Hlăm lu thŭn êgao, ti Gia Lai, mbĭt hŏng bruă klam kdơ̆ng mblah lehanăn mđĭ kyar bruă duh mkra lĭng kahan, dŭm êpul kahan pŏk ngă leh lu gru hmô bruă mtrŭt mjhar đru čung ba mbruă, kah mbha klei dleh dlan, đru bi hơĭt hdră duh ƀơ̆ng, čiăng mđĭ hnơ̆ng tŭ jăk klei hdĭp.

Hluê ngă gru hmô “Grăp hruê kăm đru kơ sa gŏ sang ƀun”, mơ̆ng thŭn 2023 truh kơ ară anei, Phŭn bruă lĭng kahan čar Gia Lai đru leh 750 gŏ sang ƀun, giăm ƀun lehanăn gŏ sang knŭk kna dlăng ba; mtrŭt mjhar êbeh 810 êklăk prăk, 1,7 ton braih, 47 hdră duh ƀơ̆ng mbĭt hŏng giăm 3.000 hruê ai mă bruă đru kơ mnuih ƀuôn sang mkra pưk sang. Thŭn 2024, gru hmô mâo Anôk mtrŭt mjhar bruă kiă kriê klei hâo hưn gưl dlông bi mni jing sa hlăm kjuh gru hmô “Đru čung ba mnuih ƀuôn sang mbruă” êdah êdi kluôm ala. Đại tá Khuất Bá Cao, Khua bruă Đảng, kơiăng khua knơ̆ng gĭt gai Binh đoàn 15, brei thâo, hŏng hdră “Đru duh ƀơ̆ng, bi guh mngač klei đăo knang”, hlăm thŭn 2024, Binh đoàn đru ngă leh 23 hdră bruă giăm 45 km êlan klei pui, 4.500 gơ̆ng, ênoh duh 4 êklai prăk; thŭn 2025 tĭng srăng ngă 13 hdră bruă dơ̆ng, hŏng ênoh êbeh 3 êklai prăk./.