Thŭn hriăm anei, kluôm čar mâo giăm 500 êbâo čô hđeh sang hră dŭm gưl, hlăm anăn hđeh sang hră mnuih djuê ƀiă mâo êbeh 35%. Knăm mphŭn pŏk thŭn hriăm mrâo 2024-2025 ti sang hră gưl 3 Knŭk kna rông ba mnuih djuê ƀiă Nơ Trang Lơng, ƀuôn prŏng Ƀuôn Ama Thuôt, čar Dak Lak, sang hră bi mklă bruă klam phŭn jing mđĭ hnơ̆ng tŭ jăk bruă mtô bi hriăm kluôm leh anăn phŭn. Boh nik sang hră mđing leh anăn duah hdră msir tŭ dưn kơ bruă mtô bi hriăm mdê hjăn hŏng sang hră mnuih djuê ƀiă knŭk kna dlăng ba anăn jing mtô bi hriăm djuê ana leh anăn bi hriăm dhar kreh djuê ana hlăm sang hră.

Knăm mphŭn pŏk thŭn hriăm mrâo 2024-2025, ti dŭm sang hră mơ̆ng krĭng wăl krah truh ti dŭm alŭ wăl krĭng taih kbưi, krĭng mnuih djuê ƀiă mkŏ mjing bhiâo, yuôm bhăn leh anăn mjing ai êwa jăk mơak kơ phung nai leh anăn hđeh sang hră ti čar Dak Lak hlăm thŭn hriăm mrâo.

Aguah mbrue 5/9, êbeh 400 êbâo cô hđeh hriăm hră ti čar Gia Lai nao hlăm knăm pŏk thŭn hriăm mrâo 2024 – 2025.  Ti Sang hră gưl sa Võ Thị Sáu, ƀuôn prŏng Pleiku, čar Gia Lai, Êpul gơ̆ng bruă hđeh mơ̆ng gưl dlông, dôk hlăm êpul bruă êdam êra gưl dlông CS Hồ Chí Minh pŏk ngă mơh kơ bruă hđeh êlăk thŭn hriăm 2024-2025 lehanăn mđup brei 526 pŏk hlak kak rup lăn Việt Nam mbĭt hŏng lu mnơ̆ng mđup brei yuôm bhăn kơ hđeh hriăm hră hlăm sang hră msĕ si 1.000 blah čhiăm guêč hrah, 13 hla čhiăm gru êpul hđeh, mbĭt hŏng lu kdrăp hriăm hră mơar kơ phung hđeh, mâo ênoh jih jang êbeh 256 êklăk prăk. Thŭn hriăm 2024 – 2025, čar Gia Lai mâo 759 boh sang hră hŏng êbeh 400 êbâo čô hđeh dŭm gưl nao hriăm.

-Hội đồng Đội Trung ương đã tặng bản đồ Việt Nam và nhiều phần quà ý nghĩa cho thầy và trò Trường Tiểu học Võ Thị Sáu, thành phố Pleiku, tỉnh Gia Lai

Ăt hlăm aguah mbruê, 5/9, êbeh 7000 čô hđeh sang hră leh anăn phung nai 29 sang hră ti kdriêk Kon Plông, čar Kon Tum ăt hrăm mbĭt mkŏ mjing knăm mphŭn pŏk thŭn hrăm mrâo. Klei mdê hjăn mkŏ mjing ti lu adŭ hriăm leh knăm mphŭn pŏk jing phung hđeh ngă klei ksiêm dlăng klei thâo pral leh anăn mdrơ̆ng hŏng klei mgei lăn.

Nai Lê Văn Đồng, K’iăng Khua adŭ bruă Sang hră mtô bi hriăm kdriêk Kon Plông, brei thâo, bi mklă mgei lăn jing klei yan adiê ngă dleh đăo knăl leh anăn srăng ba klei luč liê dleh đăo tĭng, êlâo kơ mŭt hlăm thŭn hriăm mrâo 2024-2025, bruă sang hră kdriêk gĭr bi hgŭm hŏng dŭm anôk bruă djŏ tuôm mprăp klei thâo mdrơ̆ng hŏng klei mgei lăn kơ phung hđeh leh anăn nai mtô.