Đinh K’re, Khua dlăng bruă Đảng să Kon Pne, kdriêk Kbang, čar Gia Lai brei thâo: jing să krĭng dleh dlan kdriêk Kbang, čar Gia Lai, kyua anăn, hŏng bruă klam jing khua gĭt gai să, Đinh K’re tui hriăm nanao Awa Hồ hlăm ai tiê čŏng ngă. Jing sa čô đảng viên, Đinh K’re amâo djŏ knŏng đru mnuih ƀuôn sang hlăm klei mđĭ kyar bruă duh mkra ôh, ƀiădah lŏ đru hâo hưn mtô mblang mnuih ƀuôn sang ngă jăk hdră êlan mơ̆ng Đảng, hdră bhiăn Knŭk kna leh anăn dŭm hdră bi lông khăp kơ ala čar truh kơ mnuih ƀuôn sang hlăm gŏ sang, găp djuê. Hlue si Đinh Kre, tui hriăm leh anăn hlue ngă knhuah mngač Hồ Chí Ming brei grăp gưl bruă đảng leh anăn đảng viên mđĭ klei thâo săng, đua klam hlăm jih 3 mta: tui hriăm Awa Hô, hlue ngă tui si Awa leh anăn bi hmô:

Kâo ƀuh bruă tui hriăm leh anăn hlue ngă Awa ăt dưi ba hlăm klei hdĭp mnuih ƀuôn sang, ăt msĕ mơh mtrŭt mjhar mnuih ƀuôn sanhg bi hgŭm. Phung knuă druh, đảng viên ngă leh klei Awa mtă brei bi hgŭm, mkiêt mkriêm, ktrâo lač mnuih ƀuôn sang thâo bi đru mkŏ mjing klei hdĭp mrâo jăk siam hĭn.

Hlăm klei hdĭp ngă bruă krŭ kdơ̆ng, khua gĭt gai Hồ Chí Minh kreh bơ̆k bâo kơ klei bi hmô ti anăp mnuih ƀuôn sang mơ̆ng phung knuă druh, đảng viên tal êlâo bi hmô hlăm klei mĭn, knhuah hdĭp. Đảng viên K’Nam, Êpul čung ba mnuih ƀuôn sang kdriêk Di Linh, čar Lâm Đồng brei thâo, jiă kma klei mĭn anăn, hlăm wưng êgao, ñu leh anăn phung đảng viên mkăn hlăm anok bruă amâo mâo mdei hluê ngă gru mngač Awa hlăm djăp mta bruă, boh nik jing nao êlâo hlăm dŭm hdră bruă bi lông ktưn khăp kơ lăn čar, hrăm mbĭt mkŏ mkra krĭng ƀuôn sang mrâo, leh anăn mtrŭt mjhar mnuih ƀuôn sang ti alŭ wăl hluê ngă.

“Mâo hŏng anei 55 thŭn, jing thŭn 1969, êlâo kơ đuê̆ nao, khua gĭt gai Hồ Chí Minh lui leh kơ Đảng, jih jang mnuih ƀuôn sang drei hră čih yuôm bhăn. Anei jing hră mơar hƀuê ênuk yuôm bhăn êdi, bi kƀĭn djăp mta jăk mơ̆ng ai tiê leh anăn knuih kniêng jăk siam, tă hdră mđĭ kyar kơ cách mạng Việt Nam hruê anei leh anăn êdei anăp. Thâo săng klă klei anăn, kâo pô ăt msĕ mơh phung knuă druh, đảng viên ti alŭ wăl gĭr jih ai tiê hlăm klei mă bruă knuă, amâo mâo mdei hluê ngă gru mngač mơ̆ng Awa”.

Điểu Mbrâng, djuê ana M’Nông, jing sa čô mnuih mâo kơhưm ti ƀuôn Dak R’Mon, să Dak Rmoan, ƀuôn prŏng Gia Nghĩa, čar Dak Nông. Điểu Mbrâng mrâo ktưn hưn jing sa hlăm 27 čô bi ala mơ̆ng ƀuôn prŏng Gia Nghiã nao hlăm Klei bi kƀĭn phung bi ala bruă mặt trận čar Dak Nông tal V, wưng 2024-2029. 55 thŭn hlue ngă klei Awa Hồ mtă mtăn, Điểu Mbrâng brei thâo, mnuih ƀuôn sang hdơr nanao klei ñu mtă, Mnuih ƀuôn bi hgŭm, đăo knang hlăm klei Đảng gĭt gai, bruă sang čư̆ êa kriê dlăng. Mnuih ƀuôn sang mđing kơ hdră bi lông ktưn, klei mtrŭt mjhar, boh nik klei mkŏ mjing ƀuôn sang mrâo. Lu gŏ sang myơr lăn, đru mguôp ai tiê čiăng ngă hdră bruă êlan klông. Tui hriăm, hlue asăp Awa Hồ, mnuih ƀuôn sang Dak Nông bi hgŭm, hrăm mbĭt sa ai tiê mkŏ mjing ƀuôn sang, lăn čar mdrŏng sah.

“Awa Hồ pioh klei khăp êlam snăk kơ mnuih ƀuôn sang Lăn Dap Kngư leh anăn mnuih ƀuôn sang hdơr klei ñu mtă. Tui hriăm knhuah mngač ñu, mnuih ƀuôn sang bi hgŭm, sa ai tiê tui hlue Đảng, Knŭk kna. Mnuih ƀuôn sang srăng mă bruă knuă, mkŏ mkra ƀuôn sang, lăn čar mdrŏng sah jăk siam.

Amai Ham, 35 thŭn, jing knuă druh bruă mặt trận să Čư̆ Ă, ƀuôn prŏng Pleiku, čar Gia Lai. Lu thŭn êgao, amai amâo mâo mdei hluê ngă gru mngač Hồ Chí Minh, dlăng boh tŭ dưn kơ mnuih ƀuôn sang jing mrô 1. Hŏng ai tiê bruă klam anăn, amai mtrŭt mjhar, hâo hưn kơ mnuih ƀuôn sang đăo knang kơ dŭm hdră êlan mơ̆ng Đảng leh anăn knŭk kna. Amei kreh bi tuôm, kah mbha, hlăk mblang kơ mnuih ƀuôn sang leh anăn mtrŭt mjhar digơ̆ myơr lăn ngă êlan, hluê ngă dŭm hnơ̆ng čuăn krĭng ƀuôn sang mrâo. Kyuanăn, amai đru hlăm bruă mđĭ klei thâo săng, klei bi mguôp êpul êya ti alŭ wăl. Mbĭt anăn amai mâo mnuih ƀuôn sang khăp čiăng, mpŭ leh anăn jing pô bi hmô hlăm bruă hluê ngă gru mngač Hồ Chí Minh ti alŭ wăl. Amai brei thâo:

 “Kâo mđĭ ai grăp čô ngă dŭm bruă jăk, thâo bi đru hdơ̆ng pô, leh anăn amâo mâo hmư̆ klei arăng duah mplư. Hlăm dŭm hruê knăm mơak, kâo mtă kơ mnuih ƀuôn sang kă hla čhiăm gru čiăng bi êdah klei khăp kơ lăn čar leh anăn hdơr kơ phung săn asei čiăng răng mgang klei êngiê, brei kơ drei mâo klei hdip trei mđao, yâo mơak msĕ ară anei.”

Mơ̆ng klei khăp Awa Hồ, lŏ dưi mđĭ kyua ai tiê găn klei dleh dlan mơ̆ng krĭng ƀuôn sang mâo boh êlam knhuah gru krŭ kdơ̆ng, ayŏng A Lấu 38 thŭñ, djuê ana Sêdang, să Măng Bút, kdriêk Kon Plông, čar Kon Tum amâo uêñ kơ êlan klông taih kbưi leh anăn klei hdĭp dleh dlan mơ̆ng gŏ sang kriăng hriăm hră mơar. Ară anei, ñu jing knuă druhh kơ bruă lăn ala să Măng Cành, kdriêk Kon Plông. Ayŏng A Lấu bi mklă, knŏng Đảng, knŏng mâo Awa Hồ ba klei jăk mơak, êlan klông găl ênưih, ba bruă mdrao mgŭn, sang hră… truh hŏng mnuih Sêdang ti Măng Bút. Kyua anăn dưi mă bruă, duh myơr mkŏ mjing ƀuôn sang, ayŏng A Lấu gĭr ktưn nanao hlăm bruă knuă, hlue ngă knhuah mngač Awa Hồ:

“Hlue ngă Klei mtrŭt mjhar “Tui hriăm hlue ngă knhuah mngač Hồ Chí Minh” knuă druh să, alŭ leh anăn jih jang mnuih ƀuôn sang ngă jăk. Grăp thŭn, ti alŭ wăl pŏk ngă hŏng klei blŭ djuê ana pô đru kơ mnuih ƀuôn sang ênưih hmư̆, ênưih săng kơ boh phŭn klei mtrŭn mjhar. Klei hdĭp mnuih ƀuôn sang ti alŭ wăl lu jing ngă lŏ hma, bruă klam knuă druh hmei jing ktrâo lač, mtrŭt mjhar mnuih ƀuôn sang bi hgŭm, đăo knang hlăm hdră êlan mơ̆ng Đảng, hlue ngă klei Awa mtô, mnuih ƀuôn sang mâo lu klei mrâo, thâo săng kơ klei kreh knhâo hdră mnêč mđĭ kyar bruă duh mkra gŏ sang.

Jing krĭng phŭn bruă krŭ kdơ̆ng hlăk ênuk mblah Mi, ƀuôn Pa, să Čư̆ Prao, kdriêk Mdrak, čar Dak Lak ară anei mâo leh klei mlih, klei hdĭp mnuih ƀuôn sang đĭ kyar. Hlăm ƀuôn ară anei mâo giăm 200 gŏ sang hŏng êbah 800 čô, grăp gŏ sang mâo tivi, êdeh đĭ, đĭng blŭ thâo mĭn, mâo pui kmlă leh anăn jih jang phung anak čô dưi nao sang hră mơar. Ƀuôn Pa mrâo anei dưi mkra 6 bĭt êlan hŏng boh taih êbeh 6km, mâo 1,2 êlan dưi Kuč mngač krĭng ƀuôn mơ̆ng bruă êdam êra čar Dak Lak bi mguôp hŏng bruă Êdam êra knơ̆ng bruă pui kmlă Dak Lak. Y-Tuân Ksơr, ti ƀuôn Pa brei thâo:

“Êlâo dih klei hdĭp mnuih ƀuôn sang dleh dlan, amâo mâo pui kmlă, êlan klông. Ară anei kyua mâo dŭm hdră êlan mơ̆ng knŭk kna, ƀuôn sang mâo pui kmlă, êlan klông, anôk mdrao mgŭn, sang hră mơar, ƀuôn sang mâo klei mlih jăk. Mnuih ƀuôn sang đăo knang, hmư̆ leh anăn ngă klei mtă mơ̆ng Awa Hồ, hluê ngă djŏ klei bhiăn lăn čar mơ̆ng Đảng leh anăn knŭk kna.