơr mplĕ ƀom srăng đuĕ dăp hlăm ƀăng k’ưp. Leh êdeh phiơr đuê̆ hmei lŏ đru kơ lĭng kahan gui boh phao leh anăn mnơ̆ng ƀơ̆ng. Êjai phung lĭng kahan kƀah hra, kƀah êsei… hmei lŏ gui ba kơ diñu.