VOV4.Êđê - Tlam 20/4, mkŏ mjing leh Klei bi kƀĭn mlir Dhar bruă kƀĭn ala hŏng bruă mặt trận čar kwar gưl dlông Việt Nam. Hlăm klei bi kƀĭn, Khua bruă kƀĭn ala Vương Đình Huệ čih yap, bi mni kơ bruă mặt trận čar kwar leh anăn dŭm êpul hgŭm ƀrư̆ hruê ƀrư̆ bi mklă bruă klam yuôm bhăn jing êpul bruă bi ala kơ mnuih ƀuôn sang, jing sa êpul bruă yuôm bhăn hlăm bruă kđi čar ti ala čar drei. Khua bruă kƀĭn ala bi mklă bruă bi hgŭm plah wah Êpul khua Dhar bruă mặt trận čar kwar Việt Nam gưl dlông leh anăn Dhar bruă kƀĭn ala amâo mdei dưi mđing dlăng, mkra mđĭ.

Mbĭt anăn mtă kơ bruă mặt trận čar kwar Việt Nam leh anăn dŭm êpul bruă hgŭm lŏ dơ̆ng ksiêm dlăng 5 êpul bruă klam, hdră msir hlăm klei blŭ hrăm gĭt gai mơ̆ng Khua gĭt gai Đảng Nguyễn Phú Trọng hlăm Klei bi kƀĭn mơ̆ng Dhar bruă mặt trận čar kwar Việt Nam gưl dlông mlan 8/2021, ngă jăk hĭn bruă klam jing kmeh gơ̆ng kđi čar hlăm klei bi hgŭm djuê ana, jing kban mkŏ kjăp plah wah mnuih ƀuôn sang hŏng Đảng leh anăn Knŭk kna./.

H’Zawut pô mblang