Mphŭn sa hruê hriăm mrâo, nai mtô leh anăn 930 čô hđeh sang hra gưl sa Quang Trung, ƀuôn prŏng Kon Tum, čar Kon Tum pioh 10 mnĭt dlăng rup sang hră hưn mdah mơ̆ng krĭng êa lip ti dŭm čar, ƀuôn prŏng nah Dưr.

 “Hruê anei mbĭt hŏng phung anak srăng dlăng sa kdrêč video đŭt mđing kơ krĭng mnuih ƀuôn sang nah Dưr yan adiê ngă čiăng ƀuh kơ klei luč liê mơ̆ng mnuih ƀuôn sang,

 Adei Nguyễn Hữu Bảo Anh, hđeh sang hră adŭ 4A, brei thâo:

 “Leh dlăng dŭm kdrêč video kâo ƀuh pap snăk kơ mnuih ƀuôn sang kwar Dưr drei dôk tŭ klei ư̆ êpa, êăt leh anăn ƀuh găp djuê pô êa đung mđuĕ. Kâo čang hmăng angĭn êbŭ anei jih pral čiăng kơ kwar Dưr lŏ wĭt êđăp ênang”.

Ti anăp klei luč liê, ênguôt hnĭng mơ̆ng mnuih ƀuôn sang angĭn êbŭ, Khua sang hră gưl sa Quang Trung pŏk ngă gưl đru mguôp leh anăn mâo hđeh sang hră ăt msĕ mơh phung hđeh đru mguôp êgao hĭn kơ klei čang hmăng. Čŏng ngă sa pŏk hră kač rup kboh hŏng boh hră “Mơĭt kơ kwar Dưr” hlăm anăn mâo 2 êtuh êbâo prăk, adei Đỗ Hồng Anh, adŭ 3C, lač snei:

“Prăk anei jing prăk anôk bruă ama kâo mă bruă brei ƀơ̆ng Knăm mơak mlan pur ƀiădah kâo ƀuh grăp čô ti kwar Dưr êa lip pap mñai snăk anăn kâo mkra hră anei mơĭt kơ digơ̆. Kâo čang hmăng kwar Dưr srăng lŏ wĭt siam leh anănh angĭn êbŭ êa lip amâo lŏ mâo ôh”.

Knŏng leh sa mmông pŏk ngă, Sang hră gưl sa Quang Trung, ƀuôn prŏng Kon Tum đru mguôp leh giăm 25 êklăk prăk; 114 thŭng ƀung hdang krô, êa ngač; 20 thŭng êa ksâo tŏ, ƀêñ keŏ; 8 ao mlut; hlăm brô 400 čhum ao hŏng lu mơ̆ng mkăn leh anăn êa drao. Ăt hlue si nai Đậu Thị Lan, klei năng mơak jing mơ̆ng bruă anei, phung hđeh hmư̆ klei mtô kơ klei khăp, klei thâo bi đru kơ mnuih ƀuôn sang dôk tuôm hŏng klei dleh dlan:

“Ti anăp klei êa lip yan adiê ngă ti kwar Dưr ară anei mnuih ƀuôn sang dôk tŭ, mtô bi hriăm phung hđeh kơ klei khăp, klei thâo bi đru leh anăn kah mbha jing yuôm bhăn snăk. Phung hđeh ƀuh pô jing dưi kah mbha, dưi mguôp sa mta mnơ̆ng čiăng đru kơ mnuih ƀuôn sang kwar Dưr dŭm mta mnơ̆ng yuôm bhăn snăk. Sang hră mgei ai tiê snăk kyua mâo klei hrăm mbĭt mơ̆ng phung amĭ ama hđeh sang hră mtô kơ phung hđeh kơ klei khăp”.

Ti ƀuôn prŏng Ƀuôn Ama Thuôt, čar Dak Lak mkŏ mjing lu bruă ngă yuôm bhăn hlăm yan knăm mơak mlan pur thŭn anei msĕ si: klei rang mdah rup Hdră “Pui hruh kuč mngač klei čang hmăng” mơ̆ng 63 čar, ƀuôn prŏng, ba yua mđup brei “Wăl dlăng hră, bi kƀĭn êpul hđeh”, bi lông hưn mdah hlao mnơ̆ng knăm mơak mlan pur, bi msiam pui hruh; kdŏ anak rai. Adei H Kim Anh Niê, adŭ 5C, sang hră gưl 1 Lê Lợi, ti kdriêk Ea Kar, čar Dak Lak brei thâo:

“Hruê anei kâo dưi hgŭm hlăm lu mta bruă, kâo ƀuh mơak snăk leh anăn hơ̆k kyua dưi ngă hlăm sa hdră yuôm bhăn msĕ snei. Mmăt anei kâo dưi mâo lu mnơ̆ng leh anăn hnư prăk hriăm hră, mni lač jăk kơ jih jang mđing uêñ đru kơ phung găp mâo klei hdĭp dleh dlan. Kâo ƀuăn srăng hriăm hră bi jăk”.

Amai Nguyễn Phạm Duy Trang, Khua dlăng êpul êdam êra, Khua Êpul gơ̆ng êpul hđeh gưl dlông brei thâo, hŏng Dak Lak, hlăm yan knăm mơak mlan pur thŭn anei, Êpul êdam êra gưl dlông srăng mđup brei 15 êbâo hnư mnơ̆ng leh anăn 330 hnư prăk hriăm hră kơ phung hđeh lu čar, ƀuôn prŏng; Mđup brei 4 tač hlăp kơ phung hđeh dŭm čar Gia Lai, Dak Nông, Lạng Sơn leh anăn Cao Bằng. Đru pră leh anăn mnơ̆ng yua grăp hruê kơ phung hđeh ti 15 čar, ƀuôn prŏng hmăi kyua   angĭn êbŭ mrô 3 (angĭn êbŭ Yagi). Ênoh jih jang kơ bruă anei giăm 13 êklai prăk.

“Mđing kơ asăp iêô mthưr mơ̆ng Anôk dlăng bruă êdam êra gưl dlông, dŭm gưl phung knuă druh êdam êra, boh nik phung hđeh kluôm ala hrăm mbĭt hlue ngă bruă đru, kah mbha hŏng phung hđeh ti čar nah Dưr. Dŭm mta hnư mnơ̆ng amâo djŏ knŏng ba klei mơak, thiăm ai ktang kơ phung hđeh amâo myun ôh ƀiădah lŏ đru kơ phung hđeh ai tiê thâo khăp, klei kah mbha hŏng êpul êya”.

Hlăm mlam mơak, hlăm ai êwa jăk mơak, kdrăm kơah, phung hđeh dlăng klei kdŏ anak rai leh anăn dŭm klei kdŏ mmuñ kơ akŏ Knăm mơak mlan pur, mkŏ hŏng phung hđeh dŭm čar Hải Phòng, Lâm Đồng, Bình Dương, Tiền Giang leh anăn ƀuôn prŏng Hồ Chí Minh. Anôk bruă mkŏ mjing mđup brei 1.700 hnư mnơ̆ng mâo hnư prăk hriăm hră, êdeh  wai jơ̆ng leh anăn hnư mnơ̆ng kơ phung hđeh mâo klei hdĭp dleh dlan ti čar Dak Lak.

 Blŭ hrăm hlăm hdcră, K’iăng Khua knŭk kna Nguyễn Hòa Bình bi mni kơ phung hđeh kyua boh tŭ hlăm klei tui hriăm, gĭr hlăm klei hdĭp. Čang hmăng phung hđeh lŏ dơ̆ng mđĭ lar knhuah gru kdrưh kơăm mơ̆ng phung hđeh Việt Nam.

“Kâo čiăng grăp čô hđeh mâo klei mơak Knăm mơak mlan pur hŏng phung pô khăp hơiêng, lŏ dơ̆ng ngă jăk 5 mta klei Awa mtă, hdơr knga kơ amĭ ama, aduôn aê, mpŭ kơ phung nai, mpŭ kơ mnuih prŏng, bi kah mbha, đru kơ phung găp mâo klei hdĭp dleh dlan, boh nik phung hđeh dôk hmăi kjham mơ̆ng angĭn êbŭ, êa lip, hrăm mbĭt nao sang hră, kriăng hriăm hră mơar leh anăn hriăm mjuăt čiăng êdei anei jing phung srăng mkŏ mjing ala čar ƀrư̆ jăk siam, mdrŏng sah./.