Êpul anôk dôk mrô 8, ƀuôn hgŭm Tân Tiến, ƀuôn prŏng Buôn Ma Thuột, čar Daklak mâo 62 čô đảng viên. Vũ Thị Huê – Khua bruă Đảng brei thâo: Mơ̆ng thŭn 2019 truh ară anei, grăp thŭn anôk bruă Đảng mâo bi mŭt mơ̆ng 2 - 3 čô đảng viên. Hjăn hlăm mkrah thŭn 2024 anei mâo bi mŭt leh 3 đảng viên. Phung đảng viên mrâo jing phung thâo hră sơăi mơ̆ng gưl 3 kơ dlông, mâo klei mĭn kjăp, thŭn dôk mda. 5 thŭn mtam, bruă Đảng anei mâo leh êpul bruă Đảng ƀuôn hgŭm Tân Tiến yap jing sa êpul bruă Đảng nah gŭ bi leh jăk bruă kčah jao. Vũ Thị Huê lač: 

 “Drei jao ênoh čuăn kơ 7 êpul hgŭm êya hlăm alŭ wăl anôk dôk, pioh ruah mnuih mâo klei kdlưn hĭn hưn mthâo brei bi mŭt hlăm Đảng. Phung hlăk ai mơ̆ng bruă êdam êra mâo klei bi ktưn snăn hrŏng mă mơ̆ng diñu. Kâo ƀuh mâo lu klei jăk găl jing brei diñu nao hriăm klei bhiăn Đảng lehanăn bi mŭt.” 

Phan Thành Tiến jing đảng viên mda asei mâo bi mŭt hlăm êpul bruă Đảng ti êpul bi mguôp mrô 8 hlăk mlan 5/2024 leh êgao. Tiến kah mbha, mơ̆ng hlăk dôk hriăm ti sang hră gưl prŏng mâo nao hriăm leh kơ klei bhiăn Đảng lehanăn ngă nanao bruă bi ktưn tơl mâo mŭt hlăm Đảng. Leh ruĕ hriăm gưl prŏng wĭt mă bruă ti ƀuôn hgŭm Tân Tiến, ñu ăt bŏ hŏng klei thâo gĭr, mjuăt hriăm kñăm bi leh jăk bruă kčah jao, jih ai tiê hur har hlăm jih bruă ƀuôn sang. Hlăm hrue 8/5 leh êgao, ñu mâo leh klei myun mâo yap jing sa hlăm 2 čô phung kdlưn hĭn dưi bi mŭt hlăm Đảng. Tiến lač: 

 “Kyua êjai hlăm klei dôk ngă bruă ti anôk bruă, kâo gĭr tui gưt ênŭm klei bhiăn, lehanăn gĭr jih ai tiê hlăm bruă knuă. Mơ̆ng anăn, phung khua kiă kriê mjing leh djăp klei găl brei nao hriăm klei bhiăn Đảng, lehanăn truh mlan 5/2024 kâo mâo klei mŭt dưi mŭt hlăm Đảng.” 

Anôk bruă Đảng ƀuôn hgŭm Tân Tiến, ƀuôn prŏng Buôn Ma Thuột ară anei mâo leh 587 čô đảng viên, bi mguôp leh ti 20 anôk bruă đảng nah gŭ, hlăm anăn mâo 13 êpul bruă đảng nah gŭ, 4 êpul bruă Đảng ti sang hră lehanăn êpul bruă kahan ksiêm, êpul lĭng kahan, lehanăn anôk bruă sang êa drao. Hlăm dŭm thŭn êgao, bruă Đảng ƀuôn hgŭm bi leh jăk bruă mđĭ kyar đảng viên mda asei lehanăn mâo leh êpul bruă Đảng Buôn Ma Thuột dưi yap jing êpul bruă Đảng mâo klei đĭ kyar kjăp.

Tui si Nguyễn Đình Ninh – Khua bruă Đảng ƀuôn hgŭm Tân Tiến, dlăng kơ bruă bi mŭt phung đảng viên mda asei jing bruă yuôm bhăn, bruă Đảng ƀuôn hgŭm mâo bruă klam kơ grăp êpul bruă Đảng nah gŭ, hrŏng ruah, bi hriăm mbŏ phung tŭ kdlưn. Jih jang dŭm êpul bruă Đảng mâo bi leh jăk bruă djŏ hŏng hdră kčah, tơl hnơ̆ng mâo đa đa êpul bruă Đảng kdlưn hĭn kơ hdră kčah. Nguyễn Đình Ninh yăp dliê kơ jih jang bruă pô găn leh, hlăm klei bi hriăm mbŏ, lehanăn bi mŭt phung đảng viên mda asei ti êpul bruă Đảng ƀuôn hgŭm Tân Tiến hlăm wưng ară anei:   

 “Phung hđeh mda asei leh ruĕ hriăm bruă knuă wĭt hŏng ƀuôn sang, ka mâo bruă knuă mă, hmei iêo digơ̆ mŭt hlăm êpul čŏng răng mgang ƀuôn sang, amâodah nao bi mguôp hlăm êpul bruă êdam êra, kăp lŏ ksiêm dlăng, đru ba, čiăng kơ diñu jih ai tiê bi hgŭm hlăm bruă hŏng alŭ wăl. Mơ̆ng anăn hmei srăng ruah phung jing kdlưn hĭn, pioh kơ bruă bi mŭt hlăm đảng.”

Boh sĭt brei ƀuh, bruă bi mŭt hlăm Đảng ti ƀuôn hgŭm Tân Tiến, ti ƀuôn prŏng Buôn Ma Thuột mâo ngă leh jih jang bruă hŏng klei tŭ jing. Mơ̆ng anăn, dưn yua jih bruă klam mơ̆ng êpul bruă đảng nah gŭ, đru mđĭ kyar bruă duh mkra - yang ƀuôn lehanăn mkŏ mjing bruă Đảng ƀuôn hgŭm Tân Tiến knư̆ hrue knư̆ mâo klei đĭ kyar kluôm dhuôm.