VOV4.Êđê - Hlăm dŭm hrue anei, mbĭt hŏng kluôm ala, hlăm djăp boh ƀuôn ti Lăn Dap Kngư mâo leh lu bruă ngă bi hdơr 77 thŭn hrue kgŭ krŭ kdơ̆ng mlan 8, lehanăn hrue mkŏ mjing lăn čar 2/9. Mơak hŏng dŭm boh tŭ ưn êdah êdi mơ̆ng lăn čar, phung ƀuôn sang Lăn Dap Kngư ktang hĭn hdơr kơ Awa Hô. Y-Krưč Ayŭn ti ƀuôn Kna, să Čư̆ Mgar, kdriêk Čư̆ Mgar, Čar Daklak brei thâo: Hlăm grăp wưng 2/9 bi êdah klei lŏ bi hdơr kơ awa êjai dlăng hră hưn mdah klei êngiê. Wir phă hrue mkŏ mjing lăn čar, phung ƀuôn sang hdơr, brei leh kơ grăp čô klei trei mđao, jăk yâo msĕ hŏng hrue anei: “Phung ƀuôn sang lač jăk kơ Awa, kyuadah Awa klei krŭ. Phugn săn asei mlei djiê êngiă čiăng sua mă klei êngiê kơ djuê ana, ba wĭt klei êđăp ênang kơ phung ƀuôn sang. Phung ƀuôn sang hdơr kơ Awa ka yŏng mâo mơak ôh mbĭt hŏng phung ƀuôn sang, ƀiădah êlâo kơ wĭt hŏng aê aduôn atâo atiêt. Knư̆ hĭn mơh hdơr kơ awa, drei lŏ gĭrr hĭn duh ƀơ̆ng. Djăp anôk bŏ hŏng klei mơak kyua mâo leh klei êngiê, amâo lŏ mâo klei bi blah djiê êka ôh”./.

Y Nhít, 68 thŭn, ti ƀuôn Tu Mơ Rông, să Tu Mơ Rông, kdriêk Tu Mơ Rông, čar Kon Tum brei thâo, mơ̆ng hđeh dưi hmư̆ phung khua mduôn leh anăn phung mnuih prŏng yăl dliê kơ Awa Hồ. Tal êlâo mnuih ƀuôn sang hdơr kơ Awa Hồ jing msĕ si pô myang hlăm klei yăl dliê mnuih Sêdang. Truh kơ prŏng dưi bi tuôm hŏng phung lĭngb kahan, ñu thâo săng kơ Awa leh anăn mpŭ lu snăk kơ Awa. Hruê mkŏ mjing ala čar 2/9, hmư̆ Awa dlăng hră hưn mdah klei êngiê hlăm radio, Y Nhit mgei ai tiê snăk: “Hlăk điêt, kâo khăng hmư̆ phung khua mduôn hlăm ƀuôn yăl dliê lu kơ Awa Hồ, grăp čô mâo klei khăp yuôm bhăn snăk hŏng Ñu. Hlăk kâo nao mŭt kahan, kâo ƀuh phung ayŏng hlăm anôk bruă bi hia sơăi, ƀuh snăn kâo êmuh “Ya ngă diih hia? Diñu wĭt lač- “Hia kyua hơưi kơ Awa Hồ djiê leh. Jih jang mnuih ƀuôn sang mgei ai tiê leh anăn hia kơ Awa, kyua Ñu jing khua gĭt gai khăp hơiêng kơ jih djuê ana. Kâo hdơr nanao hlăm ai tiê hruê kkiêng leh anăn hriê Ñu djiê. Hlăm dŭm hrue anei, kâo hnĭng kơ Awa snăn, kyua mâo Awa Hồ lăn čar drei mâo klei êngiê msĕ si hruê anei, leh anăn kyua klei Đảng, Knŭk kna mđing dlăng, klei hdĭp mnuih ƀuôn sang ară anei mlih mrâo, trei mđao, jăk mơak. Grăp thŭn, sĭt truh hruê 2-9 alŭ wăl mkŏ mjing ti sang roong čiăng hdơr kơ hruê khua gĭt gai djiê, grăp čô hdơr snăk kơ ñu”.

Mbĭt hŏng ai tiê hdơr kơ Awa Hồ, ƀri wưng bi hdơr hruê mkŏ mjing ala čar 2/9, amai Đinh Hman, mnuih djuê ana Bahnar, ti ƀuôn Hvat, să ayŭn, kdriêk Čư̆ Sê, čar Gia Lai brei thâo: “Awa Hồ jing sa čô kdrăm k’ah êdi, Awa răk klei bi klă mkŏ mjing ala čar Việt Nam, ba klei êngiê, klei trei mđao kơ grăp čô. Grăp čô mâo klei mpŭ, hdơr nanao kơ Awa Hồ. Hdơr nanao klei Awa mtô, mnuih ƀuôn sang djuê ana Jarai, Bahnar amâodah Yuăn sa ai bi mguôp, hrăm mbĭt mkŏ mjing ƀuôn sang mlih mrâo, mkŏ mjing klei hdĭp trei mđao, amâo mâo ngă kah ana mbha djuê”.

Gưl mdei Knăm mkŏ mjing ala čar 2/9 thŭn anei, Thị Lan djuê ana M’Nông, ti ƀon Đăk Kliêng, să Quảng Tín, kdriêk Dak Rlâp, čar Dak Nông, mơak hĭn kyua ñu bu leh wưng hriăm bruă, klă sĭt dưi mă bruă hlăm adŭ bruă Knơ̆ng bruă sang čư̆ êa să Quảng Tín. Thị Lan brei thâo, kyua mâo Đảng, mâo Awa Hồ, lăn čar mâo klei hdĭp êđăp ênang, jăk mơak, phung hđeh hlăm dŭm ƀuôn sang dưi hriăm hră djăp ênŭm. Hjăn kâo ƀuh jăk mơak leh ruê̆ hriăm gưl prŏng kơ hdră bhiăn, wĭt ti Dak Nông dưi dăp bruă djŏ guôp, čiăng đru kơ mnuih ƀuôn sang, mkŏ mjing klei hdĭp ƀuôn sang ƀrư̆ hruê đĭ kyar hĭn. Thị Lan brei thâo: “Klei hdĭp mnuih ƀuôn sang ară anei djăp ênŭm hĭn, thâo yua hdră mnêč klei kreh knhâo hlăm bruă mkra mjing, hlăm klei bi dôk ung mô̆ ăt lăm lui klei bhiăn amâo lŏ djŏ guôp hŏng klei hdĭp mrâo, klei kthŭl mluk dưi lăm lui jih. Mnuih ƀuôn sang ăt mtô bi hriăm kơ anak čô răng krie dhar kreh msĕ si klei mmuiñ ênhiang djuê, tông čing čhar, hrĭ mñam, pơ̆k mñam… klei jăk siam dhar kreh djuê ana M’Nông mnuih ƀuôn sang lŏ dơ̆ng mđĭ lar răng kriê kơ ênuk êdei”.

H’ Zawut + Y-Khem pô mblang