Aguah mbruê 5/6, blŭ hrăm hlăm knăm mtrŭt mjhar, khua gĭt gai čar Kon Tum mñă ktang boh tŭ dưn mơ̆ng Knăm pla ana kyâo lă lar hdơr kơ Awa Hồ hlăm bruă răng mgang wăl hdĭp mda leh anăn boh tŭ dưn klă klơ̆ng mơ̆ng ana kyâo mtah ba wĭt hlăm klei hdĭp, mbĭt anăn iêo mthưr grăp čô mnuih ƀuôn sang hur har pla ana kyâo leh anăn pla dliê, đru krŭ wĭt lăn, gang mkhư̆ klei không kƀah êa leh anăn jing kdrăn čuah msĕ hŏng akŏ mơ̆ng hruê wăl hdĭp mda tar rŏng lăn 5/6 thŭn anei. Leh knăm mtrŭt mjhar, mbĭt hŏng bruă pla ana kyâo, čar Kon Tum lŏ ngă bruă pla 3.000 ha dliê. Hlăm anăn bruă sang čư êa 10 kdriêk, ƀuôn prŏng mơ̆ng čar đru kơ mnuih ƀuôn sang pla giăm 2.800ha leh anăn êbeh êbeh 200ha mơ̆ng dŭm anôk bruă pô dliê.

Aguah mbruê, ti ƀuôn prŏng Ƀuôn Ama Thuôt, čar Dak Lak pŏk ngă leh Tết pla ana kyâo hdơr nanao kơ Awa Hồ. Anei ăt jing bruă mđing bi hdơr 120 thŭn Hruê mkŏ mjing čar Dak Lak, đru hlue ngă tŭ jing hdră “Pla sa êklai ana kyâo mtah” kyua Knŭk kna pŏk ngă.

Hlăm dŭm thŭn êgao, dŭm gưl, dŭm dhar bruă, alŭ wăl leh anăn mnuih ƀuôn sang čar Dak Lak mđing, hgŭm hlăm hdră pla ana kyâo, pla dliê leh anăn răng mgang dliê. Thŭn 2023, kluôm čar pla leh êbeh 4.500 ha dliê, mâo êbeh 252% hdră kčah. Ti ƀuôn prŏng Ƀuôn Ama Thuôt jing sa hlăm dŭm ƀuôn prŏng mâo ênoh ana kyâo mtah lu hĭn kluôm ala. Hlăm knăm pŏk ngă Tết pla ana kyâo aguah mbruê, phung bi ala leh anăn mnuih ƀuôn sang pla leh dŭm êtuh ana tluôr jang ktuê êlan Võ Nguyên Giáp. Leh knăm pŏk ngă, srăng mâo 5 êbâo ana kyâp srăng dưi lŏ pla ti ƀuôn prŏng.