Klei čih, video mơ̆ng dŭm fanpage mâo k’hưm, bi mlih avatar mơ̆ng klei dôk kreh yua nao kơ klei bi knăl jing jŭ kô̆ hŏng dŭm rup khua gĭt gai lehanăn mâo dŭm klei čih bi êdah ai tiê – anăn yơh jing klei lu mnuih hnĭng ênguôt kơ khua gĭt gai pô thâo kđi prŏng mơ̆ng cách mạng Việt Nam hlăm hla pŏk yang ƀuôn. Hmei tui mă dŭm klei bi čih anăn snei:

- Bŏ hŏng klei khăp lehanăn hnĭng kơ A wa, A wa ngă leh bruă tơl jih klei hdĭp kyua mnuih ƀuôn sang, kyua lăn čar.

 - Ênguôt hnĭng êdi kơ sa čô pô kdlưn hĭn mơ̆ng Đảng Cộng sản Việt Nam.

- Klei đăo knang kơ Đảng kbiă hriê mơ̆ng knhuah jăk jĭn mơ̆ng A wa.

- Klei thâo luă gŭ, lehanăn klei êdu êun mơ̆ng A wa mjing leh sa knhuah dôk dơ̆ng ƀơ̆ng huă jăk êdi mơ̆ng ală mnuih ƀuôn sang dlăng.

- Kpŭ kơ mnguh mngăt Khua gĭt gai Đảng lui kơ tluôn klei đăo knang guh mngač, lehanăn kơ klei hdĭp mgi dih jăk siam kơ lăn čar êdei anăp.

-Năng ai hŏng lu mnuih, diñu klă sĭt thâo săng si jing cộng sản, ƀiădah dlăng kơ Khua gĭt gai Đảng, diñu thâo săng yơh si jing kơ sa čô mnuih cộng sản, si jing sa knhuah hdĭp mơ̆ng cộng sản.

Lehanăn lŏ mâo lu klei duê, bi êdah ai tiê ênguôt hnĭng hŏng khua gĭt gai Đảng Nguyễn Phú Trọng. Hlăm hla pŏk yang ƀuôn pô, Đại sứ Vũ Quang Minh – Khua bi ala knŭk kna Việt Nam ti Alemang, Khua bi ala knŭk kna Việt Nam êlâo dih ti Campuchia lehanăn ti Angle, kiă kriê Ireland lŏ yăl dliê kơ sa klei bi hdơr hlăk mâo tui nao mbĭt hŏngKhua gĭt gai Đảng Nguyễn Phú Trọng hlăm klei ñu nao čhưn truh ti Campuchia hlăk mlan 7 thŭn 2017.

-Ti Sihanoukville, êjai mprăp kơ klei mkŏ mjing mmông bi tuôm hŏng khua gĭt gai hŏng phung ayŏng adei ngă bruă ti anôk bruă bi ala knŭk kna lehanăn mnuih ƀuôn sang, Khua gĭt gai truh hnưm hĭn, êjai ayŏng amai adei dôk piăt êmiêt. Kyua kdjăt, ƀuh khua gĭt gai nao lehanăn mđrăm mbĭt hŏng ayŏng amai adei pŭ jhưng mdhô̆ mbĭt hŏng hmei, hlăm klei jih jang mnuih mâo klei bi kngăr.

-Hmei bi lač hdơ̆ng hmei, tơdah lŏ hdơr kơ hrue bi hdơr amâo mâo dưi wơr ôh anăn, jing čang hmăng srăng lŏ mâo lu gưl ñu mđrăm mbĭt bi pŭ mdhô̆ bi blŭ hrăm msĕ si hlăm sa boh sang h’uh mđao.

Bi pô ngă bruă klei mrâo, pô mbruă mkra êa čê Hoàng Anh Sướng, dua blư̆ mâo bi tuôm hŏng khua gĭt gai Nguyễn Phú Trọng amâo mâo dưi wơr ôh klei leh bi tuôm, hlăm anăn mâo mmông pŭ ba êa čê kơ Khua gĭt gai China Tập Cận Bình.  Hoàng Anh Sướng lač:

"Hlăk Tập Cận Bình hriê čhưn kơ Việt Nam, A wa Nguyễn Phú Trọng iêo leh kâo mkŏ mjing klei jum tue mnăm êa čê aguah hrue 13/11/2017 ti sang krum A wa Hô. Anei jing gưl tal dua kâo mâo bi tuôm hŏng a wa.

Ăt hŏng knhuah anăn, êdu êun, thâo jĕ giăm, mhač tlao, kâo ƀuh a wa Nguyễn Phú Trọng msĕ hŏng sa čô nai hĭn hŏng sa čô ngă bruă kđi čar. Kyua mơ̆ng klei anăn yơh ñu mjing leh klei bi tuôm plah wah dua čô khua gĭt gai mơ̆ng dua ala čar Khua gĭt gai Nguyễn Phú Trọng lehanăn Khua gĭt gai Tập Cận Bình jing bi jĕ giăm hĭn, mơak mñai hĭn, h’uh mđao, êđăp ênang.

Kyuanăn êdei anei, ƀuh klei ñu bi kdơ̆ng hŏng klei ƀơ̆ng ngăn, kâo lŏ bi kngăr hĭn. Dôk hlăm lam ai tiê êdu êun, êđăp ênang anăn dlăng msĕ hŏng sa čô nai anei, jing lŏ mbŏ hlăm ñu klei klă klơ̆ng ktang kjăp, kut kat bi rai jih klei ƀơ̆ng ngăn, mkhư̆ bi jih klei jhat, klei măk. Mnuih ƀuôn sang khăp mnuih ƀuôn sang mpŭ kơ ñu kyua knuih anăn yơh.

Amâo srăng dưi yăl dliê jih ôh dŭm ai tiê, klei bi hdơr, lehanăn klai khăp mâo mnuih ƀuôn sang kah leh kơ khua gĭt gai Nguyễn Phú Trọng – jing khua kiă kriê mâo leh mnuih ƀuôn sang khăp, mah jiăng ala tač êngao mpŭ; sa čô pô thâo kđi prŏng, dlăng kơ k’hư̆m anak mnuih jing yuôm bhăn hĭn, păn kjăp klei bhiăn, hdĭp jih klei hdĭp kyua lăn čar, kyua mnuih ƀuôn sang.

Sa tiê boh mdei amâo lŏ kpư̆, ngă leh kơ dŭm êklăk aruăt êa ală luh./.