Êpul hgŭm mnuih mă bruă čar Gia Lai bi mguôp hŏng bruă sang čư êa čar Gia Lai mkŏ mjing knăm mtrŭt mjhar Mlan ngă bruă klei êđăp ênang êjai mă bruă mleh anăn mlan Mnuih mă brư thŭn 2023. Anôk bruă mkŏ mjing dŭm mta bruă msĕ si: Knăm pŏk klei bi lông pah peng pŏng mnuih mă bruă kluôm čar gưl tal 5, mđup brei hnư mnơ̆ng kơ phung đoàn viên, phung êdam ara mâo klei ruă duam, mâo klei hdĭp dleh dlan mđup brei 11 “Sang công đoàn” kơ mnuih mă bruă amâo mâo sang dôk… Aduôn Rơ Mah Nga, k’iăng khua kiă kriê êpul hgŭm  mnuih mă bruă čar Gia Lai brei thâo:  Čiăng bi klă akŏ ngă bruă hlăm thŭn “Kriê dlăng bruă mă, klei hdĭp mnuih mă bruă, bi ktưn bi leh jih hnơ̆ng dŭm bruă klam, mta kñăm mơ̆ng hdră mtrŭn Klei kƀĭn kluôm tal 12  Công đoàn Việt Nam” hŏng bruă ngă, mơ̆ng akŏ thŭn Êpul hgŭm mnuih mă bruă čar mâo leh hră mtrŭn gĭt gai, mtô kơ bruă kriê dlăng klei hdĭp, ai tiê kơ phung đoan viên, mnuih mă bruă.

 “Êpul hgŭm mnuih mă bruă čar Gia Lai kñăm kơ bruă kriê dlăng boh tŭ klă klơ̆ng mơ̆ng phung đoàn viên, mnuih mă bruă, bi êdah hŏng bruă kriê dlăng mnơ̆ng yua, ai tiê, klei dưi bruă kđi čar kơ phung đoàn viên leh anăn mnuih mă bruă. Mơ̆ng anăn anôk bruă gĭt gai leh dŭm gưl công đoàn lŏ dơ̆ng mlih mrâo, hŏng klei mbruă, kơ hdră ngă bruă, hluê ngă hŏng lu mta bruă klă klơ̆ng. Anôk bruă ngă leh anăn dôk ngăn, mâo jêñ jêñ klei siêm hriăm leh anăn ba mdah dŭm hdră êlan jăk hĭn čiăng kriê dlăng boh tŭ dưn klă klơ̆ng mơ̆ng phung đoàn viên, mnuih mă bruă, ai dưi yuôm bhăn mơ̆ng yang ƀuôn”.

Amai Nhàn, ti ƀuôn Breng, să Ia Pêt, kdriêk Đăk Đoa, čar Gia Lai ară anei jing khua êpul čuê mrô 4, đang pla mjing mtei Hưng Sơn, să Ia Pêt. Thŭn anei jing thŭn tal 3 amai Nhàn mă bruă tinei. Amai brei thâo, hlăm dŭm hruê knăm, jih jang 800 čô mă bruă dưi mdei, mâo hnư mnơ̆ng amâodah prăk čiăng kơ grăp čô dưi hơ̆k mơak hruê mdei mbĭt hŏng gŏ sang, thŭn anei, amai dưi mdei 2 hruê, amai hŏng gŏ sang mĭn tĭng srăng mkŏ mjing dŭm hruê mdei tŭ dưn:

 “Knơ̆ng bruă uêñ mĭn êdi kơ mnuih mă bruă, mnuih ƀuôn sang hlăm ƀuôn nao mă bruă dưi mâo klei uêñ mĭn, kah mbha, êjai êngoh duam dưi mao klei đru, hmei mâo klei hơĭt êjai mă bruă ti knơ̆ng bruă. Wưng hruê mdei 30/4 leh anăn 1/8, knơ̆ng bruă brei kơ mnuih mă bruă mdei, mâo hnư mnơ̆ng amâodah brei prăk, kyuanăn hmei mâo klei hơĭt mă bruă knuă, đru kơ knơ̆ng bruă đĭ kyar, ba wĭt bruă mă hơĭt kơ mnuih ƀuôn sang, đru kơ mnuih ƀuôn sang mâo prăk hrui wĭt hơĭt, đru bi hrŏ ƀun, kyuanăn hmei srăng hrăm mbĭt, bi mguôp hŏng knơ̆ng bruă, čiăng kơ knơ̆ng bruă ƀrư̆ hruê ƀrư̆ đĭ kyar hĭn.”

Dŭm thŭm giăm anei ti čar Kon Tum, mâo lu mnuih djuê ƀiă jing mnuih Sêdang leh anăn mnuih djuê ana mkăn nao mă bruă ti dŭm sang măi, đang war. Mbĭt hŏng hnư hrui wĭt hơĭt, klei hdĭp gŏ sang dưi đĭ kyar, dưi đru leh kơ mnuih mă bruă jing mnuih djuê ƀiă mâo klei mlih hlăm klei mĭn mă bruă. Ayŏng A Rổi, k’iăng khua êpul mkra mjing mrô 1, knơ̆ng bruă duh mkra mnia blei kphê 704 ti kdriêk Đăk Hà, brei thâo: Êpul mkra mjing mơ̆ng ñu mâo 93 cô mnuih mă bruă jing mnuih Sêdang, ară anei dôk răng kriê êbeh 78 ha kphê pla thŭn tal 5. Klei nao hgŭm mă bră dưi đru leh kơ diñu dưi mlih klei mĭn, bruă ngăn leh anăn boh nik dưi tui hriăm klei kreh knhâo hdră mnêč čiăng dưn yua hlăm bruă pla mjing, rông mnơ̆ng, mđĭ hnư hrui wĭt kơ gŏ sang:

 “Mơ̆ng hruê nao mă bruă ti knơ̆ng bruă duh mkra mnia mblei kphê 704, mâo phung knuă druh nao truh ti ƀuôn sang mtô kơ mnuih ƀuôn sang hdră pla mjing leh anăn kriê dlăng kphê, mơ̆ng anăn hnư hrui wĭt mơ̆ng mnuih ƀuôn sang knư̆ hruê knư̆ đĭ. Thŭn anei, mnuih mă bruă mâo hnư hrui wĭt ƀiă êdi ăt 40 -50 êklăk prăk hlăm sa čô. Mnuih ƀuôn sang ƀuh klă Đảng, knŭk kna uêñ mĭn êdi kơ mnuih ƀuôn sang, mtô kơ mnuih ƀuôn sang hdră duh pla mkra mjing, mđĭ kyar klei hdĭp mda, đru kơ mnuih ƀuôn sang hlăm klei hdĭp, hâo hưn brei mnuih ƀuôn sang bi mguôp, bi khăp, bi đru hdơ̆ng pô hlăm klei hdĭp leh anăn klei mă bruă. Êjai nao mă bruă hlăm knơ̆ng bruă dưi tui hriăm klei kreh knhâo, hdră mnêč mrâo mrang, kyuanăn mnuih mă bruă mâo klei mơak. Lač jăk kơ Đảng, knŭk kna, knơ̆ng bruă uêñ mĭn kơ mnuih ƀuôn sang hlăm ƀuôn mâo bruă mă hơĭt, klei hdĭp mda mlih hlăm grăp hruê”.