VOV4.Êđê - Tlam mbruê 14/4, Khua lăn čar Nguyễn Xuân Phúc ktuê dlăng leh knăm bi klă hdră bi mguôp plah wah adŭ bruă Khua lăn čar leh anăn Sang phat kđi gưl dlông, anôk bruă ksiêm dlăng mnuih ƀuôn sang gưl dlông. Blŭ hlăm knăm anăn, Khua lăn čar Nguyễn Xuân Phúc čih yap, dŭm wưng păn bruă êgao, klei bi mguôp plah wah adŭ bruă Khua lăn čar leh anăn Sang phat kđi gưl dlông, anôk bruă ksiêm dlăng mnuih ƀuôn sang gưl dlông leh anăn dŭm anôk bruă hlăm ala čar, anôk bruă klei bhiăn mâo nanao klei kjăp leh anăn mâo lu boh tŭ năng mđing.

Mơ̆ng anăn đru hlăm bruă ngă jăk bruă ngă, bruă klam grăp anôk bruă. Khua lăn čar Nguyễn Xuân Phúc mtă kơ êpul kiă kriê bruă knuă gưl dlông, sang phat kđi gưl dlông, anôk bruă ksiêm dlăng mnuih ƀuôn sang gưl dlông, phŭn bruă kahan ksiêm, Dhar bruă klei bhiăn mơ̆ng bruă kƀĭn ala leh anăn adŭ bruă Khua lăn čar srăng mâo klei bi mguôp kjăp, nanao leh anăn mâo boh tŭ hĭn. Khua lăn čar mtă kơ dŭm hdră bhiăn dưi bi klă tal anei srăng dưi hluê ngă kluôm ênŭm, ngă hŏng klei jăk, mơ̆ng klei gĭt gai truh kơ anôk ngă bruă, boh nik jing phung knuă druh, phung ngă bruă klă anăp.

Y-Ƀel pô mblang