Ti anăp boh klei adiê hjan êa lip ka tuôm mâo ngă êngăp êlam leh anăn bi ktlah hjăn hlăm ênhă prŏng ti krĭng nah Ngŏ čar, aguah 20-11, Dak Lak mâo leh hră iêô mthưr jih jang phung knuă druh, đảng viên, mnuih ƀuôn sang leh anăn êpul êya anôk bruă duh mkra hrăm mbĭt đru kơ mnuih ƀuôn sang krĭng êa lip. Hlăm klei bi kƀĭn Anôk bruă gĭt gai gang mkhư̆ kơ mnuih ƀuôn sang aguah 20/11, Khua dlăng bruă Đảng čar Lương Nguyễn Minh Triết mtă brei ba nao jih hnơ̆ng êpul, kdrăp mnơ̆ng đru mnuih, nao ti krĭng bi ktlah hjăn, mđing ba mran điêt ba mnơ̆ng bbơ̆ng hlăm dŭm alŭ wăl Tây Hòa, Phú Hòa, Đông Hòa. Êpul kahan lĭng kahan 5 ba nao leh êbeh 100 boh mran keh anăn mbŏ thiăm mơ̆ng lu êlan, Êpul kahan 6 ksiêm dlăng leh tač êdeh phiơr Tuy Hòa čiăng rơ̆ng klei găl drông êdeh phiơr dăk wăk đru phưi mnơ̆ng đru dŏng.

Hjan prŏng mơ̆ng mlam hruê 15 truh kơ yang hruê dơ̆ng mbruê ngă truh klei êa lêč hƀuê ênuk ti krông Ba, Kỳ Lộ, Bàn Thạch leh anăn ngă kơ êa krông Sêrêpôk đĭ pral, ngă êngăp êlam leh anăn bi kltah hjăn ti alŭ wăl Ngŏ Dak Lak. Kluôm čar mâo 33.630 boh sang êa êngăp, êbeh 11.500 gŏ sang ktlah hjăn, 11.242 gŏ sang mbĕ đuê̆ mjêč. Lĭng kahan knông lăn, kahan ksiêm mbĭt mbĭt hŏng lĭng kahan alŭ wăl 5, kahan êa dôk pŏk mlar klei đru dŏng, mkŏ mjing anôk găk răng ti dŭm anôk hŭi hyưt. Bruă sang čư̆ êa čar đru mjêč 30 êklai prăk kơ 60 ƀuôn hgŭm čiăng ngă hdră êlan bi mdrơ̆ng.

Aguah 20/11, Knơ̆ng bruă sang čư̆ êa čar Gia Lai bi kƀĭn mjêč kơ boh klei êa lip êngăp êlam ti krĭng nah Ngŏ. Ară anei hlăm brô 20.000 gŏ êsei mnuih ƀuôn sang hmăi, giăm 11 êbâo gưl čô mnĕ đuĕ mjêč. Êpul kahan ksiêm leh anăn êpul đru dŏng ba nao leh êbeh 5000 čô knuă druh, lĭng kahan, 15 boh mran, 43 boh čŏng hŏng masin leh anăn dŭm êtuh kdrăp mnơ̆ng đru mbĕ đuĕ, đru dŏng, rơ̆ng klei êđăp ênang. Lu sang hră nah Ngŏ brei hđeh sang hră mdei êjai leh anăn yua sang hră jing anôk dôk êjai kơ mnuih ƀuôn sang mƀĕ đuĕ.

Hruê mbruê 20/11, čar Khánh Hoà tiŏ nao kŭm păn, mran mdiăng tuê hiu čhưn ênguê mơ̆ng mnuih ƀuôn sang čiăng nao đru kơ dŭm alŭ wăl dôk ktlah hjăn kyua êngăp êlam. Êpul bruă djŏ tuôm mbha jing lu êpul nao ti dŭm anôk phŭn, mbĭt anăn dŭ ba mnơ̆ng ƀơ̆ng, êa mnăm, ao mlut kơ grăp gŏ sang. Khua Bruă sang čư̆ êa čar Trần Phong mñă kơ knơ̆ng bruă tuh tia hnưm iêo mkrum ƀung hdang krô ti dŭm sang mnia prŏng čiăng ba mbha, mbĭt anăn tiŏ nao jih hnơ̆ng kŭm păn, mran mnuih ƀuôn sang čiăng nao truh dŭm anôk êngăp êlam.