VOV4.Êđê- Leh lu hruê ktuê dlăng kơ krĭng msăt mgei lăn ti kdriêk Kon Plong, čar Kon Tum, hruê kăm êgao, ti wăl krah Măng Đen, kdriêk Kon Plong, Êpul mă bruă mơ̆ng Anôk bruă gĭt gai ala čar kơ gang mkhư̆ klei yan adiê ngă mâo leh mmông mă bruă hŏng Anôk bruă gĭt gai gang mkhư̆ klei yan adiê ngă leh anăn Tui duah phung mâo klei truh ti čar Kon Tum. Mđĭ ktang klei bi hgŭm, pral mdrơ̆ng hŏng klei mgei lăn čiăng rơ̆ng êđăp ênang klei hdĭp, ngăn drăp mnuih ƀuôn sang leh anăn dŭm hdră mkŏ mjing jing bruă dưi mđing dlăng êdi.

Hluê si klei hưn mdah mơ̆ng kdriêk Kon Plông, êpul gĭt gai bruă mdrơ̆ng hŏng klei truh yan adiê leh anăn tui duah đru dŏng čar Kon Tum hŏng êpul ngă bruă brei ƀuh, khădah ka mâo ôh klei hmăi kơ mnuih leh anăn mnơ̆ng dhơ̆ng, ƀiădah dŭm klei ktư̆ mgei lăn hlăm hruê mmông êgao ngă kơ mnuih ƀuôn sang mâo klei hŭi hyưt, rŭng răng. Bruă hâo hưn bi hơĭt ai tiê mnuih ƀuôn sang, mtô lač hdră mdrơ̆ng tơdah mâo klei ktư̆ mgei lăn mâo leh bruă sang čư̆ êa kdriêk Kon Plông kčưm ngă, ƀiădah boh tŭ ka djŏ ôh msĕ hŏng klei hmăng hmưi. Ti anăp boh sĭt klei ktư̆ mgei lăn jing mta klei truh yan adiê mrâo, dŭm anôk bruă hlăm čar amâo mâo klei thâo ôh kơ bruă anei, Văn Tất Cường, k’iăng khua kiă kriê knơ̆ng bruă lŏ hma leh anăn mđĭ kyar krĭng ƀuôn sang čar Kon Tum, khua hlăm êpul gĭt gai bruă gang mkhư̆ klei truh yan adiê leh anăn tui duah đru dŏng čar Kon Tum hưn bi êdah:

“Kâo mñă kơ dŭm phŭn, dhar bruă djŏ tuôm čiăng mjêč ngă bruă ksiêm duah, bi klă boh sĭt klei ktư̆ mgei lăn hlăm hruê mmông êgao ti alŭ wăl čar Kon Tum, boh nik ti kdriêk Kon Plông. Hnưm ba mdah klah čŭn dŭm phŭn agha ngă truh mơ̆ng anăn srăng hâo hưn, brei răng, mtă kơ bruă sang čư̆ êa alŭ wăl čiăng hmao mkŏ mjing dŭm hdră êlan bi mdrơ̆ng hŏn dŭm klei truh yan adiê năng ai mâo hlăm alŭ wăl”.

Hluê si bruă mđing hmư̆ dŭm klei blŭ mơ̆ng bruă sang čư̆ êa alŭ wăl, čar Kon Tum leh anăn pô bi ala phŭn bruă, dhar bruă ăt msĕ hŏng phung thơ̆ng kơ bruă, êpul ngă bruă khua gĭt gai kơ bruă gang mkhư̆ klei truh yan adiê lač sơnei. Ti anăp srăng kñăm kơ bruă ksiêm dlăng dŭm klei hmăi leh anăn boh sĭt dŭm klei mgei lăn hlăm alŭ wăl. Čiăng mtrŭt mđĭ bruă hâo hưn, mtrŭt mjhar mnuih ƀuôn sang, bruă sang čư̆ êa nah gŭ ƀuh klei huĭ hyưt, hnơ̆ng klei hmăi mơ̆ng dŭm klei mgei lăn čiăng čŏng thâo mdrơ̆ng. Amâo dưi lač klei răng leh anăn kăn brei mnuih ƀuôn sang hŭi hyưt, rŭng răng đei, hmăi truh kơ klei hdĭp mda, klei đĭ kyar bruă duh mkra ala ƀuôn leh anăn klei êđăp ênang alŭ wăl. Nguyễn Đức Quang, khua kiă kriê anôk bruă bi mdrơ̆ng, mgaih msir klei truh yan adiê, k’iăng khua adŭ bruă êpul khua gĭt gai, khua êpul ngă bruă mñă klă:

“Ksiêm wĭt dŭm hdră mdrơ̆ng, ksiêm dlăng dŭm mta phŭn djŏ tuôm hŏng bruă mdrơ̆ng hŏng klei ktư̆ mgei lăn hluê si dŭm hră mơar mtô lač mơ̆ng êpul gĭt gai mơ̆ng ala čar kơ bruă bi mdrơ̆ng hŏng klei truh yan adiê leh anăn dŭm hră mơar mtô lač mơ̆ng anôk bruă ksiêm dlăng boh lăn, leh anăn mơ̆ng phŭn bruă mkŏ mkra čiăng brei kơ bruă sang čư̆ êa, mnuih ƀuôn sang thâo leh anăn mâo hdră bi mdrơ̆ng, bi hrŏ klei hmăi. Gĭt gai kơ dŭm anôk bruă thơ̆ng kơ bruă bi mguôp hŏng anôk bruă ksiêm duah hnưm thâo bĭt phŭn agha. Mơ̆ng klei hriăm mơ̆ng Sông Tranh dưi bi hrŏ hruê mmông ksiêm duah phŭn agha, hnưm mâo klei bi klă čiăng mâo hdră êlan djŏ guôp, hmar mâo boh tŭ leh anăn mkiêt mkriêm hruê mmông”.

Mbĭt hŏng bruă mđĭ hĭn klei bi mguôp, čŏng mdrơ̆ng hŏng klei ktư̆ mgei lăn čiăng rơ̆ng klei êđăp ênang kơ anak mnuih, ngăn dŏ mơ̆ng mnuih ƀuôn sang ăt msĕ hŏng dŭm mta bruă mkŏ mkra hlăm alŭ wăl kdriêk Kon Plông, čar Kon Tum, Bi kơ sui êpul ngă bruă mơ̆ng êpul gĭt gai ala čar kơ bruă mdrơ̆ng hŏng klei truh yan adiê mñă kơ êpul gĭt gai gang mkhư̆ klei truh yan adiê leh anăn tui duah, đru dŏng čar Kon Tum jao kơ dŭm anôk bruă thơ̆ng kơ bruă hlăm alŭ wăl bi mguôp hŏng anôk bruă vật lý boh lăn, anôk bruă ksiêm duah klei kreh knhâo mjêč ksiêm duah kơ klei ktư̆ mgei lăn. Anôk bruă ksiêm dlăng boh lăn mâo klei hưn mdah bruă ksiêm dlăng leh anăn čih yap boh sĭt čiăng kơ êpul gĭt gai mâo hdră kčĕ hŏng knŭk kna mâo dŭm hdră êlan mgaih msir hlăm wưng sui. Dŭm sang măi bi êran bi kmlă hŏng ai êa msĕ si: Akŏ Kon Tum, Đăk Ring ăt msĕ hŏng dŭm knơ̆ng mkăp êa mkăn srăng mâo klei ksiêm dlăng hŏng dŭm hdră êlan kñăm rơ̆ng klei êđăp ênang kơ krĭng nah tluôm hluê êlan dlăng yuôm bhăn hŏng bruă bi mdrơ̆ng hŏng klei ktư̆ mgei lăn.

Pô mblang: Y-Ƀel Êban