Alŭ Ka Líp lehanăn krĭng mnuih ƀuôn sang dôk Kai Ya, Ya Mâu, să Phan Sơn, čar Lâm Đồng mâo êbeh 700 gŏ sang hŏng giăm 3000 čô mnuih, lu jing mnuih djuê ana K’ho, Raglai, Čam, Nùng. Hlăm wưng êgao, mnuih ƀuôn sang hlăm să pral nao hgŭm hlăm Hdră mtrŭt mjhar “Jih jang mnuih ƀuôn sang hgŭm mguôp mkŏ mkra klei hdĭp mrâo, kreh dhar ƀuôn prŏng”. Mơ̆ng akŏ thŭn truh kơ ară anei, dŭm gŏ sang ti krĭng anei đru mguôp leh êbeh 180 hruê ai mă bruă huai mdoh mbông mnuôr êa, mkra êlan mkăp kơ hdră duh mkra; hdră bi mdoh wăl hdĭp mda, hrui mƀĭn djah djâo lehanăn mkra êlan dưi krơ̆ng kjăp nanao, êbeh 550 gŏ sang djăp hnơ̆ng čuăn gŏ sang kreh dhar (mâo êbeh 90%)…

Mrâo anei, mnuih ƀuôn sang mkŏ mjing tŭ dưn leh Hruê mơak bi hgŭm mguôp jih jang djuê ana, mjing boh kdrŭt čiăng hrăm mbĭt mkŏ mkra klei hdĭp trei mđao. Klei êdah êdi mơ̆ng hruê mơak jing hdră kdŏ mmuñ, mjuăt ktang asei lei lehanăn klei bi lông tŭk knă êsei djam jiă knhuah dhar kreh mơ̆ng mnuih K’ho, Raglai tinei. Amai Đặng Thị Thái Thuận, djuê ana Čam, dôk ti Ya Mâu, să Phan Sơn hơ̆k kdơ̆k brei thâo, amai nao hgŭm hlăm jih klei bi lông msĕ si kdăt klŭng, ktŭng klei, guôm ală biêng ŭn lăn, ƀiădah mơak hĭn jing klei bi lông tŭk knă êsei djam lehanăn êpul amai mâo klei pah mni kdlưn hĭn.

Ai êwa mơ̆ng hruê mơak bi hgŭm mguôp jih jang djuê ana mơak êdi, mnuih ƀuôn sang mơ̆ng djăp krĭng hriê tinei hlăp lêñ, čhưn mơak lŏ đru ksiêk kjăp hĭn klei bi hgŭm mguôp. Ƀuh grăp čô hơ̆k mơak sơaĭ hlăm grăp klei bi lông. Êpul kâo mâo mă klei pah mni mrô sa hlăm klei bi lông tŭk knă êsei djam, bi klei bi lông mkăn mâo klei pạh mni mđĭ ai sơaĭ.

Ƀri gưl anei, mnuih ƀuôn sang alŭ Ka Líp, Kai Ya, Ya Mâu nao hgŭm đru mguôp leh klei blŭ kñăm mkŏ mkra krĭng ƀuôn sang ƀrư̆ hruê ƀrư̆ đĭ kyar. Mang Ngọc Văn, mnuih ƀuôn sang mâo kơhưm brei thâo, hruê mơak thŭn anei dưi mkŏ mjing hlăm wưng kluôm ala dôk hluê ngă bruă knŭk kna alŭ wăl 2 gưl. Êlâo adih, să Phan Sơn lehanăn Phan Lâm hđăp jing dua să mdê, ară anei bi mŭt jing sa, kyua anăn mơ̆ng ară anei truh kơ jih thŭn ăt dôk lu bruă mjêč brei ngă, kyua anăn, mnuih ƀuôn sang hlăm krĭng anei mđĭ leh ai tiê hgŭm mguôp, sa ai hŏng bruă knŭk kna alŭ wăl.

Bruă knŭk kna alŭ wăl dôk pŏk ngă lu bruă kyua anăn mnuih ƀuôn sang brei mâo klei sa ai. Pô dôk mkŏ mkra klei hdĭp kreh dhar mrâo ti krĭng mnuih ƀuôn sang dôk kyua anăn brei lui jih klei bhiăn amâo djŏ mơ̆ng đưm, brei thâo mkiêt mkriêm hlăm bruă mkŏ mjing klei bi kuôl, klei djiê brŭ, wăt mkiêt mkriêm prăk kăk, hruê mmông, snăn kơh drei srăng đĭ kyar.

Mai Hồng Đăng, Khua knơ̆ng bruă sang čư̆ êa să Phan Sơn, čar Lâm Đồng brei thâo, hlăm wưng ti anăp, alŭ wăl srăng mtrŭt mđĭ pral, mđĭ hnơ̆ng tŭ jăk Hdră mtrŭt mjhar “Jih jang mnuih ƀuôn sang hgŭm mguôp mkŏ mkra klei hdĭp krĭng ƀuôn sang mrâo, kreh dhar ƀuôn prŏng” mguôp hŏng bruă hluê ngă mta kñăm mđĭ kyar bruă duh mkra – ala ƀuôn alŭ wăl. Hlăm anăn, mđing mđĭ kyar bruă duh mkra gŏ sang, bi mlih gru hmô pla mjing djŏ guôp. Mđĭ hnư hrui wĭt, bi hrŏ ƀun hơĭt kjăp. Alŭ wăl dôk mâo hdră ngă djŏ guôp kơ hdră mđĭ kyar bruă mnia mblei, hiu čhưn ênguê.

Alŭ wăl dôk ti ktuê êlan dơ̆ng prŏng mrô 28B mâo boh dlông taih 37 km, hlăm wưng ti anăp alŭ wăl srăng ksiêm dlăng dŭm klei kčah mtrŭn čiăng mtrŭt mđĭ bruă mnia mblei ti ktuê êlan anei lehanăn ti alŭ wăl ăt mâo ênao Sông Lũy prŏng siam, anei jing sa hlăm dŭm anôk jak iêu phung tuê hiu čhưn tơdah drei mđĭ lar jih klei găl mâo”.

Čar Lâm Đồng leh bi mŭt mbĭt jing čar mâo ênhă prŏng mơ̆ng kluôm ala, hŏng 49 djuê ana ayŏng adei ayŏng adei hrăm mbĭt hdĭp mda, mơ̆ng krĭng čư̆ čhiăng Lăn dap kngư truh kơ dŭm să ktuê hang ksĭ, mâo lu klei bhiăn jiă knhuah dhar kreh djuê ana./.