Knăm mơak kphê Ƀuôn Ama Thuôt tal 8 ăt jing sa klei kruak knăl hlăm thŭn 2023. Hŏng akŏ jing “Ƀuôn Ama Thuôt – Anôk truh hŏng kphê tar rŏng lăn” knăm mơak anei mâo leh klei tŭ jing mâo kruak pioh leh hlăm ai tiê mnuih ƀuôn sang lehanăn tue hriê čhưn. Knăm mơak anei mâo 5 klei čiăng hưn mdah: Lŏ dơ̆ng čuê, jing anôk truh; ñŭ kma, mâo klei lar bra, lehanăn bi hgŭm prŏng hŏng klei êpa mhao, kñăm mđĭ k’hưm kphê Ƀuôn Ama Thuôt; hưn mdah dhar kreh kphê Ƀuôn Ama Thuôt truh hŏng mah jiăng ala tač êngao.

Hlăm knăm anei lŏ dơ̆ng mâo klei trông čhai bruă duh mkra mnia mblei hŏng ala tač êngao thŭn 2023 mâo klei bi mguôp mơ̆ng êbeh 464 pô bi ala, hlăm anăn mâo truh 86 čô phung bi ala mơ̆ng dŭm êpul bruă mơ̆ng ala tač êngao, jing dŭm anôk bruă bi ala knŭk kna mơ̆ng dŭm lăn čar ti Việt Nam. Bi ruĕ klei bi kƀĭn mâo 10 hlâo hră mơar čih pioh hgŭm bruă, mâo kuôl kă leh plah wah dŭm phung duh mkra mnia mblei hŏng ala tač êngao, lehanăn phung blei mnia hriê mơ̆ng China, Dhŭng Korea, lehanăn phung duh mkra mnia mblei Việt Nam.

Djŏ tuôm hŏng bruă mkŏ klei mnia mblei, hlăm thŭn 2023, dŭm čar krĭng Lăn Dăp Kngư mâo leh lu klei gĭr leh anăn ba wĭt boh tŭ dưn. Khua gĭt gai čar Lâm Đồng nao hgŭm, mkŏ mjing hdră mkŏ klei mnia mblei hŏng lu čar ƀuôn prŏng hlăm lăn čar, mtrŭt mđĭ klei bi mguôp hlăm dŭm mta bruă hŏng Japon, Dhŭng Korea, India.

Boh tŭ klă klơ̆ng, knhal jih thŭn 2023, gưl phiơr mơ̆ng knơ̆ng bruă êdeh phiơr JeJu Air mơ̆ng tač êdeh phiơr Incheon (Seoul), phiơr kpă truh kơ tač êdeh phiơr Liên Khương (čar Lâm Đồng) bi klă kơ klei kčưm jăk siam, mđĭ hĭn klei bi mguôp kjăk plah wah bruă sang čư êa čar Lâm Đồng hŏng ƀuôn prŏng phŭn Seoul leh anăn hŏng dŭm čar, ƀuôn prŏng ti Dhŭng Korea, bi hrŏ boh taih plah wah 2 alŭ wăl, mkŏ mjing klei găl kơ mnuih ƀuôn sang leh anăn phung tuê nao čuă dlăng, hriăm hră mơar leh anăn čar Lâm Đồng ăt hmăng hmưi mkŏ mjing boh kdrŭt mrâo hlăm klei iêo mthưr duh bi liê, mđĭ kyar bruă duh mkra ala ƀuôn.