Mmăt hruê 29/8, bruă Đảng ƀuôn prŏng, Êpul gơ̆ng bruă ƀuôn sang,  Dhar bruă mặt trận čar kwar Việt Nam ƀuôn prŏng Hồ Chí Minh mkŏ mjing klei huă čhưn hŏng phung khua bi ala ti ƀuôn prŏng kkuh drông 79 thŭn mkŏ mjing ala čar yang ƀuôn ngă phŭn Việt Nam ti Anôk bruă sang čư̆ êa ƀuôn prŏng. Khua Knơ̆ng bruă sang čư̆ êa ƀuôn prŏng Hồ Chí Minh Phan Văn Mãi bi êdah klei mpŭ leh anăn ktưn hưn hŏng bruă tač êngao yuôm bhăn mơ̆ng ƀĭng găp ala tač êngao bi hgŭm leh hŏng ƀuôn prŏng čiăng pŏk ngă hlăm wưng êgao.

Mơ̆ng akŏ thŭn truh ară anei, ƀuôn prŏng drông leh êbeh 30 êpul gưl dlông ala tač êngao, mâo khua gĭt gai lu ala čar, leh anăn mâo giăm 100 klei drông phung tač êngao hŏng boh phŭn lu jơr, kƀĭn hlăm klei bi hgŭm bruă duh mkra kjăp. Klei anei bi êdah bruă klam leh anăn kơhưm ƀuôn prŏng hŏng ala tač êngao.

Ƀri bi hdơr 79 thŭn hrue mkŏ mjing lăn čar yang ƀuôn ngă phŭn   Việt Nam, aguah mbrue 30/8, phung khua kiă kriê bruă Đảng čar, Êpul gơ̆ng bruă ƀuôn sang, bruă sang čư̆ êa, knơ̆ng bruă mặt trận čar Daklak mbĭt hŏng êpul lĭng kahan lehanăn mnuih ƀuôn sang nao dưm leh kwang mnga, čuh brui mng\ưi ti msat 2.326 čô phung êngiă asei.

Hŏng klei mpŭ, dưm kwang mnga, čuh brui mngưi, kkui kŏ bi hdơr, bi êdah ai tiê thâo hdơr knga kơ phung săn leh asei mlei djiê êngiă kyua djuê ana, kyua lăn čar. Leh knăm čuh brui mngưi, phung khua kiă kriê čar Daklak mbĭt hŏng phung lĭng kahan lehanăn mnuih ƀuôn sang nao cŭt brui mngưi hlăm grăp ƀŭt msat phung djiê êngiă./.