Čih yap boh sĭt ti anôk mnia mblei, truh kơ wưng anei, mnơ̆ng dhơ̆ng kơ wưng Tết nguyên đán Giáp Thìn 2024 mâo lu kơ hnơ̆ng leh anăn lu jơr mta mnơ̆ng čiăng kơ mnuih ƀuôn sang blei yua. Mbĭt hŏng dŭm anôk čhĭ mnia phŭn, dŭm anôk čhĭ mnia prŏng jing anôk iêo jak lu phung blei ba yua kyua dưi rơ̆ng thâo klă phŭn agha Aduôn Phạm Thị Diện, să Cư An, wăl krah An Khê, čar Gia Lai, nao blei mnơ̆ng ti sang mnia prŏng Co.opmart ƀuôn prŏng Pleiku, brei thâo:

 “Kâo ƀuh dŭm mta mnơ̆ng dhơ̆ng tinei jing lu jơr leh anăn jăk êdi, blei kơ tač hŭi mâo lu mnơ̆ng mgưt leh anăn amâo mâo jăk kơ klei suaih pral, mnơ̆ng dhơ̆ng tinei dlăng jăk êdi, dăp siam mơh”.

Bùi Quốc Bình, khua kiă kriê sang čhĭ mnia prŏng Co.opmart ƀuôn prŏng Pleiku, čar Gia Lai brei thâo, čiăng bi mâo djăp klei čiăng anôk mnia mblei, anôk bruă mă leh hnơ̆ng lu mnơ̆ng dhơ̆ng čiăng pioh čhĭ hlăm wưng tết.

 “Klei blei ba yua mơ̆ng mnuih ƀuôn sang hlăm wưng tết Giáp Thìn 2024 đĭ hlăm brô 3 blư̆ mkă hŏng hruê yăng đar, amâo mâo brei mâo boh klei kƀah mnơ̆ng ênoh đĭ yuôm, nao hgŭm bi hơĭt ênoh mnơ̆ng dhơ̆ng, sang mnia prŏng mprăp leh hlăm brô 110 êklai prăk čiăng đru kơ mnuih ƀuôn sang hlăm wưng tết. Ară anei dŭm mta mnơ̆ng dhơ̆ng anei hmei mă êlâo kơ tết hlăm brô 2 mlan leh anăn ară anei mâo mơ̆ng 60 -70% mnơ̆ng tết truhleh ti ssang čhĭ mnia prŏng. Mnơ̆ng dhơ̆ng srăng mâo phŭn agha klă nik, mâo klei doh êƀăt”.

Hluê si klei đăo knăl mơ̆ng knơ̆ng bruă tuh tua čar Gia Lai, kluôm hnơ̆ng dŭ mdiăng mnơ̆ng dhơ̆ng leh anăn hnư hrui wĭt mlan Tết Nguyên Đán đăo knăl mâo 17.500 êklai prăk. Čiăng rơ̆ng bi mâo djăp mnơ̆ng dhơ̆ng hlăm wưng tết, knơ̆ng bruă tuh tia mtă kơ dŭm anôk bruă, knơ̆ng brư hluê ngă hdră êlan mkăp mnơ̆ng hơ̆ng čiăng êdi bi hơĭt anôk mnia mblei, hluê ngă tŭ dưn hdră bi hơĭt ênoh, čhĭ djŏ ênoh, amâo mâo brei mâo klei kƀah mnơ̆ng dhơ̆ng, ênoh yuôm. Mbĭt anăn ƀuăn rơ̆ng mnơ̆ng dhơ̆ng srăng mâo hnơ̆ng tŭ jăk, mâo hră mơar ênŭm, thâo klă phŭn agha. Rcom Jen, K’iăng khua knơ̆ng bruă tuh tia čar Gia Lai, lač:

 “Knơ̆ng bruă tuh tia mâo leh hdră êlan mkăm pioh mnơ̆ng thơ̆ng 2024, ksiêm dlăng mnơ̆ng dhơ̆ng, dŭm klei čuăn kơ klei doh êƀăt, čhĭ mnia điện tử. Hluê anăn thâo klă boh sĭt klei mnia mblei mâo klei hơĭt. Hlue ngă hdră êlan mtrŭt mđĭ klei blei yua, mkŏ mjing lu hdră êlan ba mnơ̆ng dhơ̆ng truh ti krĭng ƀuôn sang, bi mguôp hŏng anôk ksiêm dlăng anôk mnia mblei čiăng ksiêm dlăng mnơ̆ng dhơ̆ng, tơdah hmao ƀuuh mnơ̆ng mgưt, amâo mâo bĭt phŭn agha srăng bi mguôp hŏng anôk bruă kriê dlăng anôk mnia mblei ƀuah mkra ktang phĭt hluê si hdră bhiăn ară anei”.

Kñăm rơ̆ng bi kna klei mkăp brei, klei blei ba yua, đru kơ mnuih ƀuôn sang blei yua, bruă sang čư êa čar Dak Lak ngă leh lu hdră êlan bi hơĭt ênoh dŭm mnơ̆ng dhơ̆ng čiăng êdi wưng knhal jih thŭn 2023 leh anăn Tết Nguyên đán Giáp Thìn 2024. Mmông bi hơĭt ênoh mơ̆ng mlan 12/2023 truh kơ jih mlan 2/2024. Dŭm mta mnơ̆ng dhơ̆ng bi hơĭt ênoh mâo: mnơ̆ng ƀơ̆ng huă (kđeh čĭm ŭn, mnŭ ada, boh mnŭ, boh bip, êa prăi, sĭk, hbâo bi ƀăt leh anăn dŭm mta mnơ̆ng dhơ̆ng mkra mjiñg, djam mtam), êa săng, êa pui. Anei jing dŭm mta mnơ̆ng čiăng êdi, klei čiăng yua lu, ênưih hmăi kơ klei mkăp blei yua, ênoh ênil.

Čar Dak Lak dưi mtrŭt mjhar 11 knơ̆ng bruă, sang mnia prŏng, sang čhĭ mnia nao hgŭm hlăm hdră bi hơĭt ênoh mnơ̆ng dhơ̆ng wưng knhal jih thŭn 2023 leh anăn Tết Nguyên đán Giáp Thìn 2024. Mĭn tĭng ênoh prăk pioh mkăp mnơ̆ng dhơ̆ng hlăm wưng tết truh kơ êbeh 473 êklai prăk, mâo giăm 27% klei čiăng blei ba yua mơ̆ng mnuih ƀuôn sang hlăm boh klei kƀah mnơ̆ng dhơ̆ng. Êngao kơnăn, mơ̆ng dhơ̆ng ti dŭm anôk čhĭ mnia ăt jing sa mblah prŏng bi mâo djăp mnơ̆ng dhơ̆ng kơ mnuih ƀuôn sang hlăm wưng tết. Lưu Văn Khôi, Khua knơ̆ng bruă tuh tia čar Dak Lak brei thâo, mbĭt hŏng bi mnơ̆ng dhơ̆ng hlăm wưng tết, čar ăt mtrŭt ktang dŭm hdră êlan gang mkhư̆ mnơ̆ng amâo mâo jăk leh anăn leh anăn klei mplư hlăm klei čhĭ mnia:

Dhar bruă tuh tia mbĭt hŏng bruă sang čư êa dŭm kdriêk, wăl krah, ƀuôn prŏng srăng mâo dŭm hdră êlan klă klơ̆ng čiăng bi mâo djăp mnơ̆ng dhơ̆ng leh anăn rơ̆ng hơĭt ênoh mnơ̆ng dhơ̆ng. Êngao kơnăn jing mđĭ hĭn dŭm hdră êlan ksiêm dlăng čiăng gang mkhư̆ mnơ̆ng mgưt, mnơ̆ng hơăi mang leh anăn gang mkhư̆ klei mplư luar hlăm klei čhĭ mnia.”

Čiăng gang mkhư̆ klei mkăm pioh, mđĭ ênoh soh hŏng hdră bhiăn, rơ̆ng klei hơĭt anôk mnia mblei. Anôk bruă kriê dlăng anôk mnia mblei čar Dak Lak mrâo hluê ngă hdră êlan trŭn kơ bruă gang mkhư̆ klei tlĕ čhĭ, mplư loar leh anăn mnơ̆ng mgưt wưng êlâo, hlăm leh anăn êdei Tết Nguyên đán Giáp Thìn 2024. Mbĭt hŏng anăn, dŭm êpul srăng ktuê dlăng kjăp bruă čhĭ mnia êa săng êa pui, êwa čuh, amâo mâo brei mâo klei mkăm pioh, mđĭ ênoh soh hŏng hdră bhiăn, rơ̆ng klei hơĭt anôk mnia mblei čiăng đru wưng tết kơ mnuih ƀuôn sang.