Mđĭ lar knhuah gru hgŭm mguôp, hŏng ai tiê đru thâo bi đru, čung ba, bruă Đảng čar Dak Nông mtrŭt mjhar leh hdră đru kơ mnuih ƀuôn sang luič liê kyua angĭn êbŭ mrô 3 ngă. Leh knăm mtrŭt mjhar, Anôk bruă mặt trận čar Dak Nông bi mklă đru leh 1 êklai prăk. Bruă Đảng čar Dak Nông iêu mthưr jih jang mnuih ƀuôn sang hlăm čar hgŭm kngan, ai tiê, hlei mâo lu đru lu, mâo ƀiă đru ƀiă, čiăng hrăm mbĭt đru kơ mnuih ƀuôn sang hmăi mơ̆ng angĭn êbŭ mrô 3 hgao klei dleh dlan, msir mghaih klei luič liê leh gưl angĭn êbŭ. Bruă Đảng čar Dak Nông jao kơ Anôk bruă mặt trận čar ngă kdrông mkŏ, tŭ mă klei đru kơ mnuih ƀuôn sang rơ̆ng boh tŭ dưn mơ̆ng bruă anei. Trần Minh Quân, Kơiăng khua Anôk bruă Mặt trận čar Dak Nông brei thâo, êlâo hĭn, čar bi mklă đru 1 êklai prăk.

 “Khădah jing čar dleh dlan, ƀiădah mđĭ lar knhuah gru bi hgŭm mguôp djuê ana, thâo bi đru, bi čung ba, mâo klei gĭt gai mơ̆ng Anôk bruă Đảng čar snăn Anôk bruă mặt trận čar iêu mthưr, mtrŭt mjhar jih jang mnuih ƀuôn sang ti alŭ wăl čar bi đru brei. Mnuih mâo lu đru mguôp lu hĭn, mâo ƀiă đru mguôp ƀiă, brei drei thâo mkiêt mkriêm čiăng đru kơ mnuih ƀuôn sang kwar Dưr hmăi mơ̆ng klei yan adiê ngă, klei êa lip lêč…”

Sa hdră mâo klei mđing mơ̆ng lu mnuih ƀuôn sang Ƀuôn Ama Thuôt, čar Dak Lak, anăn jing mkŏ mjing dŭm “Gưl êdeh 0 prăk” mdiăng ba mnơ̆ng đru kơ mnuih ƀuôn sang hmăi mơ̆ng klei êa lip kwar Dưr. Ayŏng Bùi Xuân Phong, pô sang êdeh Phong Thương, êran ktuê êlan Thái Bình - Ƀuôn Ama Thuôt brei thâo “Gưl êdeh 0 prăk” kñăm đru mdiăng ba jih jang mnơ̆ng đru mguôp truh ti čar Thái Nguyên, Lào Cai, Yên Bái … čiăng đru kơ mnuih ƀuôn sang.

 “Mâo lu êdeh dôk guôn ti tač, hŏng ai tiê jing 3h tlam hruê 14/9 êpul srăng êran truh kơ dŭm čar nah Dưr. Ti êdeh bŏ mnơ̆ng êlâo srăng êran êlâo yơh. Kâo mơak kyua hlăm brô 8h mmăt mtrŭt mjhar hdră anei snăn truh kơ aguah mnuih ƀuôn sang Dak Lak nao đru lu. Êlâo hĭn, kâo lač jăk kơ jih jang mnuih ƀuôn sang drei.

       Lu mnuih ƀuôn sang nao đru, mơ̆ng phung hđeh hriăm hră, mnuih mă bruă, lĭng kahan truh kơ phung mduôn khua. Mduôn Trần Thị Cảnh, 81 thŭn, ti ƀuôn prŏng Bà Rịa, čar Bà Rịa – Vũng Tàu, brei thâo: Ñu hriê ti Dak Lak čuă anak mniê. Leh hmư̆ hdră anei ñu brei leh phung anak čô nao blei ƀung hdang krô đru kơ mnuih ƀuôn sang krĭng êa lip.

 “Ênguôt, ruă ai tiê êdi, amâo thâo bĭt mjing, pô mduôn leh mơh. Ƀuh hlăm hla pŏk web yang ƀuôn hưn mthâo kơ hdră anei, kyua anăn kâo đru mguôp mtam čiăng đru ƀiă mnơ̆ng kơ mnuih ƀuôn sang”.

Hdră đru kơ mnuih ƀuôn sang krĭng êa lip kwar Dưr amâo mâo uêñ hruê mlam. Hnêč adiê mmăt, êpul mnuih ăt kluh nao phă wăl tač prŏng 10/3, ƀuôn prŏng Ƀuôn Ama Thuôt, čar Dak Lak čiăng đru mguôp ƀung hdang krô, êa mnăm, ƀêñ, braih, čhum ao, ao mlut, êa ksâo čiăng ba kơ êdeh “Gưl êdeh 0 prăk” mơĭt truh kơ mnuih ƀuôn sang kwar Dưr dôk hmăi kjham kyua angĭn êbŭ Yagi. Mbĭt hŏng ung lehanăn anak điêt mdiăng čhum ao ba ti anôk bi mklin, amai Lê Thị Bảo Hiên, ƀuôn hgŭm Tân Lợi, ƀuôn prŏng Ƀuôn Ama Thuôt brei thâo:

 “Kâo ƀuh mnuih ƀuôn sang ti Ƀuôn Ama Thuôt hưn, aguah anei nao mă bruă kâo thâo, snăn wĭt tlam kâo hnêč klăp čhum ao ba nao. Tian êpa ka huă ƀơ̆ng mơh. Kâo čiăng mơĭt klei khăp mơ̆ng mnuih Ƀuôn Ama Thuôt truh hŏng mnuih ƀuôn sang kwar Dưr. Čang hmăng mnuih ƀuôn sang dưi êđăp ênang”.

Hŏng hdră “Hlei mâo ai tiê đru ai tiê, hlei mâo mnơ̆ng mnuă đru mnơ̆ng mnuă”, bruă dŭ mnơ̆ng dưm hlăm êdeh prŏng dưi ngă hŏng klei khuăt, pral. Sut êa k’hŏ, mnăm sa kčok êa, ayŏng Nguyễn Văn Cơ ti ƀuôn hgŭm Tân Lợi, ƀuôn prŏng Ƀuôn Ama Thuôt brei thâo:

 “Kâo dlăng hlăm facebook arăng čiăng kơ phung ayŏng adei đru pŭ ba mnơ̆ng djŏ mmông kâo hriê tinei mơh, snăn kâo hlŏng đru mbĭt. Mâo leh mơh 3h, dŭm ayŏng adei pŭ mnơ̆ng dưm hlăm dŭm boh êdeh leh mơh. Ƀuh ênguôt, pap êdi kơ ayŏng adei ti kwar Dưr, ya bruă pô dưi ngă snăn pô ngă yơh”.

Knŏng hlăm sa mlam, mnuih ti Dak Lak đru mguôp leh mnơ̆ng bŏ 5 boh êdeh prŏng, kah knar grăp boh êdeh mâo giăm 20 ton mnơ̆ng čiăng ba truh kơ mnuih ƀuôn sang ti dŭm čar kwar Dưr dôk hmăi mơ̆ng gưl êa lip lêč./.

- Hoạt động quyên góp không kể ngày đêm.