VOV4.Êđê- Hlăm dŭm hruê êgao, hlăm ktuê knông lăn dŭm čar Lăn Dap Kngư, mkŏ mjing lu bruă ngă kdrưh kơăm bi hdơr knăm mơak răng mgang knông lăn 3/3, iêô jak lu mnuih ƀuôn sang dŭm djuê ana ti alŭ wăl hgŭm. Ti krĭng wăl knông lăn 2 čar Dak Lak leh anăn Dak Nông, Anôk bruă gĭt gai lĭng kahan răng mgang knông lăn 2 čar mđup brei leh dŭm mta mnơ̆ng yuôm bhăn, mđĭ ai mnuih ƀuôn sang krĭng wăl knông lăn gĭr hgŭm răng mgang klei dưi êngiê knông lăn ala čar.

Čar Dak Lak mâo êlan knông lăn hŏng boh taih êbeh 73 km, bi knông hŏng čar Mondulkiri, ala čar Campuchia. Alŭ wăl knông lăn čar Dak Lak mâo 4 să, hlăm 2 kdriêk Ƀuôn Đon leh anăn Ea Sup, jing anôk hdĭp mda mơ̆ng êbeh 22.000 čô mnuih ƀuôn sang mơ̆ng 26 djuê ana mdê mdê. Thŭn 2021, gưl bruă Đảng nah gŭ, bruă sang čư êa alŭ wăl mâo leh klei bi mguôp kjăp hŏng lĭng kahan knông lăn răng mgang klei dưi kiă kriê, rơ̆ng klei êđăp ênang krĭng knông lăn. Klă klơ̆ng, hlăm dŭm să knông lăn mâo truh kơ 26 êpul êya, êbeh 480 gŏ sang leh anăn êbeh 1.600 čô bi klă nao hgŭm hlăm bruă răng mgang knông lăn, gơ̆ng knông lăn. Êngao kơ anăn, mnuih ƀuôn sang ti 51 alŭ, ƀuôn krĭng knông lăn bi klă klei ƀuăn rơ̆ng nao hgŭm hlăm bruă gang mkhư̆ phung ngă soh, klei amâo jăk hlăm yang ƀuôn.

Knăm mơak knông lăn ti Dak Nông

Hluê si Aduôn Trần Lệ Thuỷ, khua bruă Đảng să Ia Rvê: Bruă jih jang mnuih ƀuôn sang nao hgŭm răng mgang klei dưi kiă kriê ala čar, klei êđăp ênang knông lăn hlăm wưng aguah tlam mrâo” dưi bi lar leh ai tiê čŏng ngă bruă mơ̆ng mnuih ƀuôn sang, nao hgŭm hlăm bruă gak răng knông lăn, hmao gang mkhư̆ dŭm bruă ngă soh hŏng klei bhiăn ala čar.

“Hlăm hruê mmông giăm anei, mnuih ƀuôn sang hluê ngă dŭm hdră êlan knông lăn hŏng klei kjăp. Klei ngă soh hŏng dŭm hdră bhiăn knông lăn čiăng ngă bruă hrui mă, lua mnah hlô mnơ̆ng mâo leh klei hrŏ. Mnuih ƀuôn sang mâo leh klei thâo săng kơ bruă grăp čô mnuih ƀuôn sang jing sa kmeh gơ̆ng hdĭp čiăng răng mgang klei dưi kiă kriê, klei êđăp ênang krĭng knông lăn. Mâo djŏ knŏng mnuih ƀuôn sang mâo klei thâo săng amâo lŏ ngă soh dŭm hdră bhiăn, mnuih ƀuôn sang jing ală, jing ngă kơ gưl bruă Đảng nah gŭ, bruă sang čư êa alŭ wăl leh anăn kđông kahan knông lăn tơdah mâo phung găn knông lăn soh hŏng hdră bhiăn.”

Khua gĭt gai kdriêk Ea Sup, čar Dak Lak mđup brei mnơ̆ng kơ dŭm kđông kahan răng mgang knông lăn

Čar Dak Nông mâo êlan knông lăn hŏng boh taih êbeh 140 km bi knông hŏng čar Mundulkiri, ala mtao Campuchia, găn nao 7 să krĭng knông lăn. Hlăm hruê kñăm jih jang mnuih ƀuôn sang răng mgang knông lăn”, êpul êya dŭm să krĭng knông lăn, mbĭt hŏng dŭm bruă ngă dhar kreh bŏ hŏng knhuah djuê ana, phung bi ala kah mbha leh lu klei hriăm hlăm bruă bi lông, bi ktưn gưl nah gŭ. Êdah êdi msĕ ti să Thuận An, kdriêk Dak Mĭl, 6 êpul răng mgang knông lăn mâo leh klei hur har nao hgŭm hŏng êpul răng mgang knông lăn, gơ̆ng knông lăn. Thŭn leh êgao, lu gŏ sang hlăm alŭ wăl myơr lăn, brei mañ pưk hlăm hma čiăng kơ phung knuă druh, lĭng kahan mkŏ mjing anôk gak răng ngă bruă klam gang mkhư̆ phung găn knông lăn soh hŏng hdră bhiăn leh anăn gang mkhư̆ klei ruă tưp Covid-19 ti krĭng knông lăn.

Hlăm hruê knăm jih jang mnuih ƀuôn sang răng mgang knông lăn ti să Thuận An, knơ̆ng gĭt gai lĭng kahan knông lăn čar Dak Nông mđup brei leh mêđai “Kyua klei dưi kiă kriê knông lăn ala čar” kơ sa čô mâo lu klei đru mguôp hlăm bruă gak răng, răng mgang klei dưi kiă kriê knông lăn, klei êđăp ênang knông lăn ala čar. Dhar bruă mặt trận čar Dak Nông leh anăn lĭng kahan knông lăn mđup brei leh 2 boh sang klei bi mguôp kơ dŭm gŏ sang mâo klei hdĭp dleh dlan. Pô bi ala bruă sang čư êa alŭ wăl mđup brei leh hră pah mni kơ dŭm êpul êya, grăp čô mâo bruă ngă kdlưn hĭn hlăm bruă jih jang mnuih ƀuôn sang nao hgŭm răng mgang knông lăn ala čar thŭn 2021. Mđup brei hnư mnơ̆ng kơ phung mâo klei đăo knang, gŏ sang ƀun ƀin ti să Thuận An. Lĭng kahan knông lăn čar Dak Nông mđup brei 7 hnư mnơ̆ng kơ phung hđeh sang hră hlăm hdră “Atăt adei nao sang hră” leh anăn “Anak rông kđông kahan knông lăn” ti Thuận An.

Pô mblang: Y-Ƀel Êban