Hlăm hdră kdơ̆ng mblah hŏng Prăng lehanăn Mi, să knông lăn Quảng Trực (kdriêk Tuy Đức, čar Dak Nông) jing anôk mkŏ mjing lehanăn mđĭ kyar hdră bruă cách mạng ti krĭng nah Dhŭng Lăn dap kngư. Hŏng knhuah gru hƀuê ênu kdrưh k’ăm, jhŏng ktang hlăm hdră kdơ̆ng mblah, thŭn 2019, să Quảng Trực mâo leh Khua knŭk kna tŭ yap jing krĭng wăl êđăp ênang lehanăn tŭ mă Hră pah mni jing knhuah gru gưl čar. Thị Brao, mnuih mâo k’hưm ti Bon Bu Prăng 1A, să Quảng Trực brei thâo, mnuih djuê ana Mnông tinei ktưn hưn kơ knhuah gru cách mạng kdrưh k’ăm. Mnuih ƀuôn sang gĭr krơ̆ng kjăp, mđĭ lar knhuah gru anăn, wăt bruă duh mkra pla mjing.

 “Mnuih ƀuôn sang hmei ktưn hưn kơ knhuah gru cách mạng kdrưh k’ăm mơ̆ng krĭng lăn jhŏng ktang Quảng Trực anei. Dŭm thŭn êgao hmei mtrŭt mjhar nanao mnuih ƀuôn sang hgŭm mguôp, sa ai, đăo knang hluê Đảng, Knŭk kna čiăng mkŏ mkra ƀuôn sang, ala čar sah mdrŏng. Hmei ăt mtô mtă kơ anak čô thâo kriê kjăp knhuah gru cách mạng kdrưh k’ăm. Ƀri akŏ thŭn mrâo, kâo h’êč hmưi kơ jih jang mnuih ƀuôn sang ti djăp ƀuôn êlan lehanăn mnuih ƀuôn sang hlăm kluôm ala sa thŭn mrâo mâo lu klei tŭ jing, bi hgŭm mguôp kjăp, sa ai mkŏ mkra ƀuôn sang, ala čar đĭ kyar./.

          Mnuih ƀuôn sang dŭm djuê ana ƀiă ti kdriêk Ia Pa, čar Gia Lai ktưn hưn jing krĭng lăn mâo lu knhuah gru cách mạng. Kluôm kdriêk mâo êbeh 11.100 gŏ sang, hlăm brô 57 êbâo čô mnuih, hlăm anăn êbeh 70% jing mnuih ƀuôn sang djuê ƀiă, lu jing mnuih djuê ana Bahnar lehanăn Jarai. Anei jing alŭ wăl mâo lu knhuah gru cách mạng; lu phung êdam êra nao hgŭm lehanăn đĭ kyar mơ̆ng knhuah gru cách mạng, êdei anei jing êpul ngă bruă phŭn mơ̆ng alŭ wăl. Jing phung êdam êra đĭ jing mơ̆ng krĭng lăn knhuah gru, Rô Hôk, ti să Ia Mrơn, kdriêk Ia Pa ktưn hưn brei thâo:

 “Să Ia Mrơn, kdriêk Ia Pa, čar Gia Lai jing krĭng lăn bŏ hŏng knhuah gru cách mạng. Anei jing kđông kahan cách mạng lehanăn mkŏ mjing hdră kdơ̆ng mblah, mtlaih êngiê djuê ana. Leh mâo klei êđăp ênang, hluh lir ala čar, mâo klei mđing dlăng mơ̆ng Đảng, Knŭk kna, mnuih ƀuôn sang tinei hgŭm mguôp, nao hgŭm ngă bruă mđĭ kyar hdră duh mkra, msir klei ư̆ êpa, bi hrŏ klei ƀun knap.

Mơ̆ng anăn, mâo lu gŏ sang đĭ kyar, klei hdĭp dưi mkra mđĭ, bi mlih hlăm grăp hruê hruê. Mbĭt anăn, phung êdam êra hlăm kdriêk jing gru mngač mđĭ lar knhuah gru cách mạng. Hlăm alŭ wăl kdriêk ăt mtô mblang, mtrŭt mjhar mnuih ƀuôn sang hluê ngă kjăp hdră êlan mtrŭn mơ̆ng Đảng, hdră bhiăn mơ̆ng knŭk kna, mđĭ kyar bruă duh mkra, lăm lui klei bhiăn amâo djŏ mơ̆ng đưm, răng mgang wăl hdĭp mda, mtă kơ phung čô anak gĭr hriăm hră, đru mkŏ mkra ƀuôn sang ƀrư̆ hruê ƀrư̆ sah mdrŏng./.