Ti Gia Lai, 2847 êdam êra čar Gia Lai nao mŭt kahan hlăm aguah 25/2.  Hlăm ênoh anei, mâo 59% jing mnuih djuê ƀiă, 479 čô mâo hră akâo mŭt kahan, 72 čô hriăm leh gưl prŏng, gưl krah. Knăm jao kahan ti čar Gia Lai dưi mkŏ mjing kdrưh kơăm ti 17 anôk ti 17 kdriêk, wăl krah, ƀuôn prŏng.

 Bi ti Dak Lak, mâo 3.026 čô êdam êra nao mŭt kahan tal anei. Nao hlăm anôk jao kahan ti wăl krah Ƀuôn Hô, Dak Lak mâo Trung tướng Thái Đại Ngọc, Khua krĭng kahan V, Khua dlăng bruă Đảng čar Dak Lak Nguyễn Đình Trung hŏng Khua gĭt gai alŭ wăl leh anăn mnuih ƀuôn sang. Ti anôk jao - mă kahan ti wăl krah Ƀuôn Hô mâo 173 čô, hlăm anăn 80 čô čŏng čih hră mŭt kahan./.

Bi ti Dak Nông, Knăm jao kahan ti dŭm kdriêk hlăm alŭ wăl čar dưi mkŏ mjing hŏng klei mpŭ, klă sĭt jing hruê m’ak mơ̆ng phung êđam êra lŏ čuê knhuah gru aê ama pô. Mơ̆ng anăn, mđĭ lar ai tiê cách mạng, klei ktưn hưn djuê ana lehanăn knhuah gru kdrưh k’ăm, gĭr mkŏ mkra, răng mgang ala čar. Thŭn 2024, čar Dak Nông mâo 1.150 čô nao hriăm kahan, hlăm anăn mâo 900 čô ngă bruă klam hriăm kahan, êbeh 250 čô hriăm kahan ksiêm. Phung êdam êra nao hriăm kahan gưl anei hluê ngă bruă ti dŭm êpul êya mơ̆ng Phŭn bruă kahan ksiêm, Kahan krĭng 3 (Phŭn bruă lĭng kahan) Trung đoàn Bộ binh 994 (Knơ̆ng gĭt gai lĭng kahan čar Dak Nông), Knơ̆ng gĭt gai lĭng kahan răng mgang knông lăn čar Dak Nông lehanăn Kahan ksiêm čar Dak Nông

Knăm jao kahan thŭn 2024 mâo 10 kdriêk, ƀuôn prŏng čar Kon Tum mkŏ mjing hlăm aguah 25/2 hlue si hdră kčah, rơ̆ng kdrưh kơăm, êđăp ênang, mkiêt mkriêm leh anăn klă sĭt jing knăm mơak mŭt kahan. Thŭn anei kluôm čar Kon Tum mâo 804 čô nao mŭt kahan. Klei hâo hưn mơ̆ng Anôk bruă lĭng kahan čar Kon Tum brei ƀuh Êpul gơ̆ng ruah mŭt kahan dŭm gưl ngă leh hdră ruah, iêô jak phung êdam êra mŭt kahan kjăp, hrăm mbĭt, djŏ Hdră bhiăn mŭt kahan, rơ̆ng klă mngač, êngiê hlăm klei hrŏng ruah. Hlăm 804 čô êdam êra čar Kon Tum nao mŭt kahan mâo 26 čô čŏng akâo hră mŭt kiahan, mơ̆ng 18-27 thŭn rơ̆ng kơ klei suaih pral; 28 čô hriăm gưl krah, gưl prŏng, 2 čô đảng viên. Êlâo kơ nao mŭt kahan phung êdam êra leh anăn gŏ sang mâo klei mđing dlăng mơ̆ng gưl bruă Đảng, bruă sang čư̆ êa leh anăn êpul bruă alŭ wăl./.