VOV4.Êđê- Mbĭt hŏng kluôm ala, hrue 5/9 mbrue, jih jang dŭm boh čar Lăn Dap kngư mjhĭt m’uăt mơak mñai pŏk thŭn hriăm mrâo, djăp alŭ wăl mghaih msir klei dleh dlan, ciăng bi mâo djăp mnơ̆ng mnuă yua, lehanăn bi hơĭt bruă mtô bi hriăm mơ̆ng akŏ thŭn hriăm mtam.

Ti Daknông, êbeh 184 êbâo čô hđeh hriăm hră djăp gưl nao kơ sang hră, kčưm hriăm thŭn hriăm mrâo 2022 – 2023. Thŭn hriăm anei, kluôm čar Daknông mâo 368 boh sang hră, hŏng 184 êbâo 135 čô hđeh hriămhră, đĭ 8 êbâo 508 čô hđeh mkă hŏng thŭn dih. Mprăp kơ thŭn hriăm mrâo, jih jang prăk Daknông mâo duh bi liê leh truh giăm 330 êklai prăk, mdơ̆ng mrâo, mkra wĭt, blei mprăp mnơ̆ng mnuă yua kơ sang hră. Sang hră ăt duh hdruôm hră hriăm kơ hđeh mnuih djuê ƀiă, blei mprăp kdrăp yua kơ hdra mtô bi hriăm mrâo, kdrăp yua hlăm klei hriăm online hŏng ênoh êbeh 67 êklai prăk. Thŭn hriăm anei, khădah mâo lŏ iêo ruah leh truh 115 čô nai mtô mrâo, ƀiădah hlăm kluôm čar ăt adôk kƀah hlăm brô 966 čô nai mtô hlăm djăp gưl. Djăp alŭ wăl lŏ mkŏ wĭt bruă knuă mă kơ phung nai, bi hriăm mbŏ klei thâo kơ phung nai pioh mtô bi hriăm klei hriăm mjuăt asei lehanăn công nghệ. Dŭm boh sang hră đru kơ phung nai mâo leh klei thâo klei ăngle lŏ dơ̆ng hriăm mbŏ mtô bi hriăm klei angle, tin học ti gưl sa.

Ti čar Dak Lak, dŭm boh sang hră mđrăm mbĭt mkŏ mjing Knăm mphŭn pŏk thŭn hriăm mrâo 2022-2023. Thŭn hriăm anei, kluôm čar mâo êbeh 455 êbâo čô hđeh sang hră dŭm gưl, hlăm anăn hđeh sang hră mnuih djuê ƀiă mâo êbeh 56%. Hlue si Phạm Đăng Khoa,  Khua Knơ̆ng bruă sang hră mtô bi hriăm Dak Lak, thŭn hriăm anei kluôm čar mâo êbeh 1000 boh sang hră, hŏng êbeh 450 êbâo čô hđeh hlăm dŭm gưl hriăm. Knăm mphŭn pŏk thŭn hriăm mrâo 2022-2023, ti dŭm sang hră mơ̆ng krĭng wăl krah truh ti dŭm krĭng taih kbưi, krĭng mnuih djuê ƀiă mkŏ mjing khuăt, yuôm bhăn leh anăn mjing ai êwa hơ̆k mơak kơ phung nai leh anăn hđeh sang hră čar Dak Lak hlăm thŭn hriăm mrâo.

 Hlăm knăm mphŭn pŏk thŭn hriăm mrâo 2022-2023 ti sang hră gưl 3 knŭk kna rông ba Nơ Trang Lơng, ƀuôn prŏng Ƀuôn Ama Thuôt, čar Dak Lak, Bùi Xuân Lễ, khua sang hră brei thâo: Hŏng bruă klam phŭn jing mđĭ hnơ̆ng jăk mtô bi hriăm, nai leh anăn hđeh sang hră knŭk kna rông ba Nơ Trang Lơng lŏ dơ̆ng mđĭ ktang mkra mđĭ hdră mtô bi hriăm leh anăn hriăm.

17 êbâo 500 čô hđeh hriăm hră ti kdriêk knông lăn Êa Sup čar Daklak mŭt hlăm thŭn hriăm mrâo hŏng ai êwa mơak mñai, hŏng adiê jăk siam hrue pŏk thŭn hriăm mrâo. Amâo mâo djŏ hŏng msĕ si thŭn êlâo ôh kyua klei ruă tưp Covid 19, hđeh hriăm hra pŏk thŭn hriăm mrâo hŏng online, thŭn anei nai lehanăn hđeh hriăm hră pŏk thŭn hriăm mrâo ti sang hră mtam, hŏng klei mơak mñai. Čiăng mprăp kơ thŭn hriăm mrâo kdsriêk Êa Sup bi leh êbeh 5 êklai 200 êklăk prăk pioh ruh mkra sang hră mơar, blei mprăp mnơ̆ng mnuă yua. Êbeh 1 êbâo 200 čô nai mtô mâo mjuăt bi hriăm mđĭ klei thâo pô rơ̆ng hlăm bruă mtô mjuăt hŏng klei jăk.

Thŭn hriăm mrâo 2022-2023, čar Lâm Đồng mâo êbeh 330 êbâo čô hđeh sang hră dŭm gưl. Čiăng rơ̆ng kơ hdră mtô leh anăn hriăm mâo klei tŭ dưn jăk, bruă sang hră čar Lâm Đồng bi leh bruă bi hriăm kơ phung nai mtô hlue si hdră bi hriăm mrâo kơ hđeh adŭ 3,5 leh anăn 10. Mơ̆ng prăk bi liê knŭk kna 600 êklai prăk mâo čar mbha, bruă sang hră čar Lâm Đồng mjêč mphŭn rŭ mdơ̆ng 2 hdră bruă mrâo, dưi hlue ngă 26 hdră bruă lŏ mkra leh anăn 24 hdră bi leh.  Boh nik hmao bi leh 19 sang hră hŏng ênoh 35 êklai prăk, bi liê 120 êklai prăk blei kdrăp mnơ̆ng mtô bi hriăm, rơ̆ng klei găl kơ hdră mtô leh anăn hriăm hlăm thŭn hriăm mrâo, wăt dŭm sang hră ti krĭng taih kbưi, krĭng mnuih djuê ƀiă. Êngao kơ rơ̆ng dŭm klei găl mtô leh anăn hriăm, bruă sang hră čar Lâm Đồng ăt dôk gĭr bi hgŭm hŏng bruă mdrao mgŭn alŭ wăl mđĭ pral hnơ̆ng tlŏ vaccin Covid-19 kơ hđeh sang hră hlue si hdră kčah.

thŭn hriăm 2022 – 2023, čar Gia Lai mâo 762 boh sang hră mơar hŏng êbeh 400 êbâo čô hđeh hriăm hră hlăm djăp gưl. Knăm pŏk thŭn hriăm mrâo mâo mkŏ mjing hŏng klei khuăt, pral mbĭt hŏng djăp bruă dhar kreh mjing leh ai êwa mơak mñai kơ hrue mơak nao sang hră mơar, leh sa thŭn găn klei dleh dlan kyua klei ruă tưp Covid 19./.

Pô mblang: Y-Khem Niê