VOV4.Êđê- Kbưi hŏng čar Kon Tum êbeh 100km, Đăk Glei jing kdriêk knông lăn ƀun hĭn čar, hŏng giăm 90% ênoh mnuih ƀuôn sang jing mnuih djuê ƀiă, 11/12 să, wăl krah jing dleh dlan. Kyua hlue ngă jăk hdră mkŏ mkra Đảng ti krĭng mnuih djuê ƀiă, Đăk Glei mđĭ lar leh knhuah gru krŭ kdơ̆ng, mkŏ mjing krĭng knông lăn hơĭt kjăp, rơ̆ng êđăp ênang ala ƀuôn. Grăp čô đảng viên jing phung kmeh gơ̆ng, ba anăp hlăm dŭm hdră bi lông ktưn khăp kơ ala čar.

Hŏng phung ƀuôn sang ti ƀuôn Đăk Ga, să knông lăn Đăk Ñoong, kdriêk Đăk Glei, čar Kontum, grăp blư̆ mâo êpul bruă Đảng bi mŭt đảng viên mrâo anăn jing bruă prŏng kơ jih ƀuôn. Ară anei êpul bruă Đảng ƀuôn Đăk Ga mâo leh 25 čô đảng viên lehanăn jing jang jing mnuih djuê ana Jeh Triêng sơăi. A Ku, khua kiă kriê hlăm êpul bruă Đảng lehanăn jing khua ƀuôn brei thâo:

“Mŭt Đảng jing klei myưng m’ang yuôm bhăn snăk. Hlăk mŭt Đảng asei kâo pô mâo lu klei bi mlih. Kâo mâo hriăm lu mta klei mrâo, klei jăk, jing yuôm bhăn êdi, mơ̆ng anăn pô srăng lŏ mtô bi hriăm kơ phung ƀuôn sang hlăm ƀuôn. Đảng viên snăn pô thâo ngă klei bi hmô jăk yơh, ngă êlâo čiăng kơ phung ƀuôn sang tui hlue hlăm klei duh ƀơ̆ng. Boh nik ară anei jing bi mlih knhuah mĭn, hdră mă bruă hŏng hdră jăk lehanăn mrâo sơăi. Ya mta klei bhiăn hđăp amâo lŏ djŏ snăn lui jih, ya mta jing knhuah siam snăn djă pioh. Pô jing khua ƀuôn snăn mtrŭt phung ƀuôn sang thâo hlăm klei duah ƀơ̆ng pioh rŭ mjing klei hdĭp jăk siam trei mđao”.

A Ku nah điâo, Khua hlăm bruă Đảng, khua ƀuôn Đăk Ga, să Đăk Nhoong, kdriêk Đăk Glei bi tuôm, iêô jak mnuih ƀuôn sang lăm lui klei kthŭl mluk

        Să knông lăn Dak Ñoong mâo leh bruă Đảng kdriêk Đăk Glei yap jing sa hlăm dŭm alŭ wăl ngă jăk bruă bi mŭt đảng viên krĭng mnuih djuê ƀiă. Ară anei bruă Đảng să mâo leh 184 čô đảng viên, hlăm anăn mâo truh 156 čô jing đảng viên mnuih djuê ƀiă. 6 mlan akŏ thŭn anei, să lŏ mâo 8 čô đảng viên mrâo. A Nang, k’iăng khua bruă Đảng să Đăk Ñoong lač, hlăm thŭn anei sĭt nik bruă Đảng să bi leh mta kñăm bi mŭt truh 15 čô đảng viên mrâo. Sa hlăm dŭm klei hriăm êpul bruă Đảng să mâo jing hlăm klei ksiêm dlăng hră mơar phŭn tal êlâo hŏng klei pral lehanăn klă:

“Leh êpul bruă Đảng mâo klei ksiêm ba mdah kơ hmei snăn hmei ksiêm pral hĭn. Hmei mkŏ mjing klei bi kƀĭn Êpul khua kiă kriê Bruă Đảng hlăm grăp mlan, dah mâo sa čô, dua čô ăt hlŏng ba mdah. Phung êdi ƀuh mă bruă hŏng klei pral, ksiêm pral lehanăn djŏ mơh snăn arăng bi ktưn dua êlan mŭt hlăm Đảng lu hĭn. Bi tơdah hmei dôk lui nanao hră mơar snăn sa hrue kăm, dua hrue kăm, ti dah sa hrue kăm, dua hrue kăm, sĭt nik srăng luič jih thŭn ka leh mơh”.

        Đăk Glei jing sa hlăm 3 boh kdriêk mâo klei hdĭp mda ala ƀuôn dôk hlăm klei dleh dlan hĭn êdi hlăm čar Kontum, kluôm kdriêk mâo giăm 90% ênoh mnuih jing mnuih djuê ƀiă. Kyua ngă jăk bruă mkŏ mjing Đảng krĭng mnuih djuê ƀiă, snăn truh kơ ară anei kdriêk mâo leh êbeh 2 êbâo 700 čô đảng viên, hlăm anăn êbeh 1 êbâo 800 čô đảng viên jing mnuih djuê ƀiă, truh jing êbeh 66%.

Phung đảng viên ƀuôn Đăk Ung, să Đăk Nhoong ba anăp hlăm dŭm bruă hlăm ƀuôn

A Phương, k’iăng khua bruă Đảng kdriêk Đăk Glei brei thâo, Bruă Đảng kdriêk mđing, duh mĭn, bi kjăp mkŏ mjing Đảng nah gŭ, lehanăn bi mŭt đảng viên ti dŭm boh ƀuôn. Mơ̆ng jih jang bruă nah gŭ pral thâo ƀuh, lehanăn ba bi hriăm mbŏ phung mâo ai tiê lehanăn klei thâo bi hmô pioh bi mŭt hlăm êpul mơ̆ng Đảng, lehanăn mbĭt hŏng anăn, mjing klei bi đăo knang, mâo klei khăp mơ̆ng phung ƀuôn sang mnuih djuê ƀiă hŏng Đảng.

“Hmei jao kơ kơ Khua kiă kriê mơ̆ng Bruă Đảng kdriêk, lehanăn truh kơ dŭm gưl klam bruă Đảng nah gŭ nao ksiêm dlăng djăp ênŭm boh klei mâo klei ktrâo atăt, tui ksiêm phung ƀuôn sang mâo knhuah jăk, thâo bi hmô hlăm mnuih djuê ƀiă. Đảng viên jing phung ba akŏ, jing mnuih ngă klei bi hmô kơ jih jang phung ƀuôn sang tui hlue. Klei ktưn čiăng mâo mŭt hlăm Đảng, boh nik hŏng krĭng phŭn krŭ kdơ̆ng digơ̆ čiăng mŭt hlăm Đảng pioh ngă bruă kơ phung ƀuôn sang, mă bruă kơ lăn čar pô kyuadah amĭ ama digơ̆ mphŭn dô jing mnuih nao hlăm cách mạng leh”.

        Hŏng lu hdră, msĕ si bi lar klei bi hmô pioh lŏ bi hriăm mbŏ; mghaih msir pral jih jang hră mơar akâo mŭt Đảng, mkŏ mjing mta adŭ bi hriăm klei bhiăn Đảng tui si alŭ să... Hlăm wưng păn bruă 2015 - 2020, Bruă Đảng kdriêk Đăk Glei mâo bi mŭt leh 700 čô đảng viên mrâo, êbeh hĭn 200 čô đảng viên mkă hŏng ênoh čuăn. Wưng thŭn 2020 - 2025, bruă Đảng kdriêk mâo mtă kñăm bi mŭt truh 600 čô đảng viên mrâo. Wăt hlăm hrue tal êlâo hlue ngă Hdră mtrŭn, Đăk Glei mâo bi mŭt leh êbeh 143 čô đảng viên mrâo. Đăo knang hlăm wưng păn bruă anei, bruă Đảng kdriêk Đăk Glei srăng lŏ bi leh ênoh čuăn lehanăn jing kldưn hĭn bruă bi mŭt Đảng, hlăm anăn mâo mta kñăm bi mâo đảng viên jing mnuih djuê ƀiă. Boh sĭt brei ƀuh phung đảng viên mnuih djuê ƀiă ti kdriêk Đăk Glei, čar Kontum jing pô ba akŏ hlăm klei mđĭ kyar klei hdĭp mda, rŭ mjing krĭng knông lăn knư̆ hrue knư̆ hơĭt kjăp đĭ kyar./.

Pô mblang: Y-Khem Niê