VOV4.Êđê- Hdră bruă “Mđĭ ktang klei dưi ba čhĭ mnơ̆ng kơ anôk bruă duh mkra man dưn leh anăn điêt hlăm mnơ̆ng dhơ̆ng bi ƀăt, djam tan, boh kroh Việt Nam” srăng đru mguôp hlue ngă hdră kñăm ba čhĭ kơ ala tač êngao dŭm mta mnơ̆ng dhơ̆ng lŏ hma, dliê kmrơ̆ng, kan hdang mâo êbeh 50 êklai USD hlăm thŭn 2025 leh anăn ba ala čar drei jing ala čar ba čhĭ kơ ala tač êngao mâo hnơ̆ng jăk hlăm krĭng ASEAN leh anăn dlông rŏng lăn. Anei jing klei hâo hưn dưi ba mdah hlăm Klei bi kƀĭn mphŭn pŏk ngă Hdră bruă “Mđĭ ktang klei dưi ba čhĭ mnơ̆ng kơ ala tač êngao kơ anôk bruă duh mkra man dưn leh anăn điêt hlăm bruă mnơ̆ng dhơ̆ng bi mƀăt, djam tam, boh kroh Việt Nam” mâo Êpul hgŭm mnia blei leh anăn Bruă tuh tia mkra mjing Việt Nam (VCCI) bi hgŭm hŏng Oxfam mkŏ mjing aguah 6/5, ti Hà Nội. Hlăm klei bi trông phung bi ala lač, bruă ba čhĭ boh kroh, djam tam jing sa hdră ngă jăk kơ dŭm anôk bruă duh mkra leh anăn ba klei tŭ dưn jăk, ƀiădah ka ba yua jih ôh dŭm klei găl. Kyua anăn anôk ba čhĭ ti dŭm krĭng EU adôk ƀiă. Hdră bruă anei mđing truh kơ klei mđĭ ktang klei dưi ba čhĭ kơ ala tač êngao hlăm Êpul hgŭm Ơ Rôp (EU) kơ dŭm anôk bruă duh mkra điêt leh anăn man dưn hlăm mnơ̆ng dhơ̆ng bi mƀăt, djam tam, boh kroh; đru mđĭ kyar anôk ba čhĭ leh anăn bi tuôm hŏng ƀĭng hgŭm EU kñăm mđĭ klei găl ba čhĭ kơ ala tač êngao, mđĭ ktang klei dưi mơ̆ng dhar bruă leh anăn klei hing ang mơ̆ng dŭm mta mnơ̆ng dhơ̆ng lŏ hma Việt Nam./.

                                              Pô mblang: H’Zawut Ƀuôn Yă