Hlue si klei hâo hưn pral mơ̆ng Knơ̆ng bruă sang čư̆ êa să Yang Mao, gưl adiê hjan sui hlăm dŭm hruê êgao ngă luč liê kjham hlăm kluôm alŭ wăl. Ênoh luč liê tal êlâo đăo tĭng êbeh 40 êklai prăk. Leh hmư̆ klei hưn mdah leh anăn nao ksiêm dlăng ti anôk mâo klei truh kjham, Tạ Anh Tuấn, Khua Knơ̆ng bruă sang čư̆ êa čar Dak Lak lač să Yang Mao lŏ dơ̆ng mâo klei huĭ hyưt hroh lăn kyua hnơ̆ng kma êa leh, čư̆ čhiăng leh anăn lu krĭng duôr čư̆ kla. Ti anôk mâo klei truh, Khua Knơ̆ng bruă sang čư̆ êa čar mtă kơ knŭk kna să mbĕ đuĕ jih mnuih ƀuôn sang hdĭp hlăm krĭng huĭ hyưt, boh nik êbeh 20 gŏ êsei hlăm anôk mâo klei huĭ hyưt. Bruă mbĕ đuĕ brei ngă mtam, amâo mâo guôn êa hrŏ ôh.

K’iăng khua Bruă sang čư̆ êa čar Gia Lai Dương Mah Tiệp mrâo siñê hră mtrŭn mñă kơ dŭm alŭ wăl, knơ̆ng, dhar bruă hlăm čar čŏng ngă dŭm hdră êlan bi mdrơ̆ng hŏng hjan prŏng, êa lêč leh anăn klưh hroh lăn, bi hrŏ jih hnơ̆ng boh jhat mơ̆ng yan adiê ngă. Hlue si asăp mtrŭn, Bruă sang čư̆ êa dŭm să, ƀuôn hgŭm srăng ktuê dlăng kjăp dŭm klei hưn brei răng, klei đăo knăl, klei hưn bi kna knơ̆ng kdơ̆ng êa, klei êa lip lêč, klưh hroh lăn leh anăn hmao hưn hŏng Bruă sang čư̆ êa alŭ wăl, mnuih ƀuôn sang mâo klei răng. Dŭm alŭ wăl čŏng mbĕ đuĕ mnuih ƀuôn sang mơ̆ng dŭm anôk hŭi hyưt, mprăp djăp mnơ̆ng ƀơ̆ng huă, mnơ̆ng yua ti dŭm anôk mbĕ đuê̆, boh nik anôk mâo klei arưp aram klưh hroh leh anăn êngăp êlam. Êpul ngă bruă, êdeh êdâo, kdrăp yua dưi dăp hŏng hdră 4 sa anôk čiăng bi mdrơ̆ng hŏng klei hjan sui, boh nik ti dŭm alŭ wăl dôk ktlah hjăn.

 Adiê hjan dua hruê êgao ti Khánh Hòa ngă kơ 8 čô djiê, 2 čô luč ka thâo ƀuh, 19 čô êka; êbeh 7.000ha ha leh anăn djam tam êngăp êlam; lu hdră bruă jhat rai. Hlăm klei bi kƀĭn mjêč gĭt gai bruă msir klei adiê hjan êa lip, Khua Bruă Đảng čar Khánh Hòa Nghiêm Xuân Thành mtă kơ Knơ̆ng bruă mdrao mgŭn tiŏ nao phung aê mdrao, kdrăp mdrao mgŭn amâo mă prăk kơ phung tuôm hŏng klei truh, yua prăk knŭk kna đru kơ mnuih ƀuôn sang hnưm hơĭt klei hdĭp mda.

Nghiêm Xuân Thành mñă klă mgaih mkra êlan tơdah mâo klei êđăp ênang; êpul đru dŏng brei bi hgŭm kjăp, rơ̆ng êđăp ênang hlăm klei ksiêm duah. Dŭm alŭ wăl  huĭ mâo klei truh brei mprăp ênŭm kdrăp mnơ̆ng đru dŏng, yua klei mlih mrô hưn brei răng leh anăn mdrơ̆ng hŏng adiê hjan êa lip.