VOV4.Êđê- Dak Lak jing krĭng dôk mâo klei ruă Covid 19 dleh dưi ksiêm dlăng êdi ti Lăn dap kngư hŏng ênoh mnuih ruă êbeh 36.200 čô, hlăm anăn mâo 2.153 čô ruă hlăm hruê 28/2. Ti ƀuôn prŏng Ƀuôn Ama Thuôt, anôk bluh mâo ktang êdi hlăm čar, Khua anôk bruă sang čư̆ êa ƀuôn prŏng mrâo mtrŭn hră m’ar mjêč, brei mơ̆ng hruê 1/3, dŭm sang hră mdei bruă nao hriăm klă anăp mơ̆ng gưl 1 truh kơ gưl 3, bi mlih mtô bi hriăm hluê hdră online.

Hluê hră m’ar mjêč anei, ênoh mnuih ruă Covid 19 ti ƀuôn prŏng đĭ pral ênoh F0 dŏng mdrao ti sang truh 99% ênoh mnuih ruă, kyua anăn bruă mdei mtô bi hriăm klă anăp jing djŏ hlăm wưng ară anei, kñăm bi hrŏ hnơ̆ng tưp lar. Ti Lâm Đồng, ăt mâo mơ̆ng 700 – 800 čô ruă grăp hruê. Truh hruê 28.2, kluôm să ƀuôn hgŭm mơ̆ng ƀuôn prŏng Đà Lạt lehanăn kdriêk Đơn Dương jing leh krĭng hrah mda – hnơ̆ng tưp lar lu. Ti anăp klei dleh dưi ksiêm dlăng mơ̆ng klei ruă, mơ̆ng hruê 28/2, phung hđeh điêt ti ƀuôn prŏng amâo lŏ nao sang hră, phung hđeh mơ̆ng adŭ 1 truh kơ adŭ 6 dưi hriăm online./.

Pô mblang: H’Nêč Êñuôl