Klă klơ̆ng, dŭm anôk bruă hiu čhưn ênguê ti ƀuôn prŏng Hồ Chí Minh, Hà Nội, Đà Nẵng leh anăn Quảng Ninh, mâo leh dŭm gưl ksiêm dlăng ti dŭm anôk hiu čhưn ênguê Dak Lak msĕ si: wăl hiu čhưn ênguê kban yuôl Ƀuôn Đôn, Đang dliê knŭk kna myuôm York Đôn, hiu dlăng gru jơ̆ng êman, hlăp hŏng êman, waih mran găn êa krông Sêrepol, ksiêm dlăng čư̆ boh tâo, ênao Lăk, nao čhưn ti đang pla mjing cacao leh anăn bruă hiu čhưn êngue êpul êya leh anăn mnơ̆ng kriê pioh hƀuê ênuk.

 Dŭm êpul ăt nao ksiêm dlăng dŭm sang jưh mơ̆ng 3 truh 5 mtŭ ti čar Dak Lak leh anăn bi siñê bi hgŭm hŏng dŭm anôk bruă duh mkra  mnia blei bruă hiu chưn ênguê ti Dak Lak. Leh 4 hruê hiu dlăng, Nguyễn Huyền Trang hriê mơ̆ng Hà Nội lač brei bi mguôp thiăm hŏng dŭm čar riêng gah čiăng mkŏ mjing hiu čhưn ênguê mlir gưl, čiăng kơ tuê dưi hiu dlăng lu hĭn./.