Amai H’Giang Niê, Khua dlăng bruă êpul êdam êra čar Dak lak brei thâo: leh wưng pŏk ngă, truh ară anei, dŭm boh phŭn tui hriăm hlue ngă knhuah mngač Awa Hồ ba leh klei tŭ dưn jăk, mjing klei mrâo hlăm klei thâo săng mơ̆ng grăp čô êdam êra.

 “Bruă tui hriăm leh anăn hlue ngă knhuah mngač Awa hmei pŏk ngă hlăm jih jang bruă. Bruă tal êlâo hmei ngă jing hriăm dŭm akŏ hlăm klei bi kƀĭn leh anăn bi mklă gưl bi kƀĭn kđi čar hlue si gưl mơ̆ng dŭm gưl bruă Đoàn. Tal dua hmei pŏk ngă klei bi mguôp hlăm dŭm gưl klei kđi čar, dŭm hdră ngă bruă krŭ kdơ̆ng. Êngao anăn hmei pŏk ngă klei hriăm leh anăn hlue ngă asăp Awa mtă mơ̆ng dŭm klei bi lông leh anăn knhal tuč hmei bi mklă bruă bi lar phung êdah kdlưn čiăng mơ̆ng anăn mjing klei lar bra êlam hlăm dŭm gưl êpul êdam êra leh anăn kluôm ala ƀuôn.”

Hriăm leh anăn hlue ngă tui si Awa Hồ, phung knuă druh, đảng viên leh anăn mnuih ƀuôn sang krĭng mnuih djuê ƀiă ti čar Kon Tum mâo lu hdră ngă mbruă, gru hmô tŭ dưn mjing klei jăk hlăm êpul êya, msĕ si: mguôp hŏng klei mtrŭt mjhar “Bi mlih klei mĭn hdră ngă hlăm krĭng mnuih djuê ƀiă đru kơ digơ̆ tlaih ƀun kjăp”, jih jang mnuih ƀuôn sang bi hgŭn mkŏ mkra krĭng ƀuôn sang mrâo, wăl krah jăk siam, hdră “Kluôm ala hrăm mbĭt kyua mnuih ƀun - amâo brei hlei pô lăm lui ti tluôn”. Jing sa čô êdah kdlưn hlăm klei tui hriăm leh anăn hlue ngă knhuah mnghač Hồ Chí Minh mrâo mâo Khua Knơ̆ng bruă sang čư̆ êa kdriêk Đăk Hà mđup brei hră pah mni, Y Hlá, K’iăng Khua dlăng bruă Đảng alŭ Đăk Wek, să Đăk Pxi, brei thâo:

 “Kâo čang hmăng dưi tui hriăm leh anăn hlue ngă knhuah mngač Awa Hồ. Kyua klei mĭn, klei mă bruă mơ̆ng ñu djŏ klă. Kâo pô hŏng jih jang mnuih ƀuôn sang ti nei ƀuh, ya klei ñu mtô snăn brei ngă bi jăk. Hlăm ênuk aduôn aê ka mâo klei thâo săng čiăng mtrŭt mjhar hlăm klei mă bruă mkra mjing, ka thâo ana mjeh, mnơ̆ng rông, thâo mkra mjing hlue si klei bhiăn hđăp, pla mdiê, hbei ƀlang… amâo tŭ dưn, klei hdĭp dleh dlan. Hruê anei, kyua mâo Đảng, Knŭk kna mđing dlăng, kyua Awa Hồ mtô drei thâo bi mlih klei mĭn hdră ngă, thâo ruah ana mjeh, mnơ̆ng rông mâo ênoh yuôm msĕ si ana tuh tia mkra mjing, rông mnơ̆ng mnŭ mda… bruă duh mkra gŏ sang đĭ kyar hĭn, klei hdĭp ƀuôn sang mlih mrâo”.