VOV4.Êđê - Mđing truh kơ klei kƀĭn Phung bi ala kluôm ala tal 12 mơ̆ng Êpul bruă hđeh êdam êra cộng sản Hồ Chí Minh, Êpul khua bruă hđeh êdam êra gưl dlông mkŏ mjing leh lu mta bruă mâo boh tŭ yuôm bhăn. Hlăm anăn mâo klei bi lông čih mkra Logo, klei mmuñ bi ala mơ̆ng klei kƀĭn prŏng leh anăn rup mđĭ ai bruă hâo hưn kơ klei kƀĭn kluôm ala bruă Đoàn tal 12.

Klei bi lông čih mčeh mđing truh kơ Klei bi kƀĭn bruă Đoàn kluôm ala gưl 12 mtrŭt mjhar, jak iêu êbeh 200 čô hŏng 368 klei čih ba m’ĭt bi lông. Hluê si klei čoh čuăn, dŭm mta klei ba bi lông bi êdah k’hưm, klei tŭ yuôm mơ̆ng Klei bi kƀĭn bruă Đoàn kluôm ala, mñă klă knhuah gru jăk siam mơ̆ng phung êdam êra jing klei čang hmăng, ba anăp, jhŏng ktang, hgŭm mguôp, mĭn mrâo, đĭ kyar; Bi êdah hƀuê ênuk mkŏ mkra lehanăn đĭ jing mơ̆ng Đoàn êdam êra Cộng sản Hồ Chí Minh. Anôk mkŏ mjing jao leh 1 klei pah mni mrô 1, 1 klei pah mni mrô 2, 1 klei pah mni mrô 3, 4 klei pah mni mtrŭt mđĭ ai lehanăn pah mni sa čô mâo lu klei čih ba bi lông. Hlăm anăn, klei pah mni mrô 1 dưi jao kơ pô čih mčeh Vũ Hồng Quân, ti Hà Nội. Klei pah mni mrô 1 mâo Anôk bruă brei klei pah mni tĭng dlăng jing mâo klei mĭn mrâo mrang, čih mčeh klă mngač, khuăt, dưi mkra mjing mnơ̆ng kƀăk ti ao, hdră mkra dưi dưm ti lu mta mnơ̆ng lehanăn hluê ngă hŏng lu mta mdê mdê. Vũ Hồng Quân, pô mâo mă klei pah mni mrô sa brei thâo: “Klei bi êdah anei mơ̆ng kâo, kâo mẳup mơ̆ng siap čĭm čiăng bi êdah klei gĭr ktưn kpưn đĭ mơ̆ng êpul êdam êra, ăt msĕ mơh klei hur har mơ̆ng phung êdam êra ti djăp krĭng kwar hlăm ala čar. Klei bi mĭn leh kâo ngă mta mnơ̆ng anei jing êa mil mtah mơ̆ng êpul êdam êra, êa mil klei čang hmăng, anăn ăt jing êa mil bi êdah kơ phung êdam êra, jing êa mil bi êdah kơ klei čang hmăng mơ̆ng phung êdam êra kyua anăn yơh kâo yua êa mil mtah jing mta phŭn mkra logo anei.

Hluê si Khua bruă Đoàn êdam êra Cộng sản Hồ Chí Minh gưl dlông Nguyễn Tường Lâm: Logo mâo mă klei pah mni jing klei bi êdah klă klơ̆ng mơ̆ng Klei bi kƀĭn bruă Đoàn kluôm ala tal 12 lehanăn dưi hưn mthâo hlăm kdrăp hâo hưn kơ lu mnuih lehanăn kdrăp ênuk mrâo ară anei: “Logo anei srăng dưi ba yua nanao, mơ̆ng ară anei truh kơ mkŏ mjing klei bi kƀĭn lehanăn êdei kơ klei bi kƀĭn. Hmei ăt pŏk ngă lu hdră čiăng mtrŭt mđĭ bruă hâo hưn mtô mblang kơ logo mjing klei bi mjĕ mjuk plah wah phung đoàn viên hŏng mta mnơ̆ng mkra mơ̆ng drei ruah hruê anei. Mbĭt hŏng bruă bi mlih logo klei bi kƀĭn bruă Đoàn mơ̆ng êlâo anăn anei srăng jing logo klei bi kƀĭn bruă Đoàn kluôm ala lehanăn êdei hĭn jing dăl hlăm wưng păn bruă 12 kơ anăp, klă sĭt logo anei srăng dưi ba yua hlăm lu hdră bruă mơ̆ng Đoàn”.

Mrâo anei, Khua bruă Đoàn êdam êra Cộng sản Hồ Chí Minh gưl dlông ăt hưn mthâo klei mmuñ klăklơ̆ng mơ̆ng Klei bi kƀĭn bruă Đoàn kluôm ala tal 12. Mbĭt anăn, pah mni lehanăn lar bra 11 klei mmuñ mâo mă klei pah mni mta A lehanăn jao hră pah mni kơ 29 klei mmuñ pah mni mta B. Hluê anăn, klei mmuñ   “Sứ mệnh thanh niên” mâo Êpul hgŭm bruă nghệ thuật ba mdah lehanăn Anôk kiă kriê bruă Đoàn gưl dlông tŭ ư ruah anei jing klei mmuñ klă klơ̆ng mơ̆ng Klei bi kƀĭn bruă Đoàn kluôm ala tal 12. Klei mmuñ mâo Quản Văn Hải čih mčeh boh blŭ, ênhiang mmuñ mơ̆ng Quang Huy hŏng dŭm boh blŭ hlai mbĭt hŏng ênhiang mmuñ mjing leh sa klei mmuñ jăk jĭn, ktưn hưn. Nhạc sĩ Quang Huy bi ala êpul čih mčeh brei thâo: Khădah phung čih mčeh amâo djŏ jing phung thâo čih klei duê lu ôh, ƀiădah hŏng sa čô mâo klei thâo ngă bruă Đoàn, nhạc sỹ đăo knang srăng mâo klei duê jăk êdi čiăng hlai mbĭt hŏng ênhiang mmuñ mjing klei jăk êdi kơ klei mmuñ anei: “Kâo bi mni leh pŏk rup phung êdam êra cộng sản Hồ Chí Minh hŏng ênhiang mmuñ êdu ê’un, mơ̆ng tal êlâo bŏ hŏng klei ktưn hưn lehanăn êdei kơnăn jing wăl anôk ênhiang mmuñ jiă knhuah kơ phung êdam êra lehanăn bŏ ai tiê ênuk mrâo mơ̆ng gưl ară anei”.

Anôk mkŏ mjing tŭ mă leh 131 klei mmuñ mơ̆ng 125 čô hriê mơ̆ng 43 alŭ wăl hlăm kluôm ala. Anei jing klei čih mčeh mrâo, siă suôr hŏng hdră bruă Đoàn lehanăn hdră bruă êdam êra – hđeh êlăk wưng thŭn ară anei. Hlăm hdră anei, Anôk mkŏ mjing ăt jao klei pah mni mta A lehanăn klei pah mni mta B kơ pô čih mčeh 40 klei mmuñ. Nhạc sỹ Doãn Nguyên, mnuih hgŭm hlăm Êpul hgŭm bruă nghệ thuật tĭng dlăng: Dŭm klei mmuñ mâo čih mčeh tal anei bi êdah bruă klam, k’hưm mơ̆ng Đoàn êdam êra Cộng sản Hồ Chí Minh hlăm phung hđeh êlăk – êdam êra, mtrŭt mđĭ ai tiê hgŭm mguôp, ba anăp mơ̆ng phung êdam êra hlăm ênuk gưl mkŏ mkra lehanăn răng mgang ala čar: “Asăp hưn mthâo hlăm klei mmuñ anei klă nik êdi, bi êdah knhuah hdĭp thâo săn asei mơ̆ng dŭm ênuk gưl êdam êra ară anei, klei đua klam hŏng lăn čar, hŏng ƀuôn sang klă êdi, knŏng hlăm brô 4 – 5 mnĭt kyua anăn boh blŭ hlăm klei mmuñ mâo klei hrŏng ruah klă nik. Anei jing mta mrâo êdi hlăm hdră mtrŭt mjhar tal anei”.

Leh knăm hưn mthâo lehanăn jao klei pah mni klei bi lông, Anôk mkŏ mjing mtrŭt mjhar leh klei bi lông “Ênhiang mmuñ phung êdam êra”, mtrŭt mjhar phung nghệ sĩ hing ang rang mdah klei mmuñ klă klơ̆ng mơ̆ng Klei bi kƀĭn, mjing tač hlăp kơ phung êdam êra kkuh m’ak Klei bi kƀĭn bruă Đoàn kluôm ala tal 12 hlăm kdrăp mrô, hla pŏk web yang ƀuôn.

Mbĭt hŏng anăn, hlăm wưng êgao, bruă Đoàn êdam êra Cộng sản Hồ Chí Minh mkŏ mjing leh Klei bi lông čih kač rup hưn mthâo, mtô mblang kơ Klei bi kƀĭn bruă Đoàn kluôm ala tal 12. Dŭm pŏk rup ba bi lông dưi bi êdah klă boh phŭn lehanăn ai tiê mơ̆ng Klei bi kƀĭn phung bi ala kluôm ala čar bruă Đoàn êdam êra Cộng sản Hồ Chí Minh tal 12 nsĕ si: K’hưm, klei tŭ yuôm mơ̆ng Klei bi kƀĭn bruă Đoàn kluôm ala, mñă klă dŭm pŏk rup bi êdah knhuah gru jăk mơ̆ng phung êdam êra, mta kñăm, bruă klam mơ̆ng êpul bruă Đoàn lehanăn phung êdam êra Việt Nam hlămênuk gưl mrâo, hƀuê ênuk mkŏ mjing lehanăn đĭ kyar mơ̆ng bruă Đoàn êdam êra Cộng sản Hồ Chí Minh; kơ bruă klam lehanăn klei đru mguôp mơ̆ng êpul bruă Đoàn êdam êra Cộng sản Hồ Chí Minh lehanăn phung mda asei kluôm ala hlăm hdră mkŏ mkra lehanăn răng mgang Ala čar./.