Phung khua prŏng hlăm êpul khua kiă kriê bruă kƀĭn ala bi tŭ ư hŏng klei čiăng lŏ mlih mrâo, jih jang klei čih mkra hdră bhiăn, mâo hdră bhiăn bi kdơ̆ng hŏng klei tlĕ čhĭ mnuih (lŏ mlih mrâo), hdră bhiăn jia ênoh ênil đĭ (lŏ mlih mrâo); hdră bhiăn Hóa chất (lŏ mlih mrâo); hdră bhiăn kiă kriê, ba yua phao ktuang, mnơ̆ng mtuh (lŏ mlih mrâo) Jih jang hră mơar mâo mprăp leh djăp ênŭm, djŏ hŏng mta mtrŭn.

Khua bruă kƀĭn ala Vương Đình Huệ lač: Jih jang bruă lŏ čih mkra hdră bhiăn anăn jing djŏ guôp hŏng bruă mkra hdră mtrŭn tui si klei bhiăn. Jih jang klei mkra hdră mtrŭn kơ bruă mkŏ mjing hdră bhiăn, klei bhiăn mtrŭn brei bi klă mngač hlăm klei ksiêm duah, bi leh djăp ênŭm kơ klei bhiăn čih mkra. Bi tơdah lŏ mâo dŭm hdră êlan mrâo, amâodah mâo klei čiăng bi mlih, snăn brei mâo hdră bi ksiêm bi mklă nik hĭn tal êlâo. Khua bruă kƀĭn ala ăt mtă kơ dŭm phŭn dhar bruă, hlăm anăn mâo phŭn bruă hlue ngă klei bhiăn kăp kčĕ kơ knŭk kna bi hrŏ jih jang hdră ngă bruă mơ̆ng anôk bruă kiă kriê bruă kƀĭn ala mâo ba mdah, kñăm bi mklă kơ hdră êlan./.