VOV4.Êđê - Hruê 2/8, Phŭn bruă sang hră mtô bi hriăm mâo hră mơar mơĭt kơ Knơ̆ng bruă sang čư̆ êa dŭm čar, ƀuôn prŏng hlăm Gưl dlông kơ bruă pŏk ngă hrŏng ruah phung nai mtô hđeh, gưl tlâo hlue si Hdră mtrŭn mrô 72 mơ̆ng Phŭn bruă kđi čar. Hluê anăn, mđing hrŏng ruah nai mtô klei hriăm mrâo čiăng hlue ngă Hdră mtô bi hriăm gưl tlâo 2018 lehanăn mđing ruah phung nai mtô hđeh kơ dŭm anôk bruă sang hră hđeh điêt ti krĭng bruă duh mkra - ala ƀuôn dleh dlan. Hlue si Hdră mtrŭn mrô 72 mơ̆ng Phŭn bruă kđi čar, wưng thŭn 2022-2026 mbŏ giăm 66 êbâo phung nai mtô, hjăn thŭn hriăm 2022-2023 mbŏ hrăm brô 28 êbâo čô nai mtô hđeh, gưl 3 knŭk kna. Phŭn bruă sang hră mtô bi hriăm mtă kơ dŭm čar, ƀuôn prŏng kƀĭn dŭm hdră msir čiăng rơ̆ng ênoh hrŏng ruah phung nai mtô msĕ si: hâo hưn lar ƀar kơ klei hrŏng ruah, mă bruă hŏng dŭm anôk mtô bi hriăm čiăng mâo phŭn hrŏng ruah, bi trông hŏng dŭm alŭ wăl mkăn čiăng bi hgŭm hrŏng ruah hlue si dŭm mta klei hriăm ngă djŏ klei čiăng./.

H’ Zawut pô mblang