Klei bi lông hriăm jih gưl 3 thŭn anei čar Kon Tum mâo êbeh 5000 čô bi lông, đĭ 273 čô mkă hŏng thŭn dih. Hlăm anăn, êbeh 4.800 čô nao hlăm sang hră gưl 3 leh anăn 160 čô hlăm anôk mtô bi hriăm jêñ jêñ. Ênoh phung hđeh mnuih djuê ƀiă nao hlăm klei bi lông mâo êbeh 1.700 čô, hđeh bi lông mkăn mâo giăm 220 čô. Čar Kon Tum mkŏ mjing leh 12 anôk bi lông, hlăm anăn mâo 5 anôk bi lông ti ƀuôn prŏng Kon Tum, 7 čô ti dŭm kdriêk leh anăn dăp phung dlăng bi lông ti dŭm anôk bi lông jing êbeh 900 čô. Nai Bùi Văn Quốc,  K’iăng Khua sang hră gưl 2,3 mnuih djuê ƀiă knŭk kna rông ba kdriêk Kon Plông brei thâo, thŭn anei, sang hră mâo 82 čô bi lông hriăm jih gưl 2 leh anăn lu jing mnuih djuê ƀiă Sêdang.

“ Truh ti wưng anei sang hră bi leh hdră mtô bi hriăm wưng tal 1, knŭk kna ăt mkŏ mjing klei bi lông kơ hđeh sang hră. Hlăm wưng kơ anăp sang hră lŏ dơ̆ng mbha hđeh sang hră hriăm awăt lŏ mtô thiăm kñăm gĭr ktưn hdră kñăm jih jang hđeh sang hră hriăm ruê̆ jih. Kơ bruă mtô bi hriăm, sang hră gĭt gai bruă hră mơar sang hră mđĭ hnơ̆ng êsei huă djam ƀơ̆ng kơ hđeh hlăm wưng mlan 6 kñăm rơ̆ng klei suaih pral kơ phung hđeh bi lông”.

Klei bi lông hriăm jih gưl 3 thŭn 2023, čar Gia Lai mâo êbeh 14.800 čô čih anăn bi lông, hlăm anăn mâo 3.100 čô mnuih djuê biă. Čar iêo mkrum hlăm brô 2.300 čô knuă druh ngă bruă dlăng klei bi lông ti 41 anôk bi lông ti 17 kdriêk, wăl krah, ƀuôn prŏng. Anôk bruă gĭt gai gưl čar mtă kơ Knơ̆ng bruă sang čư̆ êa dŭm kdriêk, wăl krah, ƀuôn prŏng leh anăn dŭm dhar bruă djŏ tuôm đru kơ phung bi lông kơ êdeh găn êrô, anôk huă mnăm, đih đăm kơ hđeh. Êngao anăn, ktuê dlăng, đru prăk kơ phung hđeh jing mnuih djuê ƀiă, gŏ sang knŭk kna dlăng ba, gŏ êsei ƀun, hđeh sang hră krĭng taih kbưi. Boh nik amâo brei hđeh sang hră lui klei bi lông kyua tuôm hŏng dleh dlan kơ klei găl bruă duh mkra amâodah găn êrô.

 Blŭ hrăm hlăm mmông mă bruă hŏng Anôk bruă kriê dlăng klei bi lông hriăm jih gưl 3 dua čar Gia Lai leh anăn Kon Tum, K’iăng Khua Phŭn bruă sang hră mtô bi hriăm Ngô Thị Minh čih yap, bi mni kơ bruă mprăp kơ klei bi lông hŏng klei pral ti alŭ wăl. Mbĭt anăn mtă kơ dŭm anôk bruă djŏ tuôm brei lŏ dơ̆ng ngă jăk dŭm hdră kčah mơ̆ng Phŭn bruă sang hră mtô bi hriăm kơ klei bi lông, ksiêm dlăng hdră mprăp čiăng ƀuh leh anăn msir mgaih klei tăm mâo. Mđĭ klei hâo hưn mtô mblang kơ phung hđeh leh anăn amĭ ama kơ klei bhiăn, ktrâo lač klei bi lông, bi hgŭm kjăp hŏng dŭm anôk bruă čiăng rơ̆ng êđăp ênang, mtăp mđơr. K’iăng Khua phŭn bruă sang hră mtô bi hriăm Ngô Thị Minh lač:

“ Anôk bruă gĭt gai mơ̆ng čar kơ klei bi lông hriăm jih gưl 3 păn kjăp kei bhiăn leh anăn pral hlăm bruă pô. Hdră mtô mjuăt kơ phung dlăng klei bi lông čiăng êdi, srăng ƀuh ya mta hlăm hră mơar ka djŏ guôp snăn alŭ wăl srăng akâo, bi trông čiăng leh grăp gưl bi lông, klei bi lông thŭn êdei srăng tŭ dưn jăk hĭn kơ thŭn êlâo. Klei bhiăn bi lông snăn phung hđeh nao hlăm klei bi lông drei amâo ngă ngơi mang ôh, bruă bi hriăm klei bhiăn bi lông kơ phung hđeh brei mlih mrâo, čiăng kơ diñu ăt klă sĭt jing phung thâo kơ klei anei.  Bruă phung hđeh nao hlăm klei bi lông hŏng bruă klam kơ hruê mmông, klei bhiăn snăn ăt brei gĭr hâo hưn truh kơ phung hđeh”.

K’iăng Khua phŭn bruă sang hră mtô bi hriăm Ngô Thị Minh mtă kơ dŭm alŭ wăl ñĕ kơ klei ngă ngơi mang, hlăm bruă mtô bi hriăm klei bhiăn vrei mlih mrâo hdră čiăng kơ phung dưi hriăm thâo săng djăp ênŭm klei bhiăn hlue ngă djŏ bruă klam pô, mprăp klei thâo čiăng kơ phung ngă bruă hlăm klei bi lông thâo msir hlăm boh klei mâo, hdră kčah ksiêm dlăng mơ̆ng Anôk bruă gĭt gai klei bi lông brei dưi mkŏ mjing klă klơ̆ng. K’iăng Khua phŭn bruă sang hră mtô bi hriăm Ngô Thị Minh  mñă klă:

“Klei bi lông jing brei rơ̆ng hnơ̆ng kčah êđăp ênang. Êđăp ênang kơ klei suaih pral, klei hdĭp phung hđeh. Drei gĭr čiăng kơ phung hđeh bi lông hŏng klei hơĭt ai tiê. Doh êƀăt mnơ̆ng ƀơ̆ng huă. Jăk kơ yan adiê, êlan klông. Êđăp ênang gang mkhư̆ kei mtuh, pui ƀơ̆ng. Êđăp ênang hlăm klei kriê pioh akŏ bi lông. Êđăp ênang gang mkhư̆ klei ruă tưp hlăm klei bi lông.”

 Klei bi lông hriăm jih gưl 3 thŭn 2023 mkŏ mjing hlăm knhal jih mlan 6. Hlăm anăn, hruê 27/6 jing hruê ngă hră mơar klei bi lông. Mkŏ mjing dlăng klei bi lông gưl 3 hlăm 2 hruê 28 leh anăn 29/6. Dŭm alŭ wăl brei mđing kơ bruă hâo hưn mtô mblang čiăng kơ hđeh sang hră, amĭ ama leh anăn ala ƀuôn thâo săng kơ klei yuôm bhăn mơ̆ng klei bi lông gưl 3, hmao bi mni kơ dŭm êpul bruă, phung mâo klei êdah êdi hlăm bruă mkŏ mjing klei bi lông leh anăn bi kmhal phung ngă soh hmăi kơ klei bi lông./.