Kơiăng khua knŭk kna mtă kơ êpul djŏ tuôm hŏng ya hdră ngă, brei mbĕ mtam jih jang mnuih ƀuôn sang ti alŭ 1,2 lehanăn 3 truh kơ anôk êđăp ênang; pral mprăp kdrăp mnơ̆ng tơdah adiê hjan êa lip lŏ mâo dleh dưi ksiêm dlăng. Ñu mñă klă. Amâo dưi lui mnuih ƀuôn sang klah hjăn tơdah êa đĭ pral; mbĭt anăn mtă kơ alŭ wăl ba yua thiăm ca nô, hô̆ mran đru dŏng.

Ti anăp klei đăo knăl adiê hjan prŏng srăng lŏ mâo dleh dưi ksiêm dlăng ti Khánh Hòa, Dak Lak lehanăn Gia Lai, kơiăng khua knŭk kna brei thâo, gưl dlông mtă leh kơ dŭm alŭ wăl mprăp hdră mdrơ̆ng, rơ̆ng klei êdăp ênang kơ mnuih ƀuôn sang, mbĭt anăn gĭt gai Kahan krĭng 5 nao đru mnơ̆ng ƀơ̆ng./.

Truh yang hrue dơ̆ng mbrue (19/11), hjăn ăt dôk prŏng hlăm kwar krah, lehanăn lăn dap kngư ngă leh truh 15 čô mnuih djiê lehanăn luič. Klei êa lip lêč dôk ti hnơ̆ng huĭ hyưt. Dŭm boh čar Gia Lai lehanăn Daklak mâo hjan prŏn hĭn, mâo leh truh 660mm. Ba klei luič liê prŏng êdi kơ pưk sang hŏng êbeh 20.400 boh sang êngăp êa, lu jing ti Gia Lai lehanăn Khánh Hòa. Hlăk dôk mâo bruă mdrơ̆ng hŏng klei êa lip. Truh ară anei, hŏng ênoh 5.634 gŏ sang, hŏng giăm 16.000 čô mnuih mbĕ đuĕ kơ anôk êđăp ênang. Anôk bruă djŏ tuôm mtrŭn leh asăp răng mjêč êa lip prŏng mơ̆ng hnoh Krông Pa ti Daklak, lehanăn hnoh krông Kôn ti Gia Lai, hŏng hnơ̆ng êa dôk đĭ ară anei ti hnơ̆ng răng mjêč mrô 3. Tĭng knăl truh kơ mlam hrue 20/11, alŭ wăl mơ̆ng Đà Nẵng truh kơ Khánh Hòa lehanăn lăn dap kngư ăt adôk hjan prŏng mâo anôk êbeh 400mm. Jih jang mnuih brei mâo klei răng, lehanăn hlue ngă djŏ hŏng klei bruă sang čư̆ êa ktrâo atăt./.

  Krĭng nah Ngŏ čar Dak Lak mâo adiê hjan prŏng mơ̆ng hruê 15 truh kơ hruê 19/11 kyua hmăi mơ̆ng angĭn nah Ngŏ. Ară anei, 34 să, ƀuôn hgŭm ti nah Ngŏ mbĭt hŏng să krĭng tlung mâo Mdrak, Krông Bông, Êa Sup, Krông Ana.. dôk êngăp êlam mơ̆ng 1 – 1,5 m, bi ktlah lu anôk. Êbeh 1.000 ha mnơ̆ng pla êngăp êa, êbeh 300 drei mnơ̆ng rông lehanăn hlăm brô 5.000 drei mnŭ da êa kpuh đung; dŭm ktuê êlan êngăp êa, klưh lăn, jhat rai.

Bruă knŭk kna alŭ wăl mbĕ leh mnuih ƀuôn sang mơ̆ng krĭng huĭ klưh hroh, êa kluh. Aguah 19/11, ti ƀuôn hgŭm Sông Cầu, mâo sa klei klưh hroh čư̆ ngă săr dơr sang lehanăn ngă amai V.T.U, 33 thŭn, Khua bruă đoàn alŭ Dân Phú 2, djiê. Dŭm êpul đru dŏng dôk ksiêm dlăng klei mâo lehanăn pŏk ngă dŭm hdră đru dŏng ti dŭm krĭng huĭ hyưt, đru ba mnuih mâo klei truh, djiê êka ti krĭng Sông Cầu đuê̆ mơ̆ng anôk klưh hroh.

Hjan prŏng sui lehanăn êa lip hlăm lu anôk, tơl 38 boh sang hră lehanăn êbeh 26.000 čô hđeh hriăm hră ti Gia Lai mdei, čiăng mâo klei êđăp ênang. Êlâo ană, hlăm klei bi kƀĭn online hŏng dŭm knơ̆ng dhar bruă lehanăn  135 boh ƀuôn hgŭm tui duah hdră mdrơ̆ng bi kjăp hŏng klei hjan prŏng êa lip lêč.

K’iăng khua knơ̆ng bruă sang čư̆ êa čar Nguyễn Tuấn Thanh mtă kơ bruă sang hră mơar ktuê mđing hŏng yan adiê mâo hdră brei phung hđeh mdei. Leh kơ anăn knơ̆ng bruă sang hră mơar čar Gia Lai mâo hră mtrŭn truh kơ êpul bruă djŏ tuôm, mâo hdră mghaih msir hŏng klei êa lip lêč. Dŭm boh sang hră mđing kơ klei hlĭm hjan mâo hdră đru kơ hđeh hriăm hră thâo răng bi ñĕ đuĕ./.