VOV4.Êđê- Hruê anei hruê 19/5, kluôm ala mkŏ mjing lu mta bruă bi hdơr 132 thŭn hruê k’kiêng khua gĭt gai Hồ Chí Minh. Êlâo kơ anăn, hruê kăm êgao, ti Hà Nội mkŏ mjing leh klei kƀĭn trông kreh knhâo ala čar, rang mdah rup leh anăn hdruôm hră “Mđĭ hĭn knhuah hdĭp cách mạng, lăm lui jih klei čŏng mĭn mă kơ pô hluê si klei mĭn, knhuah hdĭp Hồ Chí Minh”. Võ Văn Thưởng, Khua hlăm phŭn bruă kđi čar, khua hlăm êpul bruă Đảng nao hgŭm leh anăn gĭt gai klei kƀĭn trông. Hluê anăn đru bi klă hĭn dŭm klei yuôm bhăn kreh knhâo – klă sĭt mơ̆ng klei mĭn Hồ Chí Minh kơ bruă mđĭ hĭn knhuah hdĭp bruă cách mạng, lăm lui jih klei čŏng mĭn mă kơ pô.

Hlăk ênuk dôk hdĭp, Khua gĭt gai Hồ Chí Minh, mnuih mkŏ mjing lehanăn mjuăt bi hriăm Đảng, mâo nanao klei mđing kơ bruă mkŏ mjing Đảng, čiăng kơ Đảng klă sĭt doh mngač, kjăp ktang, klă sĭt jing sa Đảng cách mạng sĭt nik, mâo knhuah jăk, lehanăn kreh dhar. Hlăk bi hdơr 39 thŭn hrue mkŏ mjing Đảng (3/2/1969) ñu mâo leh klei čih “Mđĭ knhuah Cách mạng, bi mdoh knhuah knŏng mĭn hjăn kơ pô”, mâo bi klă leh bruă klam mơ̆ng Đảng hŏng phung knuă druh, Đảng viên, hlăm anăn mâo wăt phung mda asei. Lehanăn bi êdah dŭm klei bi knăl amâo mâo jăk mơ̆ng klei duah mĭn mă kơ hjăn pô, lehanăn mâo dŭm hdră mghaih msir jih ya mta klei mĭn amâo mâo jăk duah mă klei tŭ dưn hjăn kơ pô... Leh êbeh 50 thŭn êgao truh kơ ară anei klei čih anăn ăt dôk klei tŭ dưn hlăm bruă mkŏ mjing, ƀư̆ mkra Đảng, hŏng grăp čô knuă druh đảng viên. Klei čih anei jing klei bi hriăm yuôm bhăn, jing klei Ñu mtă mtăn kơ dŭm gưl phung knuă druh đảng viên bi mâo klei mjuăt hriăm nanao, kut kat bi kdơ̆ng hŏng djăp mta klei amâo mâo jăk, jih jang klei mĭn knŏng tui duah klei tŭ dưn hjăn kơ pô, kñăm čiăng mđĭ knhuah cách mạng.

            Klei bi kƀĭn kreh knhâo ala čar

            Tui si nai prŏng, nai prĭn Hoàng Chí Bảo, pô truăn kơ bruă ksiêm hriăm gưl dlông, ti sang hră Ksiêm hriăm kơ bruă kđi čar ala čar Hồ Chí Minh, hlăm klei čih “Mđĭ knhuah Cách mạng, bi mdoh knhuah knŏng mĭn hjăn kơ pô” ñu kñăm lu jing kơ bruă mghaih msir hĕ knhuah amâo mâo jăk knŏng mĭn mă kơ hjăn pô, Awa lŏ mñă: “Roh hlăm lam – roh dôk hlăm ai tiê jing hui hyưt hĭn kơ roh ala tač êngao” Anei jing sa klei hưn brei mâo klei thâo răng hŏng jih jang drei êjai mjuăt hriăm nanao hlăm dăl jih klei hdĭp pô.

“Awa ƀuah ăl wăt hŏng mnuih lĕ hlăm klei mĭn mkhu mkhua, sitôhmô mâo hĕ bruă ƀ’ƀiă mtuh mtưh yap yơh ai tiê pô hŏng Đảng, čiăng kơ Đảng ngă yơh kơ pô dŏ anei klei adih? Awa čih hŏng klei ktang, mâo đa đa mnuih lĕ hlăm klei knŏng mĭn mă hjăn kơ pô, mjing Đảng jing êñan pioh kơ ñu čhuang ƀrư̆ ƀrư̆ phă anôk prŏng mđĭ k’hưm pô. Phung lĕ hlăm klei mĭn anăn, lu bruă prŏng amâo mâo dưi ngă ôh, bi bruă điêt tlaih čiăng ngă, hriăm mjuăt lĕ ala kba, ngă bruă knuă lim djhim, knhal tuič jing ngă soh hŏng klei bhiăn Đảng, lĕ hlăm klei ƀuah mkra, hlŏng jing hĕ mnuih bi kdơ̆ng hŏng Đảng. Jih jang klei hlak bi mngač msĕ snăn, ƀuh jing êlam leh êdi hlăm 50 thŭn êlâo – Jing leh sa klei mtă brei bi răng hŏng jih jang mnuih êjai hlăm bruă mjuăt hriăm kơ knhuah pô tơl jih klei hdĭp”.

Jih jang klei čih ba trông čhai mâo ngă bi mngač leh kơ knhuah klei mĭn Hồ Chí Minh hlăm jih jang knhuah cách mạng Việt Nam, bruă klam lehanăn atur knơ̆ng kơ giê knhâo ktrâo êlan mơ̆ng klei mĭn knhuah hdĭp Hồ Chí Minh hŏng bruă mkŏ mjing Đảng, lehanăn ngă bruă anei mđrĭng hŏng bruă mjuăt kơ knhuah hdĭp mơ̆ng êlâo adih truh kơ ară anei, lehanăn kơ gưl mrâo, klei bi djŏ plah wah knhuah klei mĭn, lehanăn knhuah hdĭp Hồ Chí Minh, hlăk mblang jih jang klei čiăng bi klă kơ ya mta jing klei knŏng mĭn mă kơ hjăn pô, lehanăn ya mta klei gĭr păn kjăp kñăm dưi bi kdơ̆ng hŏng knhuah amâo mâo jăk mĭn mă kơ hjăn pô.

            Khua kiă kriê bruă Đảng hlăm êpul ngă bruă Gưl dlông Huỳnh Tấn Việt lač, klei trông čhai anei đru mđĭ leh klei thâo săng, lehanăn mtrŭn agha êlam hĭn kơ klei tŭ dưn yuôm bhăn mơ̆ng klei mĭn, knhuah hdĭp Hồ Chí Minh hlăm bruă mkŏ mjing, lehanăn ƀư̆ mkra Đảng. lehanăn, jing wưng lŏ bi hdơr lehanăn thâo săng êlam hĭn kơ jih jang klei Khua gĭt gai Hồ Chí Minh mtô mtă, čiăng kơ phung đảng viên lŏ wĭt dlăng klei hdĭp pô, dưn yua djăp mta klei jăk, lehanăn kmhal hĕ jih ya mta bruă pô tuôm ngă leh klei amâo mâo jăk, kñăm bi năng jing phung đru mgang brei kơ ƀuôn sang msĕ si khua gĭt gai Hồ Chí Minh tuôm mtă leh.

Huỳnh Tấn Việt lač, klei čoh čuăn hlăm wưng ară anei jing grăp čô knuă druh, đảng viên hlue ngă bi sĭt hŏng klei đua klam mâo bruă bi hmô jăk, mnuih knư̆ păn bruă prŏng knư̆ brei thâo bi êdah knhuah jăk pô hlăm klei mjuăt bi hriăm, mơ̆ng klei dôk dơ̆ng ƀơ̆ng huă, čiăng mâo klei phung ƀuôn sang tui hlue:

“Gưt klei Ñu mtă, brei drei mâo klei gĭr hĭn, jih ai tiê bi mngač êpul knuă druh hlăm Đảng, gang mkhư̆ lehanăn msưh kdŭn klei ƀơ̆ng ngăn, klei toh hroh hlăm klei mĭn bruă kđĭ čar, knhuah dôk dơ̆ng ƀơ̆ng huă mơ̆ng phung knuă druh đảng viên, klei čŏng bi mlih, čŏng duah đuĕ hdơ̆ng pô lŏ dơ̆ng tui hriăm lehanăn hlue ngă knhuah mngač Hồ Chí Minh hlŏng jing bruă ngă nanao, hlŏng jing klei bhiăn hlăm Đảng”.

Khăt mnal mphŭn pŏk klei rang mdah rup

Blŭ hrăm gĭt gai klei trông čhai, Võ VănThưởng, khua hlăm Êpul kiă kriê bruă Đảng gưl dlông lač: Atur knơ̆ng hlăm bruă mkŏ mjing Đảng jing kơ knhuah dôk dơ̆ng ƀơ̆ng huă, klă sĭt mâo knhuah cách mạng, blŭ nao mđrĭng hŏng bruă ngă, hlue ngă sa bruă kđi čar hlăm klei klă mngač. Klei knŏng duah mĭn mă hjăn kơ pô dưi yap jing “roh hlăm ai tiê”, kyuanăn čiăng “bi kdơ̆ng” brei phŭn kčưm mơ̆ng bruă “mkŏ mjing”, hlăm anăn bruă klam phŭn jing mjuăt hriăm, mkhư̆ ai tiê klei tluh tliưñ, bi ktang ai tiê kdơ̆ng hŏng klei mplư... Võ Văn Thưởng mtă kơ dŭm anôk bruă, êpul êya brei mâo klei dưn yua kjăp klei bhiăn hlăm Đảng, mđĭ hĭn klei ksiêm dlăng, păn kjăp hŏng klei mlih mrâo hdră êlan kiă kriê; mâo nanao klei bhiăn kjăp pioh hrŏng hĕ hlei pô mâo klei mĭn toh hroh, ngă klei amâo mâo djŏ, phat mkra bi ktang klei ngă soh anăn, mâo klei bi mhuĭ, brei thâo kmhal, kñăm mjing klei mjuăt bi hriăm kơ knhuah cách mạng, ngă nanao klei ksiêm wĭt lehanăn čŏng ksiêm wĭt./.

         Pô mblang: Y-Khem Niê