VOV4.Êđê -  Hlăm čar Khánh Hòa hlăk dôk mkra dua kdrêč bruă êlan dơ̆ng pral Dưr – Dhŭng hŏng boh taih truh 54km. Dŭm phŭn dhar bruă pral dôk ngă dua kdrêč bruă anei čiăng mkŏ hŏng êlan dơ̆ng pral Vân Phong – Nha Trang lehanăn bruă mkra êlan dơ̆ng pral Khánh Hòa - Ƀuôn Ama Thuôt. Jih jang bruă mkra êlan dơ̆ng pral mâo bi leh srăng dưi mkŏ, mjing djăp klei găl kơ alŭ wăl Dhŭng kwar Krah đĭ kyar pral hĭn.

8 mlan leh êgao, găn leh lu mơ̆ng klei dleh dlan kyua klei ruă tưp Covid 19, yăn adiê amâo mâo jăk, bruă mkra dŭm kdrêč êlan dơ̆ng pral Dưr -Dhŭng nah Ngŏ wưng thŭn 2017 -2020, kdrêč găn čar Khánh Hòa dôk ngă hŏng klei pral. Bruă mkra êlan anei mbha mâo dua kdrêč, mâo kdrêč mơ̆ng Nha Trang - Cam Lâm êbeh 48km, lehanăn kdrêč mơ̆ng Cam Lâm - Vĩnh Hảo 5km, dưi ngă bruă hlue si klei kuôl kă BOT jing prăk knŭk kna lehanăn prăk mơ̆ng phung duh bi liê. kdrêč bruă mơ̆ng Nha Trang - Cam Lâm jing kdlưn hĭn leh hŏng hdră kčah êbeh kơ 1 mlan, tĭng srăng bi leh hlăm krah thŭn 2023, jing hnưm hĭn mta hŏng hdră kčah 3 mlan./.

Y-Khem pô mblang