Mmông mdei, anôk dlăng hră Sang hră gưl 2 Y-Ngông Niê Kđăm, să Quảng Phú, čar Dak Lak hĭn mơh mčhĭt mơuăt. Hlăm wăl sang dlông Êđê, anôk kriê pioh kjăp knhuah dhar kreh, ăt jing anôk dlăng hră mrâo mrang hŏng lu hdruôm hră, klei čih, maĭtĭng mkŏ hŏng Internet, lu phung hđeh nao dlăng hră, tui ksiêm hră mơar, hriăm hluê êpul amâodah nao mdei leh mmông hriăm. Adei H’Lulia Knul, hđeh adŭ 8A, brei thâo:

Kâo khăp êdi kơ sang dlăng hră anei kyua kâo dlăng msĕ si sang kâo, mâo lu klei čih yăl dliê čiăng dlăng lehanăn mâo lu hră mơar tui ksiêm, lŏ mđĭ klei thâo. Hlăm mmông mdei lehanăn mmông amâo hriăm kâo kreh hriê tinei. Pô dưi tui ksiêm lu mta hră mơar jăk mkăp kơ klei hriăm hră ăt msĕ mơh hriê tinei kâo ƀuh jăk ai tiê klei mĭn”.

Sang hră mguôp hŏng sang dlông knhuah gru anei dưi rŭ mdơ̆ng mơ̆ng thŭn 2020, mâo anôk bruă duh mkra Gưl dlông đru prăk rŭ mdơ̆ng. Mbĭt hŏng anăn, lŏ mâo 4 pruê̆ sang hriăm hŏng 30 boh adŭ, 1 boh sang hriăm mjuăt lu mta, 1 sang phung nai kiă kriê, tač hlăp… rơ̆ng klei găl mtô bi hriăm kơ êbeh 1.100 čô hđeh hriăm hră.

Nguyễn Long Điện, Khua sang hră brei thâo, hlăm dŭm thŭn êgao, Sang hră gưl 2 Y-Ngông Niê Kđăm mâo tŭ mă lu klei đru čiăng bi leh anôk bruă nah gŭ. Hŏng 70% ênoh mnuih jing Anak Êđê, grăp klei đru amâo djŏ knŏng đru mđĭ hnơ̆ng tŭ hdră mtô bi hriăm ƀiădah lŏ đru bi hrŏ klei bi kpleh mơ̆ng dŭm krĭng jăk găl lehanăn krĭng dleh dlan.

Knơ̆ng prăk Agribank mâo leh hdră đru hŏng hnơ̆ng lu mkă hŏng dŭm anôk bruă knơ̆ng prăk mkăn, đru lu êdi kơ sang hră. Hdră đru anei đru rŭ mdơ̆ng 2  anôk bruă nah gŭ ba wĭt boh tŭ yuôm kơ sang hră, mkăp kơ hdră mtô bi hriăm”.

Amâo djŏ knŏng hrăm mbĭt hlăm anôk bruă mtô bi hriăm, dŭm anôk bruă duh mkra lŏ hgŭm kngan hŏng alŭ wăl lăm lui sang dôk êjai, đru kơ mnuih ƀuôn sang krĭng dleh dlan mâo sang dôk hơĭt kjăp. H’Bliăk Niê, ti ƀuôn Êa Dhô, să Čư̆ Pơ̆ng, mgei ai tiê hlăk dưi mŭt dôk hlăm sang mrâo giăm 100 m2. Klei hdĭp hlăm sang hđăp, điêt, ñu ka tuôm bi mĭn kơ sa boh sang mrâo, kjăp msĕ si ară anei.

Kâo mơak êdi hlăk dưi dôk hlăm sang mrâo, mơak êdi yơh, kâo kreh sut piăt nanao. Ară anei mâo anôk dôk, mâo dhiăr pưh, mâo tivi, kâo mơak êdi.

Gŏ sang H’Bliăk jing sa hlăm 66 gŏ sang ti să Čư̆ Pơ̆ng dưi đru rŭ mdơ̆ng sang kjăp hlăm hdră lăm lui sang dôk êjai, sang tĭ ƀrôč mơ̆ng Knŭk kna. Y-Blưn Mlô, K’ơiăng khua hđăp Anôk bruă sang čư̆ êa să Čư̆ Pơ̆ng hđăp, Khua bruă Đảng ƀuôn Êa Dhô brei thâo, mbĭt hŏng klei đru mơ̆ng Knŭk kna, dŭm anôk bruă duh mkra hgŭm kngan, đru kơ alŭ wăl bi leh mta kñăm mâo kčah mtrŭn, mjing anôk jưh hơĭt kjăp kơ mnuih ƀuôn sang bi hơĭt anôk dôk.

Hlăk mâo klei đru mơ̆ng knơ̆ng prăk lŏ hma snăn mnuih ƀuôn sang amâo mâo klei mđing uêñ ôh. Ară anei diñu mđing mđĭ kyar bruă duh mkra pla mjing, diñu mâo klei sa ai”. 

Hluê ngă hdră mtrŭn bi hrŏ ƀun lehanăn hdră đru kơ ala ƀuôn, hlăm 5 thŭn êgao, čar Dak Lak mtrŭt mjhar rŭ mdơ̆ng lehanăn mkra mđĭ sang dôk dŭm êbâo gŏ sang ƀun lehanăn giăm ƀun; đru prăk hriăm hră, braih mkuê̆, prăk ƀơ̆ng, prăk sang dôk kơ êbeh 72 êbâo čô hđeh hriăm hră, phung hriăm gưl prŏng dleh dlan. Čar ăt mkăp giăm 3,3 êklăk hră ênua mdrao mgŭn lehanăn msir mghaih êbeh 148 êbâo gŏ sang čan prăk hŏng ênoh êbeh 5.900 êklai prăk.

Mbĭt hŏng klei đru mơ̆ng knŭk kna, dŭm êpul bruă, anôk bruă duh mkra lehanăn mnuih đru mguôp dŭm pluh êklai prăk kơ hdră đru kơ ala ƀuôn, mơ̆ng hdră đru prăk hriăm hră, sang dôk, dlăng kriê mnuih awăt, truh kơ bruă mkra kban, mdơ̆ng adŭ hriăm ti dŭm krĭng dleh dlan. Dŭm bruă ngă anei đru bi lar ai tiê thâo bi đru kơ dŭm klei hdĭp dleh dlan, mđĭ ai diñu gĭr ktưn kpưn đĭ. Lê Văn Thịnh, Khua knơ̆ng prăk Agribank Dak Lak brei thâo:

“Hlăm dŭm thŭn êgao, anôk bruă pŏk ngă leh bruă đru kơ ala ƀuôn hŏng lu hdră, mơ̆ng klei đru kơ phung hđeh hriăm hră, đru mdơ̆ng sang hră, anôk mtô bi hriăm, hdră đru lăm lui sang dôk êjai sang tĭ ƀrôč hluê hdră mtrŭn mơ̆ng Knŭk kna. Anăp anei, êpul mâo leh hdră kčah đru anôk bruă nah gŭ ti dŭm boh sang hră lehanăn lăm lui 50 boh sang dôk êjai hlăm čar.

Amâo djŏ knŏng đru kơ mnơ̆ng dhơ̆ng, dŭm hdră hrăm mbĭt, đru kơ ala ƀuôn mơ̆ng dŭm êpul êya bruă lŏ đru mguôp bi lar klei đua klam kyua êpul êya, bi êdah ai tiê thâo bi đru, bi êdah knhuah gru thâo khăp mơ̆ng djuê ana drei, čiăng êpul êya hrăm mbĭt mđĭ kyar, amâo lui hlei pô dôk ti tluôn./.