Lŏ dơ̆ng hlăm klei bi kƀĭn tal 6, Êpul gơ̆ng bruă ƀuôn sang čar Daknông gưl 4 hrue mbrue (6/7) trông čhai leh kơ bruă duh mkra ala ƀuôn. Khua knơ̆ng bruă sang čư̆ êa čar Daknông Hồ Văn Mười wĭt lač jih jang klei mnuih ƀuôn sang êmuh, boh nik kơ bruă čuăl mkă anôk mă bosit, klei kơ lăn ala. Wĭt lač jih jang klei anăn, ñu bi êdah 7 mta klei yuôm bhăn, năng mđing hlăm bruă mđĭ kyar klei duh mkra hlăm čar 6 mlan akŏ thŭn, lehanăn bruă srăng ngă hlăm wưng tinăp.  Hlăm anăn bruă čuăl mkă bosit mâo lu phung bi ala mđing êdi.

Khua knơ̆ng bruă sang čư̆ êa mñă tui si klei ksiêm mrâo anei hin, hnơ̆ng bosit Daknông mâo truh 60% kluôm ala, jing klei găl kơ čar. Ƀiădah boh sĭt ară anei dôk tuôm hŏng lu klei dleh dlan, klei gun kpăk. Ka mâo mơh klei bi mlih snăn truh 1062 mta bruă hlkăm čar čiăng ngă adôk mđĭ mđal hŏng klei čuăk mkă bosit, hŏng ênhă truh giăm 6.700ha. Klei anei ba klei amâo mâo jăk hŏng jih jang hdră êlan mơ̆ng čar Daknông, snăn mdei êjai, dôk dleh dlan hlăm klei iêo jak bruă duh bi liê./.

Hruê mbruê, hlăm gưl êmuh tal êlâo hlăm Klei bi kƀĭn tal 13, gưl XII, wưng 2021-2026 mơ̆ng Êpul gơ̆ng mnuih ƀuôn sang čar Gia Lai. Hlăm anăn, bruă homestay, sang mkŏ mjing soh hdră bhiăn leh anăn êmưt bi leh dŭm mta hdră kčah ti dŭm alŭ wăl hlăm čar, ƀuôn prŏng jing klei gun kpăk hŏng klei đĭ kyar leh anăn pŏk ngă dŭm hdră bruă bi liê.

Wĭt lač klei êmuh mơ̆ng phung bi ala kơ bruă klam dŭm anôk bruă kriê dlăng hlăm bruă čiăng kơ lu homestay, wăl mdei msăn, sang čhĭ kphê mnga mjing soh hdră bhiăn, Nguyễn Bá Thạch-  Khua Knơ̆ng bruă rŭ mdơ̆ng Gia Lai lač, bruă kriê dlăng knŭk kna kơ klei mkŏ mjing lu ti čar mâo klei ngă ngơi mang, hlăk êjai hdră bruă rŭ mdơ̆ng soh hdră bhiăn bi leh mrâo dưi thâo ƀuh, dleh msir mgaih, klei thâo săng mnuih ƀuôn sang kƀah, lu phung thâo soh ƀiădah ăt ngă mơh, ngă dleh dlan, bi kdung sui hruê mlan đŭ hŏng prăk čiăng lŏ mâo  hdră bruă rŭ mdơ̆ng soh hdră bhiăn.

 Bruă klei kơ sang lăn ară anei pătdah “kđăl ƀăng” ƀiădah lŏ bi klei mjhĭt muăt hlăm anôk bruă kƀĭn ala bi kƀĭn tal 5, Êpul gơ̆ng bruă ƀuôn sang čar Kon Tum gưl XII. Lu phung bi ala dôk hyưt kơ klei anei srăng hmăi amâo mâo jăk kơ ênoh hrui wĭt ngăn prăk kơ alŭ wăl hlăm thŭn anei. Hlăm 6 mlan akŏ thŭn, prăk čar Kon Tum mâo hrui wĭt mơ̆ng bruă sang lăn truh hlăm brô 90 êklai prăk, djăp mă 22,5% mkă hŏng klei tĭng.

Ti anôk trông čhai, phung bi ala Êpul gơ̆ng bruă ƀuôn sang čar, mâo Khua bruă Đảng ƀuôn prŏng Kon Tum Nguyễn Đức Tuy lač, mơ̆ng ară anei truh kơ jih thŭn ăt jing klei lông dlăng prŏng hŏng bruă sang lăn. Čiăng mâo ruh mgaih jih klei dleh dlan kơ bruă anei, kñăm mâo nanao ênoh dưi hrui wĭt hơĭt, kñăm čiăng kơ dŭm dhar bruă mâo hdră êlan mă bruă jăk, snăn lu phung bi ala lač, brei pral bi mlih ênoh ênil lăn ala lehanăn sang kñăm bi djŏ hŏng ênoh sĭt hlăm klei bi mnia mblei, ruh mgaih jih jang klei dleh hlăm bruă čuăl mkă, klei gun kpăk kơ klei bhiăn sang lăn./.