VOV4.Êđê - Êpul khua gĭt gai mơ̆ng Mặt trận čar kwar gưl dlông Việt Nam mrâo mâo klei hưn mdah kơ boh tŭ klei ksiêm dlăng mơ̆ng anôk bruă anei yap mơ̆ng klei kƀĭn tal 2 truh kơ klei kƀĭn tal 3, bruă kƀĭn ala gưl 15. Mbĭt hŏng bruă bi leh hdră ksiêm wĭt kluôm thŭn 2021, êpul mkŏ mjing leh 10 mta phŭn ksiêm dlăng hluê si hdră kčah leh anăn klei bi mgăl yang ƀuôn thŭn 2022. Dŭm mta bruă ksiêm dlăng mâo sơăi boh tŭ phŭn kčưm yuôm bhăn, đru hlăm bruă mkra mlih, mgaih msir dŭm klei dôk awăt êdu, klei dleh kpăk leh anăn bi lar, pah mni dŭm boh tŭ jăk hlăm dŭm mta bruă mdê mdê…Thŭn 2022, Mặt trận čar kwar gưl dlông Việt Nam gĭt gai ksiêm dlăng dŭm mta phŭn yuôm bhăn msĕ si: Bruă mtô mjuăt, bi hriăm knhuah hdĭp phung ba anăp, phung knuă druh kmeh gơ̆ng, đảng viên. Bruă hluê ngă hdră êlan đru kơ mnuih mă bruă leh anăn phung yua mnuih mă bruă tuôm hŏng klei dleh dlan kyua klei ruă tưp Covid-19, bruă mgaih msir dŭm klei kčŭt hưn dleh leh anăn sui. Bruă hluê ngă hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng.

Y-Ƀel pô mblang