VOV4.Êđê- Aguah hruê 7/7, ti ƀuôn prŏng Kon Tum mkŏ mjing leh Klei bi kƀĭn tal 3, Êpul gơ̆ng bruă ƀuôn sang čar Kon Tum gưl XII hlăm 2 hruê hŏng lu bruă mjêč mâo mnuih ƀuôn sang mđing dlăng lehanăn mâo phung bi ala mđing bi trông, êmuh lehanăn bi mklă lu bruă djŏ hŏng klei dưi. Hưn mdah hdră mđĭ kyar bruă duh mkra – ala ƀuôn 6 mlan akŏ thŭn mơ̆ng Anôk bruă sang čư̆ êa čar Kon Tum ti anôk bi kƀĭn brei thâo, khădah hnơ̆ng mâo mnơ̆ng dhơ̆ng kluôm ti alŭ wăl đĭ 9,69%, lu hĭn mkă hŏng hnơ̆ng đĭ kyar thŭn êlâo, ƀiădah lu hnơ̆ng čuăn amâo djăp mkă hŏng klei čang hmăng.

Mbĭt anăn, dôk mâo lu klei gun kpăk ka dưi msir mghaih jing klei kpăk prŏng kơ hdră mđĭ kyar, msĕ si: Bruă ngă lŏ hma boh tŭ ƀiăm, mnơ̆ng ngă mâo ti ana Sâm Ngọc Linh ngă luič liê kơ ƀĭng ngă lŏ hma, boh tŭ bruă mkra mlih klei ngă hră m’ar, mkra mlih wăl anôk duh bi liê, mnia mblei, mđĭ ai bi ktưn mơ̆ng čar dôk êdu kƀah… Blŭ hrăm ti knăm anei, Dương Văn Trang, Khua hlăm Anôk bruă Đảng gưl dlông, Khua bruă Đảng čar, Khua êpul gơ̆ng bruă ƀuôn sang čar Kon Tum mtă kơ phung bi ala mđing ksiêm dlăng, ba mdah dŭm hdră msir amâo lui klei kpăk, êdu kƀah dôk mâo sui.

                                                    Pô mblang: H’Nêč Êñuôl