VOV4.Êđê- Hruê kăm êgao, Êpul bruă hđeh êdam êra gưl dlông Hồ Chí Minh mkŏ mjing klei kƀĭn ksiêm wĭt klei ngă bruă hlăm mlan hđeh êdam êra 2022. Hŏng akŏ “Hlăk thŭn mda thâo mbruă”, dŭm mta bruă hlăm mlan hđeh êdam êra thŭn 2022 mâo leh dŭm gưl bruă hđeh êdam êra hluê ngă kluôm êlam, iêo mthưr lu phung hđeh êdam êra, phung hđeh hur har nao hgŭm, hŏng kluôm ênoh prăk dưi iêo mkrum giăm 68 êklai prăk. Lu klei ngă bruă mrâo, hŏng klei mbruă hlăm êpul êya dưi bi lar kluôm ênŭm.

Mlan êdam êra 2022 hŏng anăn “Phung mda asei hŏng klei mĭn mrâo” mâo 67/67 čar, anôk bruă đoàn čar nao hgŭm, giăm 28 êbâo čô đoàn viên, phung êdam êra, pŏk ngă dŭm mta bruă giăm 68 êklai prăk. Hdră gĭt gai lehanăn pŏk ngă dŭm mta bruă mơ̆ng Mlan êdam êra thŭn 2022 dưi hluê ngă pral mơ̆ng Gưl dlông truh kơ nah gŭ.

Dŭm mta bruă dưi pŏk ngă jăk găl hlăm ai êwa phung êdam êra kluôm ala hơ̆k m’ak mkŏ mjing dŭm bruă bi hdơr 91 thŭn Hruê mkŏ mjing bruă Đoàn êdam êra Cộng sản Hồ Chí Minh gưl dlông, mkŏ mjing Klei bi kƀĭn bruă Đoàn dŭm gưl mđing truh kơ Klei bi kƀĭn bruă Đoàn kluôm ala tal XII, hluê ngă kjăp klei gĭt gai mơ̆ng Đảng, Knŭk kna kơ hdră gang mkhư̆ klei ruă Covid 19 pral, djŏ guôp čiăng mâo dŭm hdră mrâo hlăm bruă pŏk ngă, djŏ guôp hŏng klei mâo mơ̆ng klei ruă tưp.

Lu hdră ngă mrâo hlăm bruă mkŏ mjing dŭm mta bruă hlăm Mlan êdam êra dưi pŏk ngă, mđĭ lar lehanăn ba wĭt klei tŭ dưn hlăm kluôm êpul hluê dŭm hruê kăm ngă bruă. Êpul đoàn viên, êdam êra nao hgŭm lu hlăm dŭm mta bruă hlăm Mlan êdam êra.

Mbĭt hŏng dŭm boh tŭ dưi mâo, dŭm hdră ka dưi mđing pŏk ngă, ka ba wĭt klei tŭ dưn hluê si Hdră kčah mlan êdam êra thŭn 2022, msĕ si: Hdră bi hgŭm đru kčĕ kơ bruă lehanăn msir mghaih bruă mă kơ phung êdam êra mơ̆ng dŭm gưl bruă Đoàn dôk êdu kƀah, ka mâo klei mlih mrâo; ka mâo lu gru bi hmô ba wĭt klei tŭ dưn hlăm hdră mlih mrô, ba yua kdrăp mrâo hlăm bruă ngă lŏ hma; pŏk ngă Hdră klei thâo phung êdam êra ba anăp lŏ mkŏ dăp bruă lŏ hma dôk êdu kƀah; bruă mkŏ mjing, pŏk ngă êpul ba anăp ba yua kdrăp sinh học hlăm bruă răng mgang wăl hdĭp mda ka ba wĭt klei tŭ dưn.

Knăm ksiêm wĭt mlan êdam êra 2022

Ti knăm ksiêm wĭt, lu klei čih đru kčĕ mơ̆ng čar, bruă đoàn čar ba mdah kñăm mđĭ hnơ̆ng tŭ hdră mă bruă Đoàn hlăm wưng ti anăp. Thiếu tá Bạch Quốc Tuyên, K’iăng khua bruă Đoàn êdam êra Phŭn bruă kahan ksiêm hưn mdah klei blŭ: Hŏng hdră 5 ba anăp, mđĭ kyar bruă duh mkra ala ƀuôn, răng mgang ala čar, brei bi hgŭm kjăp hŏng dŭm čar, ƀuôn prŏng, krơ̆ng kjăp lehanăn tŭ dưn hdră phung êdam êra răng mgang knông lăn:

“Êngao kơ bruă drei kreh mkŏ mjing mlan 3 knông lăn snăn drei dưi ksiêm dlăng dưi mtrŭt mjhar hdră anei sui hĭn. Si tô hmô, ruah thŭn bi mklă Mlan êdam êra Việt Nam hŏng krĭng knông lăn, plao ksĭ bi hmô, snăn drei mđing kơ djăp ai dưi, klei mâo mnuih mă bruă, nao hgŭm lu hĭn hlăm hdră mđĭ kyar bruă duh mkra ala ƀuôn krĭng knông lăn. Tal dua, hmei mtă kơ dŭm čar, bruă đoàn ƀuôn prŏng lŏ dơ̆ng bi hgŭm ba wĭt klei tŭ dưn hŏng phung êdam êra Phŭn bruă kahan ksiêm mkŏ mjing dŭm mta bruă kơ krĭng knông lăn, plao ksĭ. Hmei čang hmăng dưi đru kčĕ hŏng Anôk dlăng bruă Đoàn Gưl dlông ba mdah klei bhiăn bi hgŭm plah wah phung êdam êra Phŭn bruă kahan ksiêm hŏng dŭm čar, ƀuôn prŏng ktrâo lač kơ hdră mă bruă mơ̆ng bruă Đoàn êdam êra, kahan ksiêm dŭm čar, ƀuôn prŏng hlăm gưl dlông ăt msĕ mơh hlăm klei bhiăn bi hgŭm hlăm bruă mkŏ mjing dŭm hdră ngă bruă ti alŭ wăl”

Êdam êra Dak Lak gĭr hgŭm hlăm bruă đru kơ yang ƀuôn

          Blŭ hrăm ti anôk bi kƀĭn, Nguyễn Anh Tuấn, Khua bruă Đảng tal 1 êpul Êdam êra Cộng sản Hồ Chí Minh bi mni kơ dŭm klei gĭr lehanăn boh tŭ mơ̆ng dŭm čar, ƀuôn prŏng hlăm kluôm ala dưi mâo hlăm Mlan êdam êra, hlăm anăn mâo klei čih yap mơ̆ng dŭm Phŭn bruă gưl dlông, bruă sang čư̆ êa alŭ wăl, mnuih ƀuôn sang, mjing ai êwa bi ktưn mđing kơ bruă mkŏ mjing klei bi kƀĭn dŭm gưl, lu klei dleh hlăm mlan êdam êra ƀiădah ka dưi hluê ngă jih. Khă snăn, lu klei êdu kƀah ka dưi ngă, dôk lui snăn, brei mă klei hriăm lŏ đru kčĕ, gĭt gai hluê ngă. Nguyễn Anh Tuấn mtă:

          “Klei hriăm drei mâo hluê hŏng klei gĭt gai mơ̆ng Mlan êdam êra jing klei bi mjĕ plah wah dŭm Phŭn, dhar bruă brei ngă bi jăk. Ti alŭ wăl ngă jăk êdi, boh nik hlăm thŭn anei jing thŭn Hdră bhiăn êdam êra dưi tŭ ba yua. Mlan êdam êra mâo klei bi blŭ hrăm mơ̆ng pô djă akŏ anôk bruă sang čư̆ êa alŭ wăl hŏng phung êdam êra. Diih đru kčĕ kơ bruă anei jăk lehanăn klei bi blŭ hrăm mâo kčah mtrŭn leh klei bhiăn, hdră mtrŭn, ba mdah hdră msir mghaih djăp bruă čiăng Dhar bruă jao bruă kơ phung êdam êra. Kâo čang hmăng anei srăng jing klei hriăm lehanăn drei srăng mđĭ lar jăk hĭn hlăm wưng ti anăp, boh nik kơ klei bi kƀĭn anăp truh./.

                                                   Pô mblang: H’Nêč Êñuôl