VOV4.Êđê- Mbĭt hŏng kluôm ala, phung knuă druh, lĭng kahan ti krĭng knông lăn mơ̆ng čar Dak Nông dôk mčhĭt m’uăt mprăp drông sa yan mnga mrâo. M’ak ƀiădah amâo wơr ôh bruă klam, phung lĭng kahan ti krĭng knông lăn ăt dôk gĭr răng mgang kjăp klei h’ĭt ênang ti krĭng knông lăn.

Ai êwa drông tết Nhâm Dần thŭn 2022 dôk mơak mñai ti krĭng knông lăn čar Dak Nông, êa mil yan mnga dôk guôm hlăm kluôm dŭm kđông kahan knông lăn. Hŏng phung knuă druh, lĭng kahan, kđông kahan jing sang, knông lăn jing ƀuôn sang, ƀơ̆ng tết ti kđông kahan ăt msĕ hŏng ƀơ̆ng tết ti sang, mâo điŏ, boh kroh, mnga sŭng gơr leh anăn ai êwa mơak mñai. Akŏ thŭn drông tết krĭng knông lăn, Binh nhất Lầu Văn Hiện, êpul lĭng kahan ti kđông kahan knông lăn Dak Tiên, knơ̆ng gĭt gai lĭng kahan knông lăn čar Dak Nông brei thâo, klei uêñ mĭn, mđĭ ai mơ̆ng pô gĭt gai, mbĭt hŏng klei mprăp kluôm ênŭm mơ̆ng kđông kahan čiăng mâo ai êwa tết hơ̆k mơak, h’uh mđao dưi đru leh kơ phung lĭng kahan msĕ hŏng ayŏng wơr hĕ klei ênguôt hnĭng kơ pưk sang leh anăn lŏ thâo săng klă bruă klam pô ti krĭng knông lăn ala čar:

“Thŭn anei jing thŭn tal êlâo kâo drông tết ti krĭng knông lăn. Ayŏng adei hlăm kđông kahan msĕ hŏng ayŏng adei hlăm sang, bi jăk leh anăn bi đru hdơ̆ng pô. Kâo mơak sơnăk kyua pô jing sa čô lĭng kahan. Thŭn mrâo, hơêč hmưi kơ gŏ sang, ƀĭng găp mâo sa thŭn mrâo boh hŏng klei suaih pral, trei mđao leh anăn mdrŏng sah”

 Bi hgŭm dŭm êpul răng mgang knông lăn Dak Nông răng mgang knông lăn

Hŏng dŭm bĕ kngan thâo mbruă mơ̆ng phung knuă druh, lĭng kahan knông lăn, dŭm klŏ điŏ đŭng mprăp leh kơ klei ƀơ̆ng tết, dŭm mta mnơ̆ng ƀơ̆ng mkăn pô čŏng duah mă, mâo leh hlăm đang djam, doh, mtah leh anăn mâo djăp ênŭm hlăm wưng tết. Thiếu tá Lương Văn Phú, khua bruă kđi čar ti kdông kahan knông lăn Dak Tiên, knơ̆ng gĭt gai lĭng kahan knông lăn čar Dak Nông brei thâo, anôk bruă ngă jăk leh bruă rơ̆ng kjăp klei mĭn kơ phung knuă druh, lĭng kahan dưi mâo klei hơĭt drông tết, mơak yan mnga.

    “Ai tiê mơ̆ng phung ayŏng adei lĭng kahan ară anei mâo sơăi klei mơak, leh anăn mprăp ênŭm leh mnơ̆ng dhơ̆ng čiăng drông tết. Phung ayŏng adei bi klă leh klei mĭn pô čiăng ngă jăk dŭm bruă klam dưi jao leh”

Msĕ hŏng lu wưng tết mkăn, Tết Nhâm Dần 2022 anei mơ̆ng êpul lĭng kahan knông lăn čar Dak Nông, êngao kơ klei ƀơ̆ng huă sang lĭng kahan, ti djiêu anăn jing dŭm bĕ phao ktuang. Phung lĭng kahan knông lăn drông mơak tết êjai, ksiêm dlăng leh anăn mprăp ngă bruă klam krĭng knông lăn êjai. Ktang giăm tết, bruă ksiêm dlăng leh anăn hiu ksiêm dlăng mơ̆ng dŭm kđông kahan dưi mđĭ hĭn. Dŭm bruă klam răng mgang knông lăn dưi rơ̆ng nanao. Ênoh lĭng kahan ngă bruă mprăp nanao klei ngă bruă klam dưi jao leh. Bruă ksiêm dlăng, gak răng, ksiêm dlăng mnuih, êdeh êdâo mŭt kbiă ti alŭ wăl knông lăn dưi ngă jăk, kñăm đru hlăm bruă ksiêm dlăng, rang mgang kjăp knông lăn, gơ̆ng knông lăn leh anăn klei dưi kiă kriê knông lăn ala čar, mbĭt anăn jing gang mkhư̆ klei ruă tưp Covid-19 hŏng klei tŭ dưn. Trung tá Nguyễn Huy Hiếu, khua kiă kriê kđông kahan knông lăn Dak Tiên, knơ̆ng gĭt gai lĭng kahan knông lăn čar Dak Nông brei thâo:

“Mâo Đảng, knŭk kna leh anăn mnuih ƀuôn sang jao bruă klam ksiêm dlăng, răng mgang knông lăn ala čar, hmei ƀuăn rơ̆ng srăng ngă jăk bruă klam, mkŏ mjing bruă gak răng, răng mgang kjăp knông lăn, alŭ wăl, thâo klă boh sĭt, bi mguôp hŏng dŭm êpul êya čiăng bi kdơ̆ng hŏng phung ngă soh, gĭr ktưn bi leh bruă klam hlăm wưng tết.

 Knuă druh lĭng kahan răng mgang knông lăn Đăk Tiên, Anôk bruă lĭng kahan răng mgang knông lăn čar Dak Nông ksiêm dlăng, ktuê dlăng, răng mgang knông lăn gưl Tết

            Čar Dak Nông mâo êlan knông lăn hŏng boh taih hlăm brô 141km găn nao 7 să knông lăn hlăm 4 kdriêk Jing Čư̆ Jŭt, Dak Mil, Dak Song leh anăn Tuy Đức. hlăm jing jang ƀuôn sang mơ̆ng 7 să knông lăn anei mkŏ mjing sơăi êpul čŏng ksiêm dlăng knông lăn, gơ̆ng knông lăn. Dŭm thŭn êgao, boh nik hlăm wưng tết, klei bi mguôp mơ̆ng êpul lĭng kahan knông lăn hŏng êpul čŏng ksiêm dlăng mơ̆ng dŭm alŭ ƀuôn, kahan ƀuôn dưi bi lar leh boh tŭ dưn hlăm bruă gak răng, ksiêm dlăng, gang mkhư̆ klei găn knông lăn soh hŏng hdră bhiăn. Đại tá Nguyễn Văn Lư, khua knơ̆ng gĭt gai lĭng kahan knông lăn čar Dak Nông brei thâo, mbĭt hŏng bruă mkŏ mjing klei đăo knang hlăm ai tiê mnuih ƀuôn sang, lĭng kahan knông lăn dưi ngă jăk leh bruă hŏng tač êngao krĭng knông lăn. Boh nik hlăm wưng klei ruă tưp Covid-19 dôk dleh dưi ksiêm dlăng, bruă hŏng tač êngao krĭng knông lăn mâo lu hdră mlih mrâo djŏ guôp, mâo boh tŭ dưn. Hluê anăn, dưi bi lar klei bi mguôp 2 ala čar, rơ̆ng kjăp knông lăn ala čar:

“Hlăm hruê mmông mâo klei ruă tưp, hmei mlih hdră ngă bruă, hdră hŏng tač êngao mrâo, amâo dưi bi tuôm klă anăp, hmei srăng ngă klei bi trông hlăm êlan đĭng blŭ leh anăn bi tuôm ti êlan knông lăn. Dưi lač, hŏng dŭm hdră êlan, bi mlih hdră ngă bruă, hmei ăt dưi rơ̆ng bruă hâo hưn, hưn mdah klei mrâo leh anăn bi mguôp hlăm bruă ksiêm dlăn, răng mgang klei dưi kiă kriê ala čar, rơ̆ng klei êđăp ênang krĭng knông lăn grăp tĭng.”

Klei hur har, klei čŏng ngă bruă hlăm bruă tui ngă dŭm bruă klam mơ̆ng êpul lĭng kahan knông lăn čar Dak Nông mguôp leh anăn dôk bi mguôp klei yuôm bhăn čiăng rơ̆ng klei hơĭt, klei êđăp ênang yang ƀuôn hlăm alŭ wăl knông lăn. Boh nik hlăm wưng tết anei, klei kjăp mơ̆ng phung lĭng kahan knông lăn ba wĭt leh klei êđăp ênang kơ mnuih ƀuôn sang dưi drông tết.

Pô mblang: Y-Ƀel Êban