Lu dŭm hdră bruă jhat rai kjham kyua knơ̆ng kdơ̆ng êa kma êa, jhat lu mta msĕ si kđang, mčah êlan mđoh êa leh anăn êlan pŏk êa… Ênoh bi liê mkra mđĭ 115 knơ̆ng kdơ̆ng êa jhat rai êbeh 820 êklai prăk. Hlăm anăn, prăk bi liê dưi mkra mđĭ kơ 12 hdră bruă hlăm thŭn 2024 giăm 56 êklai prăk; ênoh bi liê mĭn tĭng čiăng bi liê mkra mđĭ kơ 103 hdră bruă ƀiădah ka mâo ôh ênoh prăk jing êbeh 760 êklai prăk. Čiăng rơ̆ng êđăp ênang hlăm wưng anei, dŭm anôk bruă djŏ tuôm mtă brei mkhư̆ hnơ̆ng mgơ̆ng êa ti dŭm hdră bruă huĭ luč klei êđăp ênang.

Ti anăp klei mâo dleh dưi ksiêm dlăng mơ̆ng yan adiê, čar Dak Nông mkŏ mjing leh Êpul nao ksiêm dlăng dŭm ênao mgơ̆ng êa čiăng mâo hdră msir mghaih. Khă snăn, klei năng mđing, kluôm čar knŏng mâo 30/256 bĭt ênao êa mâo hdră lŏ mkra wĭt čiăng dưi mdrơ̆ng hŏng boh klei mjêč tơdah tăm mâo.

Anôk bruă djŏ tuôm mơ̆ng čar bi mklă, mâo 81 hdră jhat rai, amâo rơ̆ng klei êđăp ênang. Dŭm anôk anei dôk klưh hroh ti nah dlông lehanăn nah tluôn; nah dlông ka dưi bi kjăp hŏng bêtông amâodah dưi mkra ƀiădah jhat leh; lu hdră pŏk phai êa jhat val, ngă mlai êa. Čar Dak Nông dôk čiăng klei đru mơ̆ng Gưl dlông kñăm hnưm mâo hdră mdrơ̆ng hŏng boh klei amâo jăk huĭ mâo, pral mkra mđĭ dŭm anôk jhat rai./.