VOV4.Êđê - Tlam mbruê 12/4, êpul bruă Đảng mơ̆ng bruă kƀĭn ala mâo leh klei mă bruă hŏng êpul khua gĭt gai gưl dlông ksiêm wĭt hdră mtrŭn mrô 19 gưl 11 kơ bruă lŏ dơ̆ng mlih mrâo hdră êlan, klei bhiăn ala čar kơ klei yua lăn hlăm wưng mtrŭt mđĭ kluôm ênŭm klei mlih mrâo, mkŏ mjing tur knơ̆ng čiăng truh kơ thŭn 2020 ala čar drei jing ala čar mâo bruă tuh tia hluê êlan mrâo mrang.

Blŭ hlăm klei kƀĭn, Khua bruă kƀĭn ala Vương Đình Huệ lač klă, mta knăm kơ bruă ksiêm wĭt hdră mtrŭn mrô 19 leh anăn mkra mlih klei bhiăn yua lăn jing čiăng ksiêm ksiêm dlăng, yua lăn mâo boh tŭ hĭn, mkŏ mjing boh kdrŭt mđĭ kyar kjăp kơ ala čar, mbĭt anăn bi hrŏ jih hnơ̆ng klei bi kcŭt hưn djŏ tuôm hŏng bruă yua lăn. Klei kƀĭn kñăm bi trông, bi klă dŭm mta mrâo mơ̆ng klei hưn mdah leh anăn hdră mkăp kơ hdră mtrŭn mkă hŏng hdră mtrŭn mrô 19 hluê si tur knơ̆ng bruă kđi čar jing bruă mkŏ mjing ala čar jing ala čar yang ƀuôn ngă phŭn (bi mbŏ, mđĭ kyar hdră mtrŭn thŭn 2011), hdră bhiăn ala čar thŭn 2013, ksiêm dlăng hŏng klei kreh knhâo, boh sĭt mơ̆ng dŭm klei hưn mdah, mbĭt anăn lŏ bi klă, čih yap klei hmăi hŏng bruă ksiêm dlăngm yua lăn mâo boh tŭ dưn.

Y- Ƀel pô mblang