Hlăm dŭm hruê êgao, klei hâo hưn kơ gưl mgei lăn ktang 5 độ richter hlăm yang hruê 28/7 ngă mgei ktang mâo mnuih ƀuôn sang bi lar. Mnuih ƀuôn sang yăl dliê kơ klei ƀuh, mbĭt anăn bi êdah ai tiê pô tơdah ƀuh mâo boh klei. Amai Y Phiếu, mnuih ƀuôn sang ƀuôn Rô Xia, să Đăk Tăng, lač snei:

“Pô êran ti tač tal êlâo leh anăn êdei anăn hiu duah anak pô. Mnuih ƀuôn sang tal êlâo ăt huĭ mơh kyua ñu ktang đei ƀiădah leh grăp čô mđĭ ai. Bi juh, mtô lač anăn mnuih ƀuôn sang lŏ hơĭt ai tiê”

Leh mâo gưl mgei lăn, hlăm dŭm hruê êgao, bruă sang čư̆ êa, êpul hgŭm dŭm să ti kdriêk Kon Plông, čar Kon Tum jao leh phung knuă druh nao hlăm grăp alŭ, ƀuôn ksiêm dlăng boh klei, mbĭt anăn mñă kơ mnuih ƀuôn sang pral mdrơ̆ng tơdah mâo klei mgei lăn. Nguyễn Văn Bay, Khua Knơ̆ng bruă sang čư̆ êa să Đăk Tăng, brei thâo, kyua hmao hâo hưn anăn mnuih ƀuôn sang ti 11 alŭ hlăm să amâo lŏ huĭ hyưt ôh kơ klei mgei lăn:

"Leh mâo gưl mgei lăn ktang hruê 28/7, ti gŭ klei gĭt gai mơ̆ng Knơ̆ng bruă sang čư̆ êa kdriêk, să mkŏ mjing dŭm êpul mă bruă ba nao phung mă bruă mâo klei thâo hlăm bruă hâo hưn, mtô mblang leh anăn nao ksiêm dlăng boh klei ti dŭm alŭ ti să. Mƀĭt anăn mtă kơ mnuih ƀuôn sang, lŏ dơ̆ng hâo hưn, mđĭ ai mnuih ƀuôn sang hơĭt ai tiê mă bruă mkra mjing”.

Pral mdrơ̆ng hŏng klei mgei lăn, hlăm wưng êgao Anôk bruă ksiêm dlăng kơ lăn ala bi hgŭm leh hŏng bruă sang čư̆ êa kdriêk Kon Plông mkŏ mjing lu gưl mtô bi hriăm klei thâo kơ mnuih ƀuôn sang. Kyua anăn lu mnuih ƀuôn sang tin dŭm să krĭng msăt mgei lăn: Đăk Tăng, Đăk Nên, Đăk Ring, Măng Bút, Ngọc Tem… mâo sơăi klei thâo mdrơ̆ng hŏng klei mgei lăn. Adei Nguyễn Bỉnh Khiêm ti alŭ Vi Xây, să Đăk Tăng, brei thâo bruă brei ngă hlăm boh klei mgei lăn čiăng răng mgang pô leh anăn êpul êya:

“Tơdah kâo nao hriăm hră jing kâo mâo phung nai hlăm sang hră leh anăn bruă ngă ti să, alŭ hâo hưn mtô mblang kơ hdră gang mkhư̆ klei mgei lăn. Tơdah mâo klei mgei lăn jing pô mŭt ti gŭ jhưng čiăng ñĕ kơ mnơ̆ng lĕ amâođah čuôr sang dlưh čiăng mgang kơ pô”.

Bi adei Y Vỹ (ăt ti să Đắk Tăng) snăn brei thâo bruă ngă yuôm bhăn mơ̆ng pô, kñăm đru kơ mnuih ƀuôn sang thâo mdrơ̆ng hŏng klei mgei lăn.

“Ăt mâo mnuih thâo leh ƀiădah phung khua thŭn ăt mâo mnuih thâo ƀiădah ăt mâo mnuih amâo thâo. Hmei hmư̆ klei mñă, jâo hưn kơ digơ̆ brei mŭt ti gŭ jhuưng leh anăn êran nao ti anôk huâng čiăng amâo ngă truh kơ asei mlei pô”.

Mơ̆ng mlan 4/2021 truh kơ ara anei ti kdriêk Kon Plông, čar Kon Tum mâo leh hlăm brô 800 gưl mgei lăn leh anăn hlue si klei bi mklă mơ̆ng Anôk bruă ksiêm dlăng kơ lăn ala anei jing klei mgei lăn kyua bruă mgơ̆ng êa hlăm knơ̆ng kdơ̆ng êa phŭn pui kmlă ngă. Hlăm dua hruê êgao, ti anăp klei mgei lăn dleh ktuê dlăng hŏng hnơ̆ng lu, ktang hĭn mơ̆ng êlâo truh ară anei, Lê Đức Tín, K’iăng Khua Knơ̆ng bruă sang čư̆ êa kdriêk Kon Plông, brei thâo klei blŭ mơ̆ng kdriêk jing pral gang mkhư̆ čiăng ñĕ kơ klei huĭ hyưt hlăm klei mdrơ̆ng hŏng mgei lăn:

“Hmei lŏ dơ̆ng yua hră mơar mơ̆ng Anôk bruă ksiêm dlăng lăn ala mâo djăp ênŭm boh phŭn ktrâo lač thiăm kơ mnuih ƀuôn sang pral mdrơ̆ng hlăm djăp boh klei. Gĭt gai dŭm să mkŏ mjing klei hâo hưn, mtrŭt mjhar klei thâo kơ grăp alŭ, ƀuôn, gŏ êsei mnuih ƀuôn sang čiăng thâo leh anăn mâo klei mdrơ̆ng jăk hĭn. Mkŏ mjing klei hriăm mjuăt truh kơ krĭng msăt mgei lăn leh anăn ti dŭm alŭ mkăn ti kdriêk. Mơ̆ng anăn, đru kơ Anôk bruă gĭt gai ti dŭm să mâo klei thâo tơdah mgei lăn”.

Klei hâo hưn mơ̆ng Anôk bruă hâo hưn kơ klei mgei lăn leh anăn hưn breii răng kơ êa ksĭ ktlư̆ - Anôk bruă ksiêm dlăng kơ lăn ala brei ƀuh, hlăm 2 hruê 28-29/7 mâo leh 46 gưl mgei lăn hŏng msăt mgei lăn ti kdriêk Kon Plông, čar Kon Tum. Boh sĭt brei ƀuh êngao kơ gưl mgei lăn ktang 5 đôk richter hlăm yang hruê 28/7 ngă mgei hlăm lu anôk snăn dŭm gưl mgei lăn adôk mnuih ƀuôn sang amâo lŏ ƀuh ôh. Boh jhat kyua klei mgei lăn ăt ka mâo ôh klei luč liê kơ ngăn drăp. Bruă sang čư̆ êa leh anăn mnuih ƀuôn sang ti krĭng msăt mgei lăn kdriêk Kon Plông, čar Kon Tum dôk lŏ dơ̆ng pral mdrơ̆ng hŏng klei dleh ktuê dlăng mơ̆ng gưl mgei lăn./.