VOV4.Êđê- Leh 4 thŭn hluê ngă Klei bi mklă 522 thŭn 2018 mơ̆ng Khua knŭk kna, Hdră Mtô bi hriăm bruă lehanăn tă hdră mbha phung hđeh leh hriăm gưl dua mâo leh klei bi mlih jăk, đru mđĭ boh tŭ bruă mjuăt bi hriăm mơ̆ng dŭm sang hră mtô bruă lehanăn mđĭ hnơ̆ng thâo phung hđeh mŭt hriăm gưl 3. Khă snăn, bruă kƀah adŭ mtô bruă ăt ngă kơ klei mbha phung hđeh ti dŭm alŭ wăl hlăm krĭng Lăn dap kngư ngă amâo djŏ wưng kčah.

Thŭn anei, ênoh hđeh sang hră hriăm ruê̆ gưl 2 ti Dak Nông čih anăn hriăm ti Sang hră Êpul êya Dak Nông lu hĭn đar thŭn. Hjăn hlăm gưl 1 mâo giăm 300 čô hđeh leh anăn gưl 2 mĭn tĭng srăng ruah êbeh 100 čô dơ̆ng. Nguyễn Hưũ Lành, Khua sang hră brei thâo, hlue ngă klei mbha hlue si hdră mtrŭn 522 thŭn 2018 mơ̆ng Khua knŭk kna đru kơ sang hră čoh čuăn êlâo ênoh hđeh sang hră dưi ruah leh anăn mâo hdră kčah hrŏng ruah, mprăp kdrăp mnơ̆ng leh anăn êpul nai mtô djŏ guôp, rơ̆ng mtô bi hriăm bruă tŭ dưn mbĭt hŏng dŭm hdră mtô bi hriăm, đru hđeh sang hră mâo lu klei ruah mta čiăng hriăm. Nguyễn Hữu Lành brei thâo:

Hriê tinei phung hđeh lu jing hriăm bruă. Khădah snăn, phung hđeh ăt dưi ruah hdră mtô bi hriăm nanao amâodah hriăm hră hriăm bruă. Tơdah hriăm nanao, phung hđeh ăt dưi bi lông ruê̆ gưl hriăm mơh. Bi hriăm hră hŏng bruă snăn phung hđeh mâo klei găl hriăm gưl krah. Jing hriăm 2 thŭn, hŏng hriăm bruă jing 2 thŭn mkrah snăn phung hđeh dưi hriăm gưl krah.

Ăt mâo ênoh hđeh sang hră gưl dua đĭ ktang, thŭn anei čar Dak Lak hlue ngă mbha gưn hŏng êbeh 5 êbâo čô hđeh. Hlăm anăn, 16 anôk bruă sang hră mtô bi hriăm leh anăn mtô nanao ti gưl čar mâo 4.934 čô. Hlue si Hà Ngọc Hướng, Khua Anôk mtô bi hriăm nanao leh anăn mtô bi hriăm bruă kdriêk Ƀuôn Đon, mbha hđeh sang hră ară anei mphŭn hgao klei dleh dlan kơ klei mĭn mơ̆ng hđeh sang hră leh anăn amĭ ama hđeh. Ti dŭm anôk bruă mtô bi hriăm nanao leh anăn mtô bruă knuă, phung hđeh dưi kƀĭn hriăm hră, hriăm bruă, prak thâo bruă čiăng dưi nao mă bruă, mdul ƀiă klei dleh dlan kơ gŏ sang:

Msĕ si grăp thŭn, ăt phung anăn mơh, nao hriăm gưl 3, hriăm truh dŭm mta snăn amâo lŏ dưi hriăm ôh. Ară anei hriê ti nei snăn hriăm 7 mta klei hriăm đuič, tal dua bi hriăm ƀhĭ klĭ hĭn anăn phung hđeh hriăm jăk hĭn. Êngao anăn, hriăm êjai, mă bruă êjai hđeh dưi đru mdul klei bi liê hlăm klei hdĭp.

Giăm 300 čô hđeh sang hră mbha hnơ̆ng čih anăn hriăm ti Sang hră gưl krah êpul êya Dak Nông thŭn hriăm 2022-2023.

 Mbha gưl hđeh sang hră leh gưl 2 brei ƀuh klei tŭ dưn klă sĭt hŏng jih jang phung hđeh leh anăn dŭm sang hră mtô bruă leh anăn mtô nanao, ƀiădah thŭn 2022-2023, thŭn tal 4 hlue ngă hdră mtrŭn 522/2018 mơ̆ng Khua knŭk kna, ti Lăn Dap Kngư mrâo mâo čar Lâm Đồng mbha êbeh 25% ênoh hđeh sang hră hriăm ruê̆ gưl 2, adôk knŏng mơ̆ng 10% truh êbeh 20%. Mta phŭn jing kyua kƀah sang hră, adŭ hriăm, kƀah mđrăm mbĭt plah wah hriăm bruă leh anăn hriăm hră. Msĕ si čar Dak Nông, mâo anôk bruă mtô bi hriăm nanao gưl kdriêk knŏng bi hriăm bruă amâo mâo ôh hdră bi hriăm hră. Hlue si Nguyễn Văn Toàn, Khua Knơ̆ng bruă sang hră mtô bi hriăm Dak Nông, kyua mta phŭn anei, Hdră kčah mbha 2000 čô hđeh sang hră hlăm thŭn anei, knŏng dưi hlue ngă mkrah wah:

Ti krĭng dleh dlan snăn mbha hđeh sang hră amâo dưi hriăm bruă ôh, kyua dŭm anôk bruă mtô bruă mâo klei kƀah. Kyua anăn, knơ̆ng bruă kčĕ kơ Knơ̆ng bruă sang čư̆ êa čar mbŏ hnơ̆ng čuăn čiăng ruah hđeh sang hră ti dŭm krĭng dleh dlan êdi. Bi hŏng krĭng găl ênưih snăn knơ̆ng bruă ăt gĭt gai djŏ hlue si hnơ̆ng čuăn, knŏng adôk 900 čô hđeh sang hră đuič.

 Êmưt mbha hnơ̆ng ăt jing boh sĭt ti čar Dak Lak, Hlue si Phạm Đăng Khoa, Khua Knơ̆ng bruă sang hră mtô bi hriăm Dak Lak, knơ̆ng bruă dôk gĭr mđĭ pral hnơ̆ng, boh nik mơ̆ng thŭn hriăm 2023-2024:

Mbha hnơ̆ng jing sa hlăm dŭm klei êdu kƀah mơ̆ng bruă sang hră Dak Lak. Msĕ si đar thŭn snăn hmei ba êbeh 80% hđeh sang hră hriăm ruê̆ gưl 2 hriăm adŭ 10, snăn thŭn hriăm 2022-2023 hmei bi hrŏ adôk ti gŭ 80%. Thŭn kơ anăp srăng hrŏ knŏng adôk 75%. 25% adôk srăng nao hriăm bruă. Leh anăn snăn dưi rơ̆ng hdră mbha hnơ̆ng mơ̆ng Knŭk kna.

 Mbha hnơ̆ng hđeh sang hră leh hriăm gưl 1 jing boh phŭn prŏng hlăm Hdră bruă “Mtô bi hriăm tă hdră bruă mă leh anăn tă hdră mbha hnơ̆ng hđeh sang hră hlăm gưl 2,3 wưng 2018 - 2025”, dưi bi mklă mơ̆ng Hdră mtrŭn 522/QĐ-TTg hruê 14/5/2018 mơ̆ng Khua Knŭk kna. Hlue si hdră anei, truh thŭn 2025, dŭm alŭ wăl brei mbha ƀiă êdi 40% čô hđeh hriăm jih gưl 2, hŏng krĭng dleh dlan êdi, ênoh mnha ƀiă êdi 30%. Khădah snăn, bruă kƀah sang hră adŭ hriăm, kƀah klei sa hnơ̆ng plah wah mtô - hriăm dhar kreh leh anăn hriăm bruă hlăm lu alŭ wăl gưl kdriêk ti Lăn Dap Kngư dôk jing klei bi kgăn prŏng hŏng hdră kñăm mơ̆ng hdră bruă.

Pô mblang: H’Zawut Ƀuôn Yă