Hlăm anăn, mâo giăm 1.500 gŏ sang dưi đru mdơ̆ng mrâo lehanăn 440 gŏ sang dưi đru mkra mđĭ sang. Snăn, tĭng truh kơ ară anei, čar Kon Tum mâo leh 2/3 hdră kčah msir lăm sang dôk êjai, sang tĭ ƀrôč. Čar dôk mđing djăp klei găl mâo čiăng kơ knhal jih mlan 6 srăng ngă leh bruă msir lăm 824 boh sang êjai, sang tĭ ƀrôč adôk. Kon Tum hluê ngă leh lu hdră msir mghaih kơ klei mĭn dôk čang guôn klei đru, klei mnơ̆ng yua rŭ mdơ̆ng đĭ ênoh, kƀah mnuih đru mă bruă kyua mnuih ƀuôn sang mŭt hlăm yan ngă bruă duh mkra pla mjing…

Hruê 11-4, Knơ̆ng bruă 72 (Binh đoàn 15) mkŏ mjing leh knăm mphŭn rŭ mdơ̆ng lăm lui sang tĭ, ƀrôč leh anăn mđup brei prăk đru 26 gŏ êsei jing phung mă bruă leh anăn mnuih ƀuôn sang ti kdriêk Đức Cơ, čar Gia Lai. Knơ̆ng bruă 72 iêô mkrum leh lu klei găl, hrăm mbĭt đru mkra mrâo 23 boh sang, mkra mđĭ 3 boh sang, hŏng ênoh bi liê êbeh 1,3 êklai prăk. Mbĭt anăn, Knơ̆ng bruă ba nao leh phung knuă druh, lĭng kahan leh anăn mjing klei găl kơ phung mă bruă, mnuih mă bruă mă prăk mlan êlâo čiăng mâo prăk đru mdơ̆ng sang prŏng hĭn. Êlâo anăn, thŭn 2024, Knơ̆ng bruă 72 ăt iêô mkrum klei găl čiăng đru mdơ̆ng 11 boh “Sang Ƀĭng kahan”, “Sang bi hgŭm”, “Sang hơuh mđao kơ phung mă bruă” mâo ênoh jih jang 760 êklăk prăk.

Ti čar Dak Nông, Êpul grŭp Tuh tia mkra mjing Hdăng – mnơ̆ng yuôm hlăm gŭ lăn mơ̆ng (TKV) jao leh 350 êklăk prăk čiăng mdơ̆ng 5 boh sang đru kơ mnuih djuê ƀiă ƀun. Anei jing ênoh prăk TKV pioh hluê ngă hdră “Msir lăm sang dôk êjai, sang tĭ ƀrôč” ti Dak Nông thŭn 2025. Grăp gŏ sang dưi đru 70 êklăk prăk čiăng mdơ̆ng mrâo sang. Dŭm gŏ sang mâo đru gưl anei jing H'Dôi (ƀuôn Păng Sim, să Trường Xuân, kdriêk Dak Song), Điểu Nguyên (ƀuôn Phi lơ te, să Dak Ngo, kdriêk Tuy Đức); K'Sét (ƀuôn B'Nor, să Dak Som, kdriêk Dak Glong), Thị Nhú (ƀuôn Bu sê rê I, să Dak Ru, kdriêk Dak R’lấp) lehanăn Nông Văn Dương (să Ƀuôn Čuah, kdriêk Krông Nô).