Aguah mbrue 16/5, ti Quảng Bình, bruă êdam êra CS Hồ Chí Minh lehanăn êpul hgŭm hlăk ai ba anăp Việt Nam pŏk leh klei rang mdah rup lehanăn hdruôm hră mơar čih kơ hƀuê ênuk mâo akŏ “Hing ang kơ êlan duôr čư̆ prŏng”. Ti anăn mâo leh lu phung kahan hđăp, hlăk ai ba anăp êlâo dih, phung knuă druh bruă êdam êra dŭm boh čar mơ̆ng Nghệ An, Hà Tĩnh, Quảng Bình, Quảng Trị, Thừa Thiên Huế, Quảng Nam, Dak Lak, Gia Lai, Kon Tum, Dak Nông lehanăn Bình Phước. Klei rang mdah mâo truh 200 pŏk rup, hră mơar lač kơ klei bi blah ktang phĭt ktue duôr čư̆ prŏng, hưn mthâo kơ dŭm boh tŭ dưn hlăk ai ba anăp mâo leh hlăm ênuk wưng mrâo./.

Ti Gia Lai, aguah 16/5, Êpul hgŭm knhuah gru lĭng kahan Trường Sơn ƀuôn prŏng Pleiku, čar Gia Lai mkŏ mjing leh Knăm bi hdơr 65 thŭn Hruê knhuah lĭng kahan Trường Sơn. Ti knăm anei, phung bi ala lŏ bi hdơr kơ knhuah gru kdrưh k’ăm mơ̆ng lĭng kahan Trường Sơn.

Êlan Trường Sơn – êlan Hồ Chí Minh mâo boh tŭ yuôm bhăn đru mguôp ai, mnơ̆ng dhơ̆ng hlăm hdră bi kdơ̆ng mblah Mi mtlaih ala čar, mtlaih kwar Dhŭng, hluh lir ala čar. Hruê anei, êlan Hồ Chí Minh jing sa hlăm dŭm ktuê êlan phŭn găn 28 čar, ƀuôn prŏng, hlăm anăn mâo ƀuôn prŏng Pleiku, čar Gia Lai, đru mguôp hlăm hdră mđĭ kyar bruă duh mkra – ala ƀuôn mơ̆ng alŭ wăl. Êpul hgŭm knhuah gru lĭng kahan Trường Sơn ƀuôn prŏng Pleiku ară anei mâo 87 čô hgŭm, lu jing phung kahan ruă duam, mnuih djŏ drao ruă dioxin. Khădah thŭn leh khua, ai leh awăt ƀiădah phung lĭng kahan Awa Hô ăt gĭr mă bruă knuă, mđĭ kyar bruă duh mkra gŏ sang./.