VOV4.Êđê- Sa hlăm dŭm hdră yuôm bhăn čiăng krŭ wĭt bruă duh mkra jing mtrŭt mđĭ klei brei čan prăk, ba yua prăk duh bi liê hlăm dŭm bruă mâo klei mđing tal êlâo, bruă phŭn. Đăo knang hlăm klei čang hmăng lŏ krŭ wĭt bruă duh mkra, lu knơ̆ng prăk mâo leh mta kñăm mđĭ kyar ƀiă êdi 20%-30% hlăm thŭn anei lu jing jưh knang hlăm bruă čhĭ hliê, brei čan kơ grăp čô mnuih mdê mdê, brei čan brei sang lăn ala, sang dôk.

Hluê si klei čih pioh mơ̆ng knơ̆ng bruă ngăn prăk ala čar, hnơ̆ng ênoh ngăn prăk yap truh kơ jih mlan 2 đĭ 1,82% mkă hŏng knhal jih thŭn 2021. Ăt hluê si klei čih pioh mơ̆ng knơ̆ng bruă ngăn prăk ala čar, knhal jih thŭn 2021, prăk leh brei čan mâo 10,44 êklăk êklai prăk. Sơnăn, hlăm 2 mlan akŏ thŭn, knơ̆ng bruă ngăn prăk duh bi liê leh kơ bruă duh mkra êbeh 190.000 êklai prăk. Êlâo kơ anăn, knơ̆ng bruă ngăn prăk ala čar brei thâo, ênoh prăk leh brei čan ăt đĭ leh hlăm brô 2,74% hlăm mlan 1/2022, knar hŏng đĭ giăm 286.000 êklai prăk. Anei jing hnơ̆ng đĭ kyar lu hĭn hlăm wang 10 thŭn êgao, hưn mdah klei đĭ hŏng klei čiăng lĭng čan kơ bruă duh mkra hlăm dŭm mlan akŏ thŭn. Phung thơ̆ng kơ bruă ăt ba mdah dŭm klei đăo knăl jăk kơ klei đĭ kyar ngăn prăk hlăm thŭn anei. Hluê si klei hlak mblang mơ̆ng knơ̆ng bruă chứng khoán BSC, klei čiăng lĭng čan hlăm thŭn 2022 srăng lŏ dơ̆ng đĭ ktang leh anăn năng ai srăng đĭ 14%, dưi đru kyua klei lŏ dơ̆ng krŭ wĭt bruă duh mkra hlăm wưng leh jih klei ruă tưp. Êngao kơ anăn, hnư klei đru đăo knăl jing 350.000 êklai prăk hlăm 2 – 3 thŭn ti anăp ăt srăng đru đĭ kyar bruă ngăn prăk. K’iăng khua kiă kriê knơ̆ng bruă ngăn prăk ala čar Đào Minh Tú brei thâo:

Thŭn 2022 hmei srăng lŏ dơ̆ng hluê ngă hdră êlan ngăn prăk hŏng klei mbruă, mkŏ mjing klei găl jih hnơ̆ng kơ dŭm knơ̆ng bruă, đru tla brei prăk kăk kơ bruă duh mkra. Hlăm klei hluê ngă hdră êlan ngăn prăk, hmei srăng lŏ nao mbĭt hŏng hdră krŭ wĭt bruă duh mkra mơ̆ng knŭk kna, rơ̆ng ksiêm dlăng klei prăk luč ênoh, bi hơĭt hnơ̆ng prŏng, rơ̆ng klei hơĭt ênoh prăk, rơ̆ng kjăp ênoh prăk ăt msĕ klei kriê dlăng jăk anôk mnia mblei prăk ala tač êngao, anôk mnia mblei mah.

            Bi kơ bruă mkăp brei ngăn prăk kơ bruă duh mkra, knơ̆ng bruă ngăn prăk ala čar lŏ dơ̆ng hluê ngă dŭm hdră êlan kñăm ksiêm dlăng ngăn prăk, nao mbĭt hŏng bruă mđĭ hnơ̆ng tŭ jăk bruă ngăn prăk. Êngao kơ anăn, knơ̆ng bruă ngăn prăk mđĭ kyar ngăn prăk êđăp ênang, mâo boh tŭ dưn, kñăm mkăp brei ngăn prăk hlăm dŭm bruă mkra mjing, dŭm mta bruă tal êlâo hĭn hluê si hdră mtrŭn mơ̆ng knŭk kna, ksiêm dlăng kjăp ngăn prăk hlăm dŭm mta bruă mâo klei hyưt dôk mâo klei amâo jăk hgăm msĕ si mnia mblei lăn, chứng khoán, dŭm hdră mkăp BOT, BOT êlan klông, mđĭ hĭn klei ksiêm dlăng hŏng klei brei čan đru hlăm klei hdĭp, ngăn prăk ba yua, mkŏ mjing klei găl kơ knơ̆ng bruă leh anăn mnuih ƀuôn sang dưi čan prăk mơ̆ng knơ̆ng bruă ngăn prăk. Aduôn Hà Thu Giang, k’iăng khua kiă kriê anôk bruă hdră êlan ngăn prăk, knơ̆ng bruă ngăn prăk ala čar brei thâo:

Ngăn prăk srăng lŏ duh bi liê kơ 5 mta bruă tal êlâo hĭn, leh anăn 5 mta bruă anei mâo hnơ̆ng đĭ kyar hĭn hŏng dŭm mta bruă mkăn, 5 mta bruă anei jing: Bruă lŏ hma krĭng ƀuôn sang, knơ̆ng bruă điêt leh anăn man dưn, mnia mblei, bruă tuh tia leh anăn kdrăp mrâo mrang jing kmeh gơ̆ng kơ bruă duh mkra, kyuanăn, hdră tă thŭn 2022 mơ̆ng knơ̆ng bruă ngăn prăk ala čar ăt srăng kñăm duh bi liê kơ dŭm mta bruă anei.

            Mrâo anei, êpul ngă bruă mơ̆ng knơ̆ng bruă ngăn prăk hlăm klei kƀĭn dŭm knơ̆ng bruă Việt Nam (VBF) mñă leh kơ knơ̆ng bruă ngăn prăk ala čar bi êdu room ngăn prăk čiăng kơ dŭm knơ̆ng bruă ngăn prăk mâo lu ngăn prăk dưi brei čan, đru kơ dŭm knơ̆ng bruă, boh nik jing knơ̆ng bruă điêt leh anăn man dưn tơdah mjêč. Bruă mkăp brei room ngăn prăk amâo mâo kluôm ênŭm jing hdră ksiêm dlăng, gĭt gai ngăn prăk mrâo mrang. Hdră êlan dưn yua ngăn prăk năng ai srăng lăm lui hlăm mgi dih êjai hdră brei čan ăt msĕ hŏng dŭm knơ̆ng bruă ngăn prăk mnia mblei mâo ênŭm klei găl kơ anôk mnia mblei đĭ kyar. Pô thơ̆ng kơ bruă Nguyễn Trí Hiếu lač hlăm dŭm mlan kơ anăp, đăo knăl klei čiăng lĭng čan mơ̆ng dŭm knơ̆ng bruă hlăm wưng leh jih klei ruă tưp srăng lŏ đĭ ktang, čiăng kơ bruă duh mkra dưi krŭ wĭt jăk hĭn srăng pŏk hnơ̆ng ngăn prăk kơ dŭm knơ̆ng bruă ngăn prăk jing klei jăk hĭn kơ phung lĭng čan leh anăn knơ̆ng bruă. Knơ̆ng bruă ngăn prăk ala čar čiăng lăm lui hĕ room ngăn prăk kơ grăp knơ̆ng bruă ngăn prăk čŏng bi klă hdră êlan ngă bruă pô. Nguyễn Thanh Tùng, k’iăng khua kiă kriê knơ̆ng bruă ngăn prăk Việt Nam Vietcombank mñă klă, ngăn prăk dưi mkăp brei mrâo srăng đru kơ bruă mkra mjing, mnia mblei, krŭ wĭt bruă duh mkra.

Jih jang room ngăn prăk knơ̆ng bruă ngăn prăk ala čar brei mđĭ thiăm, Vietcombank srăng mkăp brei kơ dŭm mta bruă phŭn hlăm bruă duh mkra, đru kơ klei ngă bruă mkra mjing, mnia mblei leh anăn klei hdĭp mnuih ƀuôn sang.

        Hưn mdah hŏng knơ̆ng bruă ngăn prăk mrâo anei mơ̆ng knơ̆ng bruă chứng khoán Rồng Việt (VDSC) ăt mâo klei čih yap hlăm thŭn anei, dŭm hdră êlan krŭ wĭt leh anăn mdĭ kyar bruă duh mkra srăng mâo klei hmăi jăk kơ bruă ngăn prăk. Dŭm klei đru mâo bruă klam yuôm bhăn hlăm bruă rơ̆ng klei đăo knang mơ̆ng dŭm knơ̆ng bruă, bi hơĭt ênoh ngăn prăk leh anăn bi hrŏ klei luč liê hnơ̆ng dŭm hnơ̆ng mdê mdê hluê si boh prŏng, klei ngă bruă leh anăn boh tŭ klei đru anăn. Êjai klei găl bruă mnia mblei dưi bi hơĭt srăng bi hrŏ dŭm klei amâo jăk hlăm bruă duh mkra. Mơ̆ng anăn dưi mtrŭt mđĭ klei mkăp brei, klei ba yua kơ ngăn prăk. Khădah sơnăn, ƀiădah khua gĭt gai đa đa knơ̆ng bruă ngăn prăk ăt tŭ yap dôk mâo dŭm klei amâo jăk hgăm msĕ si klei prăk lŏ luč ênoh, klei krŭ wĭt mơ̆ng đa đa mta bruă ăt dôk êmưt…ƀiădah dlăng kluôm, klei hmăng hmưi đĭ kyar bruă duh mkra hlăm thŭn anei jăk hĭn mkă hŏng thŭn dih. Knơ̆ng bruă ngăn prăk dưi hmăng hmưi jing sa hlăm dŭm mta bruă đĭ kyar jăk hĭn hlăm thŭn anei./.

Pô mblang: Y-Ƀel Êban